Tami Neilson anuncia conciertu na Factoría Cultural pal 30 d’ochobre

Tami Neilson anuncia conciertu na Factoría Cultural pal 30 d’ochobre
07 mayu 11:02 2020 Imprimir

Dientro de la reprogramación de la so xira española que tamién la llevará a Bilbao, Valencia, Madrid, Zaragoza y Vitoria, Tami Neilson vieno acabante der facer l’anuncia d’un conciertu na Factoría Cultural pal 30 d’ochobre. La crisis sanitaria obligó a reprogramar el conciertu con toles entraes vendíes na actuación prevista pal pasáu 27 de marzu. La canadiense ye una de les grandes muses del country.

La canadiense Tami Neilson, una de les grandes muses del country, tien previsto actuar na Factoría Cultural el próximu 30 d’ochobre, dempués de que se viera obligada a suspender la so xira internacional, con  parada n’Avilés, por culpa del decretu del Estáu d’Alarma que provocó la crisis sanitaria del Covid 19. Selmanes antes de la fecha marcada nel calendariu pal so conciertu na Factoría, el 27 de marzu, la canadiense afincada en Nueva Zelanda yá colgara’l cartelu d’escoses les entraes.

Tres la reprogramación de la so xira, nel so pasu per España Tami Neilson tien previstu un percorríu vertixinosu polos escenarios con un conciertu per día dende’l 26 al 31 d’ochobre, dambos incluyíos, con actuaciones respectivamente en Bilbao, Valencia, Madrid, Zaragoza, Avilés y Vitoria.

Al igual qu’asocedió con otres actividaes, la crisis sanitaria del Covid 19 atayó abruptamente el festival Factoría Sound qu’empecipió en 2020 el so cuartu añu de vida, convertíu nuna parada habitual pa les meyores bandes y solistes de xira per Europa y puntu d’alcuentru de los aficionaos del norte d’España. Nesti primer ciclu del añu, de xineru a marzu, programáronse cinco conciertos que cerraba precisamente Tami Neilson y que tuvo que suspender. Enantes actuaron Pristine (25 de xineru), The Electric Alley (31 de xineru), William The Conqueror (6 de febreru) y Dry River (29 de febreru).

De la cantante canadiense afincada en Nueva Zelanda dixo Country Universe, una de les biblies de l’Americana Music: “Ye una de les artistes más escitantes de la escena musical actual. Ella traxo al country lo que Amy Winehouse y Sharon Jones traxeron al R&B”. El so nuevu discu ye “Chickaboom”, que sigue’l camín empecipiáu en 2018 con “Sassafrass”. Cantares con gabitu nes que toma enforma de la so propia esperiencia personal.

  Categories: