Stormy Mondayse

Stormy Mondays, el grupu que conquistó l’espaciu en ganando un concursu de la NASA y xubió los sos soníos al tresbordador espacial, va publicar un nuevu trabayu’l próximu mes de setiembre y fixo un adelantu de los nuevos soníos en forma de single con trés tarrezas. Estos nuevos cantares pueden escuchase dende yá al traviés de les plataformes dixitales Spotify, iTunes y Amazon y sirven de aperitivo pal nuevu doble EP que va ver la lluz el mesmu 1 de setiembre y que va tar disponible en tiendes el día 11.

Colos títulos Wading The River y The Lay Of The Land, la banda asturiana compunxo 12 temes (6+6) onde s’atopa so rock de siempre pero tamién munchos nuevos preseos que nunca usara, xunto con orixinales soníos. El nuevu ya inminente trabayu va editase so llicencies llibres y nos formatos CD y Vinilu.

“Lo que más va llamar l’atención ye la incursión nel folk-rock, un soníu que yá taba presente en Stormy Mondays y que nesta ocasión quixímos esquizar más a xeitu”, anota Jorge Otero, voz, guitarres, harmónica y mandolina, quien añede la vocación de la banda de tocar en grandes festivales de folk.

El grupu d’Uviéu, nacíu en 1991 y con 14 discos nel so currículum ente LP, EP, vinilos, directos y singles, completase con Pablo A. Bertrand (pianu, órganu y coros), Dani Menéndez (guitarres y coros), Danny Montgomery (batería), y Rafa Sánchez (baxu y coros), y puede presumir, ente otros finxos, de tocar con nomes como’l mesmu Bruce Springsteen y d’actuar en festivales como’l de Woodstock ante más de 50.000 persones.