SUATEA y CCOO desixeron esti miércoles na cai la inclusión del Asturianu en toles estayes educatives

Magar que “El Conseyu Escolar del Estáu” (muérganu máximu de representación de la comunidá educativa del estáu español) aprobó la creación de la especialidá de Llingua Asturiana y Gallego-Asturiano, qu’organismos europeos solicitaren mayor proteición pa esta llingua; y a pesar que la Universidá va formar especialistes pa dar clas de Llingua Asturiana y Gallego-Asturiano; el profesoráu atópase con que nun ta reconocida la so especialidá nos cuerpos docentes al mesmu nivel y colos mesmos efeutos llegales y llaborales que les demás especialidaes.

El Gobiernu asturianu tien base abonda pa crear la Especialidá; como lo demuestra l’informe xurídicu de Leopoldo Tolivar y amás la Llingua Asturiana y el Gallego-Asturiano ye la única llingua que siendo área curricular, nun tien especialidá.

La Conseyería d’Educación nun fizo efeutiva la sentencia del tribunal supremu que ganó SUATEA na que se declara contraria a drechu la esistencia de les plantiyes funcionales n’educación, considerando illegal la regulación de la figura de sobrantes d’horariu y de les especialidaes afines. Les places d’Asturianu y Gallego-Asturiano teníen que pasar a formar parte de plantiya orgánica y ser vacantes col estatus de places de plenu derechu a tolos efeutos. Tratábase d’un pasu fundamental pa garantizar y dignificar la presencia de la nuestra llingua nel sistema educativu asturianu.

Persabemos que ye la condición necesaria pa llograr la normalización educativa, pero nun ye abonda. L’Alministración Educativa y el Gobiernu asturianu tienen que crear la Especialidá de LLingua Asturiana y de Gallego-Asturiano y convocar oposiciones d’esta especialidá. Asina la nuestra llingua sedría tratada en condiciones d’igualdá con respeuto a les otres especialidaes.

Los profesores d’asturianu tan abocaos a ser interinos, nun se yos da opción de dir a oposición, nin se da oportunidá a los funcionarios de carrera a escoyer eses places en concursu de tresllaos.

En resume, la llingua asturiana nun ta nes mesmes condiciones que´l restu asignatures. SUATEA y CCOO siguirán reclamando l´apertura de negociaciones pa da-y al asturianu´l mesmu estatus qu´al restu asignatures y desixirá´l cumplimientu estrictu de la llei del asturianu y del plan de normalización no que cinca a esti tema. Pero ye qu’esta situación del asturianu na enseñanza va xunía a la situación na qu´entovía s´atopa la nuesa llingua.

SUATEA y CCOO desixen la inclusión del Asturianu y del Gallego-Asturiano na Educación Infantil, Primaria, Secundaria, Formación Profesional, Enseñances de Réxime Especial, Escueles d’Idiomes y d’ Adultos. Desixe la creación de la Especialidá, la so inclusión nel Decretu estatal d’Especialidaes, la convocatoria d’oposiciones, concursu de tresllaos y como hai cuantayá: LA OFICIALIDÁ.