Tami Neilson, diva del country, escosa entraes pal so conciertu del 27 de marzu n’Avilés

Tami Neilson, la diva del country que va Actuar na Factoría Cultural, escosa entraes pal so conciertu del 27 de marzu n’Avilés. La so xira per España inclúi Bilbao, Vitoria, Zaragoza y Madrid y con esta noticia’l ciclu “Factoría Sound” confirma la so fortaleza ente’l públicu y como parada habitual de les meyores bandes y solistes de xira per Europa.

El ciclu Factoría Sound confirma la so fortaleza y cuelga un nuevu “sold out”, coles entraes escoses pal conciertu que la canadiense Tami Neilson va ufiertar el 27 de marzu (21 hores) nel escenariu de la Factoría Cultural. De la cantante canadiense afincada en Nueva Zelanda dixo Country Universe, una de les biblies de l’Americana Music: “Ye una de les artistes más escitantes de la escena musical actual. Ella traxo al country lo que Amy Winehouse y Sharon Jones traxeron al R&B”. El so nuevu discu ye “Chickaboom”, que sigue’l camín empecipiáu en 2018 con “Sassafrass”. Cantares con gabitu nes que toma enforma de la so propia esperiencia personal.

Na so xira per España, amás d’en Avilés, Neilson va actuar en Bilbao, Vitoria, Madrid y Zaragoza.

Factoría Sound empecipia en 2020 el so cuartu añu de vida, convertíu nuna parada habitual pa les meyores bandes y solistes de xira per Europa y puntu d’alcuentru de los aficionaos del norte d’España. Nesti primer ciclu del añu, de xineru a marzu, programa cinco conciertos, encabezaos precisamente por una de les muses del country, la canadiense Tami Neilson.