Tamara Norniella amuesa na Factoría Cultural so arte na esposición “Opera Omnia”

Tamara Norniella amuesa na Factoría Cultural so arte na esposición “Opera Omnia”
23 xineru 09:57 2020 Imprimir

Sol títulu de “Opera Omnia”, la Factoría Cultural inauguró esti miércoles 22 de xineru, a les 19 hores una nueva esposición, col trabayu multidisciplinar de la moza artista asturiana Tamara Norniella. Podrá visitase de forma llibre y gratuita nel centru cultural de l’avenida de Portugal, de llunes a vienres, de 9.00 a 14.00 y de 17.00 a 21.00 hores, hasta’l 25 de febreru.

L’amuesa axunta cinco series realizaes pola creadora dende 2012: “La Dolce Vita”, “Flayed Identity”, La dislocación del yo”, “Proyectu Específicu d’Identidá” y “Yo nun soi yo”. Y forma parte de la itinerancia dedicada a los mozos artistes asturianos escoyíos na Amuesa d’Artes Plástiques del Principáu d’Asturies. Fueron realizaes en técniques que van dende’l videoarte hasta la impresión con tinta de pigmentos minerales sobro papel, la serigrafía y el colax, técniques mistes sobro llenzu o tela, grafitu o acuarela.

Como señala Luis Feás, comisariu de la esposición, “el cuerpu suel ser la base del so trabayu y na so ficción amuésasenos como una mártir desollada, na que tou ye deséu y tormentu, éxtasis y gloria”.

Tamara Norniella, uvieína de 1986, ye una artista poliédrica, con un trabayu nel que cobren protagonismu’l cuerpu y l’identidá. Llicencia n’Arte Dramático na Escuela Cimera d’Asturies, cursó un Máster d’Arte Contemporaneo na Facultá de Belles Artes de Pontevedra y realizó una estensa variedá de cursos. Al pie de les sos compañeres de grupu de teatru “La rentrée”, llogró una de les beques a la Creación Artística de la Factoría Cultural en 2019. Coles mesmes, la so obra creativa foi escoyida nel Certame de Pintura Nicanor Piñole, nel Certame Nacional d’Arte de L.luarca, y na Amuesa d’Artes Plástiques del Principáu d’Asturies en 2013 y 2016.

  Categories: