Portada Educación Suatea y l’Asociación de Docentes Interinos denuncien que’l cursu entama con places ensin cubrir

Suatea y l’Asociación de Docentes Interinos denuncien que’l cursu entama con places ensin cubrir

by redacción asturnews

El sindicatu Suatea y l’Asociación de Docentes Interinos d’Asturies (ADIA) sollertaron ayeri de que’l próximu cursu escolar, “el que se va empecipiar el llunes 11 de setiembre pa los alumnos d’Infantil y Primaria y el 13 pa los de Secundaria, va facese con un profesoráu insuficiente”.

La razón nun ye otra que la Conseyería d’Educación decidió retrasar del 12 al 19 de setiembre la segunda convocatoria d’interinos, colo que la incorporación a los sos puestos de trabayu va retrasase de la mesma hasta’l día 25. Tanto Suatea como ADIA piden a la conseyería que rectifique y alantre esa segunda convocatoria. Suatea criticó duramente a la conseyería por non axudicar toles vacantes anunciaes, magar les necesidaes demandaes per munchos centros y a qu’entá nun se cerró’l plazu de matrícula, lo que va faer que surdan nueves necesidaes. Tamién por non responder al so pidimientu d’una xunta colos responsables de la área pa iguar erros antes de l’axudicación definitiva del 30 d’agostu y “arriendes d’ello, el cursu escolar va empezar en munchos centros coles plantiyes incompletes. Ye intolerable”.

Los interinos siéntense “una vegada más” fechos de menos pola Alministración, a la qu’acusen de faltanos al respetu» por camudar «al so antoxu» les feches de los llamamientos: “los compañeros que nun llogren destín el 30 van ver cómo pasa casi un mes hasta que puedan ser axudicaos de nuevu, col consiguiente perxuiciu económicu y llaboral” y “los alumnos van incorporase a los centros cola plantiya entá por cubrir na so totalidá y van tar ente dos y trés selmanes ensin clase en delles asignatures”.

Tamién te podria gustar