SUATEA ve enforma negativu el prealcuerdu anunciáu pola conseyera y diz que precariza más la llingua

18 xineru 08:43 2013 Imprimir

Con motivu del presuntu prealcuerdu algamáu ente la conseyera d’Educación Ana González y el ministru José Ignacio Wert no que toca al estatus de la Llingua Asturiana y del Gallego-Asturiano nel sistema educativu, SUATEA entiende que, de dase talu alcuerdu, les declaraciones de la conseyera son l’amuesa d’un despreciu absolutu pol valir d’esti padremuñu llingüísticu, yá que valórase como un éxitu lo que supón un retrocesu importante de la presencia de l’asignatura nel currículu.

Nun comunicáu asoleyáu esti día, SUATEA diz que “la situación actual (que ye de por sí precaria abondo) suponía na enseñanza Primaria la obligatoriedá d’ufiertar la Llingua cumpliendo la voluntariedá a la qu’obliga la Llei d’usu ensin que por ello tuviera que competir con nenguna otra asignatura. Si’l cambiu supón poner l’asturianu nuna competición pa ver cuála ye la más guapa, ¿ónde queda la “promoción de la llingua”? La Llei de promoción del asturianu tien más artículos que’l que fala de la voluntariedá. Ye una llei qu’ampara’l derechu de los ciudadanos a la so conocencia y que tien por oxetu FOMENTAR LA SO RECUPERACIÓN Y DESARROLLU (art. 3.b) Pues bien, col “apañu” de la conseyería d’Educación non solo nun se fomenta la recuperación nin se procura’l desarrollu, sinón que se la pon nuna tesitura revesosa, compitiendo con otres asignatures con un prestixu y fomentu que se fai dende bayura de medios”.

En casu de dase esti alcuerdu col ministeriu afitaríase, según SUATEA, “una situación que marxina a una llingua que nun algamó l’estatus de la oficialidá. Contarán quiciabes que ye una manera de desfacese poco a poco d’esti “problema” ensin manchase les manes. Dende esti sindicatu queremos denunciar la responsabilidá de l’alministración asturiana, qu’apuesta por un procesu que busca la desapaición del asturianu a mediu plazu aprovechando una coyuntura na que se quier imponer una política educativa reaccionaria, que favorez a los sectores de la derecha recalcitrante en perxuiciu d’un derechu básicu de la ciudadanía. Nun val denunciar la LOMCE y la falta d’actitú negociadora y emponderar per otru llau l’actitú positiva del ministru Wert cuando’l resultáu ye un rebaxe del actual estatus del asturianu”.

Dada la situación criada ente’l Gobiernu estatal y l’Autonómicu, la única salida digna pa la Llingua Asturiana ye la declaración d’oficialidá. Ye’l sentir del profesoráu manifestáu na asamblea celebrada esta mesma selmana, ye la pitición d’una Institución como l’Academia de la Llingua Asturiana y ye la demanda caltenida per casi 30 años por toles families qu’exercieron el derechu d’escoyer pa los sos fíos y fíes l’estudiu del asturianu.

  Categories:
Loading Facebook Comments ...