Tarantino adelantra dos selmanes l’estrenu de ‘Once Upon a Time in Hollywood’

El cineasta Quentin Tarantino va estrenar la so película Once Upon a Time in Hollywood el 26 de xunetu de 2019, dos selmanes antes de la fecha orixinal del so llanzamientu, que taba previstu pal 9 d’agostu d’esi añu.

Con esti cambéu, la cinta protagonizada por Brad Pitt y Leonardo DiCaprio yá nun se va estrenar nel 50º aniversariu del asesinatu de l’actriz Sharon Tate, un crime que forma parte del argumentu d’esta película. Nel elencu estelar d’esta cinta van apaecer tamién Al Pacino, Margot Robbie, Burt Reynolds, Damian Lewis, Emile Hirsch y Dakota Fanning. “Ye una hestoria que tien llugar en Los Ánxeles en 1969, nel apoxéu del Hollywood hippie. Los dos protagonistes son Rick Dalton (DiCaprio), una antigua estrella de westerns televisivos, y el so doble d’acción Cliff Booth (Pitt). Los dos tienen problemes pa trunfar nun Hollywood que yá nun reconocen. Pero Rich tien una vecina bien famosa… Sharon Tate”, adelantró Tarantino en marzu.

Tate, esposa del director Roman Polanski, foi una de los nueve persones que morrieron a manos de Charres Manson y la secta “La Familia”, que los sos crímenes conmocionaron a la sociedá estadounidense y marcaron simbólicamente un puntu y aparte na contracultura de los años 60. Manson foi condergáu a cadena perpetua y finó el pasáu 19 de payares a los 83 años.

Pitt y DiCaprio yá trabayaron con Tarantino: el primeru participó en Malditos bastardos (2009),  ente que’l segundu intervieno en Django desencadenáu (2012). “Trabayé nesti guion mientres cinco años y viví nel condáu de Los Ánxeles la mayor parte de la mio vida, incluyendo 1969, cuando tenía siete años. Toi bien emocionáu de cuntar esta hestoria d’un Los Ánxeles y de un Hollywood que yá nun esisten”, añedió Tarantino. La filmografía de Tarantino inclúi les cintes Reservoir Dogs (1992), Pulp Fiction (1994) o los dos apurres de Kill Bill (2003 y 2004).

“Once Upon a Time in Hollywood” va ser la primer película del director que nun cunte col respaldu del productor Harvey Weinstein, qu’apostó por él dende Reservoir Dogs, pero que la so reputación na industria audiovisual fundióse dempués de que decenes de muyeres acusárenlu de distintos episodios d’agresión sexual.