SUATEA reclama un añu más la oficialiá de la llingua asturiana

05 mayu 07:39 2011 Imprimir

El sindicatu del enseñu SUATEA espubliza cada añu un documentu nel que fai balance de la situación del asturianu nel sistema educativu asturianu y reclama la meyora de les condiciones de l’asignatura, tanto pa los escolinos como pa los maestros. Un añu más SUATEA reclama la oficialidá como la meyor ferramienta pa solucionar estos problemes del asturianu.

Comunicáu completu de SUATEA:

Esti añu conmemoramos el trentésimu segundu añu del día Les Lletres. Trenta y dos años de reivindicación llingüística a pasu firme, valtiando torgues, semando proyectos y sayando llaceries.

Anguaño entamaron a implantase los planes d’estudiu del Minor de Llingua Asturiana na facultá de Filoloxía y la Mención de Maestros na facultá de Ciencies de la Educación. Siguen impartiéndose los Másteres de Llingua y lliteratura asturiana nos Másteres de Formación del Profesoráu d’ESO, Bachilleratu y FP. A propuesta de SUATEA la Conseyería Educación aceptó instalar l’idioma asturianu nel sistema operativu Ubuntu dientro los ordenadores portátiles que mandará esti cursu al alumnáu de quintu Primaria. Vamos abriendo camín, pero atopamos pilancos qu’arreblagar, ente ellos:

1. La falta reconocencia de la especialidá de Llingua Asturiana nos cuerpos docentes non universitarios.

2. Esti asuntu taba presente nel pactu de gobiernu IU-PSOE onde se prevía un estudiu xurídicu que permitiere ponela en marcha. El famosu estudiu yá hai cuantayá que lu recibieron de la Secretaría d’Estáu d’Educación a mediaos de la llexislatura (9 xunu 2009) y nél infórmase-yos, como esti sindicatu tamién lleva diciendo, que la competencia p’aniciar el reconocimientu de la especialidá ye del Gobiernu asturianu que-y lo propondrá al del Estáu, siendo ésti’l competente pa creala una vez oyíes les comunidaes autónomes. Sabedores nel gobiernu de les sos competencies, el pasáu 4 de febreru tuvo llugar en Madrid, nel Ministeriu d’Educación, una de les últimes meses de negociación sectoriales d’Educación onde se negoció’l proyectu de Real Decretu d’Especialidaes de Maestros que se publicará esti añu. Nesta mesa negociación taba presente la confederación STEs Intersindical (a la que pertenez SUATEA) qu’a propuesta nuestra presentó la siguiente redacción del artículu 2. Especialidaes docentes del Cuerpo de Maestros:

“Tendrán la consideración de especialidades del Cuerpo de Maestros, las de la lengua o lenguas cooficiales en aquellas Comunidades Autónomas que así lo tuvieran regulado y aquellas lenguas propias de las comunidades autónomas que, no teniendo estatus de cooficial, gocen de distintos niveles de protección en su legislación autonómica y soliciten su reconocimiento como especialidad docente”.

El representante del ministeriu comentó a los presentes na mesa que depués de preguntar a Asturies (Gobiernu Asturianu), esti nun quier la redacción propuesta por SUATEA; poro, quedará como proponía’l Ministeriu: ”Tendrán la consideración de especialidades del Cuerpo de Maestros, las propias de la lengua cooficial en aquellas Comunidades Autónomas que así lo tuvieran regulado”.

Anque esta redacción nun torgue que les llingües propies non cooficiales puean tener accesu a la Especialidá docente, la nuestra propuesta abría amañosa y ensin torgues, la puerta a la reconocencia de la Especialidá de la Llingua Asturiana ensin nengún esfuerzu cooficializador, que tanto-y repuna y resquema al Gobiernu asturianu. A esta ferramienta normativa amañosa que-yos apurrimos al Gobiernu asturianu compuestu por PSOE-IU, respuenden arrefundiándola. Esta villana acción demuestra dos coses:

– Que la responsabilidá de que nun haya Especialidá de Llingua, por muncho que quieran engañar a la ciudadanía, ye del Gobiernu asturianu compuestu por PSOE-IU

-Y la falta de respetu que-y tienen tanto a los derechos llaborales del profesoráu, como a los derechos llingüísticos de la ciudadanía asturiano reconocíos na llexislación mundial, europea, estatal y asturiana.

