Tarantino llanta les sos buelgues nel Teatru Chinu de Los Ánxeles

El director estadounidense Quentin Tarantino punxo les sos buelgues en cementu pa inmortalizar la so figura na entrada del Teatru Chinu de Hollywood en Los Ánxeles.

La ceremonia asocedió poques selmanes dempués de que’l realizador de Pulp Fiction o Malditos bastardos y qu’acaba d’estrenar nos cines el western Los odiosos ocho, tamién recibiera la so estrella nel Paséu de la Fama de Hollywood.

Ente chistes, chancies y alcordances, Tarantino dixo nel so discursu que les sos buelgues favorites d’ente tolos artistes honraos nel Teatru Chinu son les del actor y cantante Roy Rogers, que na so condición d’estrella de les películes del selvaxe Oeste incluyó na so placa de cementu les ferradures del so caballu y la figura d’una de les sos pistoles.

Desque empezó la so andadura en 1927, el Teatru Chinu ye unu de los cines más conocíos y icónicos de Hollywood y na so entrada tien grabaos en cementu los nomes y les buelgues de pies y manos d’estrelles del séptimu arte como Charles Chaplin, Humphrey Bogart, Marilyn Monroe o Robert de Niro.