SUATEA y el Sindicatu d’Estudiantes convoquen una fuelga contra la LOE esti 14 d’avientu

SUATEA y el Sindicatu d’Estudiantes tienen convocada una xornada de fuelga na Enseñanza pal prósimu 14 d’avientu escontra los conteníos del proyectu de Llei Orgániza de la Enseñanza (LOE) alcordaos nel Congresu de los Diputaos y que según les organizaciones convocantes suponen un “aumentu de los privilexos de la concertada-privada”, el caltenimientu de “l’adoctrinamientu relixosu” y la conversión de la rede pública no que califiquen de “guetu”.

La xornada de fuelga y la manifestación prevista pal prósimu miércoles 14 busquen el refugue d’una LOE na que, según los convocantes de la protesta “increméntense los privilexos de la privada-concertada y estiéndense los conciertos a tolos niveles educativos” y tamién la financiación (3,1%)”a costa de la escuela pública”. El sindicatu autónomu considera qu’esta nueva situación va suponer “la segregación y selección del alumnáu, convirtiendo la rede pública nun guetu”.

Los convocantes de la fuelga afirmen que la LOE va propiciar “la perda de miles de puestos de trabayu” na enseñanza pública y que se consolida “l’adoctrinamientu relixosu”. Otres midíes de la LOE a les que s’oponen los convocantes de la xornada de protesta ye l’aumentu de la ratio nun 10 por cientu.