3. La falta de respetu a los derechos de los padres del alumnáu d’Educación Infantil (EI) cuando elixeron voluntariamente recibir Llingua Asturiana o Gallego-Asturiano y nun lo reciben, depués de venir escolarizaos nesti idioma años enantes. El cursu pasáu publicóse la sentencia del Tribunal de Xusticia d’Asturies sobre’l recursu contra’l currículu d’EI plantegáu por SUATEA por vulneración del artículu 10 (el Principáu d’Asturies va garantizar la enseñanza del bable/asturiano en tolos niveles y graos, respetando non obstante, la voluntariedá del so deprendizaxe) de la Llei d’Usu (Ll.U). Al rau d’ello y de la so aplicación, entrevistémonos col xefe d’inspección y l’ex-conseyeru Riopedre pa denunciar que na cuasi totalidá de les escueles nun se-yos ufiertaba a los padres y madres la posibilidá de que los sos fíos/es cursaren esos estudios. La rempuesta fue que dao que nel currículu d’EI nun se noma pa nada les nuestres llingües autóctones nun había por qué enseñales. Alvirtióse-yos qu’esta actuación yera contraria al mandáu del art. 10 Ll.U., que tien de respetalu’l currículu al ser ser aqella llei de rangu superior. Nun solo se-y pue imputar a la Conseyería la inoperancia y la omisión nel cumplimientu de la llei, sinón qu’actuó intencionalmente en contra d’ella, cuando espresamente denegó y deniega les piticiones esplícites orales y al traviés d’instancies presentaes nos centros oralmente y nel Rexistru Xeneral polos padres y madres, demandando que les sos fíes y fíos reciban escuela de Llingua Asturiana. Y entovía más, nesti cursu, nel ámbitu de los retayos nes plantiyes y nel específicu d’actuaciones d’esaniciu del nuestru patrimoniu llingüísticu y cultural, la conseyería Educación eliminó la enseñanza de la nuestra llingua en 13 (22% del total onde había) de les 59 (23%del total de centros d’EI y Primaria qu’atendíen solo al 13% del alumnáu) escueles onde hasta’l cursu pasáu se venía dando. Esi esaniciu faise, na mayoría los casos, magar que’l 100 de los padres y madres lo escoyeren voluntariamente y frañendo manifiestamente los sos derechos. Otru datu que rescampla l’abandonu de la Conseyería d’Educación d’esta enseñanza na EI ye que magar que solicitamos los datos d’escolarización d’esa etapa nun mos los dan y tenemos que sacalos al traviés d’encuestes telefóniques a los centros (como nos vieyos tiempos).

Radiografiada y diagnosticada la situación, SUATEA anició una campaña ente l’afiliación y les escueles pa que denunciare esta illegalidá pela vía alministrativa de mano y depués na xurisdiccional contencioso-alministrativa. Anguaño yá tenemos presentaos dos recursos d’alzada por falta de rempuesta a les reclamaciones vía alministrativa. Hai interpuestes más de 25 reclamaciones de padres y madres de delles escueles d’Asturies y una de la dirección y asociación de padres y madres d’una escuela específica d’EI.

4. El pilancu que suponía un númberu mínimu d’escolinos/es solicitantes como condición pa recibir escuela del aria en Primaria, Secundaria y Bachilleratu, ta valtiáu por sentencia del Tribunal Superior se Xusticia d’Asturies qu’anuló esti requisitu reguláu na Resolución de 16 de mayo de 2008, de la Conseyería d’Educación y Ciencia, pola que s’establez la ufierta y les condiciones pa la elección de materies optatives y materies opcionales pa la Educación Secundaria Obligatoria. Sicasí, la Conseyería, calteniendo’l so tonu desaniciador, en cuenta d’acatar la sentencia, vergoñosamente, tienla recurrida. En SUATEA pidiremos que s’acate esa sentencia’l cursu que vien y pa ello que s’eliminen les ratios mínimes nes instrucciones d’aniciu de cursu en toles etapes educatives.

En viendo esta situación ye menester rozar los matos que sema l’alministración educativa y estaferiar y siguir allargando’l camín fechu pa que mos lleve a la OFICIALIDÁ DE LA LLINGUA ASTURIANA Y GALLEGO-ASTURIANO. Poro, pidímosvos el vuestru apoyu diariu na nuestra xera sindical, la participación nos movimientos sociales qu’andechen p’algamar esi oxetivu y asistencia a la manifestación que tolos años se convoca’l primer vienres de mayu col mesmu envís.

  Categories:
Loading Facebook Comments ...