Taragaños Marineros d’Avilés desenvuelve la so quinta edición

Tres dos años d’ausencia de resultes de la pandemia derivada de la COVID19, torna “Taragaños Marineros” na so quinta edición. Ye una propuesta gastronómica impulsada por Hostelería Comarca Avilés-UCAYC, cola participación y collaboración de la sociedá Nueva Rula d’Avilés y la Mancomunidá Comarca Avilés.

Al envís de contribuyir a proyectar en toa Asturies la tradición marinera y pesquera d’Avilés, y de la so hostelería, diseñóse esti productu turísticu-gastronómicu, que se ta desenvolviendo ente los díes 10 y 15 de mayu, en 12 establecimientos d’hostelería d’Avilés, especializaos en pexe.

La iniciativa “Taragaños Marineros” consiste n’ellaborar tapes polos establecimientos participantes utilizando puramente productos de la mar, productos de nuesa Rula, del nuesu puertu, llugar nel que se puya más del 70 % del pexe prindáu pola flota asturiana.

Los veceros, consumidores y visitantes que participen en Taragaños Marineros”, y escueyan el so meyor “Grumete Taragañu”, van poder optar a ganar premios como cestes de productos gourmet con vinos de famosos.

Esti proyectu tamién contribúi a potenciar la importancia histórica y socioeconómica de la nuesa tradición marinero y pesquero, actuando tamién como marca de ciudá al traviés del distintivu d’enfotu Pescáu de la Rula d’Avilés”, creáu pola Mancomunidá Comarca Avilés nel añu 2013, como forma de xenerar valor añedíu al sector turísticu al traviés del nuesu patrimoniu gastronómicu, hestóricu y cultural.

La presentación corrió al cargu de la presidenta de la Mancomunidá Comarca Avilés y concejala de Comerciu y Turismu d’Avilés, Raquel Ruiz; del xerente de la Rula d’Avilés, Ramón Álvarez, y de representantes de UCAYC.