Portada Educación SUATEA pide responsabilidaes pol repartu d’interinidaes

SUATEA pide responsabilidaes pol repartu d’interinidaes

by redacción asturnews
Captura de la web del sindicatu SUATEA col so logu y direcciones de redes sociales

SUATEA vieno acabante de pidir la dimisión de los responsables del desastre de repartu d’interinidaes a la vista de que la situación algama talu nivel que “la Conseyería d’Educación entá nun se dignara a publicar l’alxudicación del profesoráu interín que mañana según el so propiu calendariu tendría d’incorporase a los centros docentes asturianos.
Tres dos meses de los que califiquen dende’l sindicatu educativu como “despropósitos, erros y falta d’asunción de responsabilidaes pol Conseyeru” y visto qu’avanzada la tarde del día 31 “entá nun se publicaron diches alxudicaciones”, SUATEA pide que se rectifique y que se depuren responsabilidaes.

Nuna dura nota de prensa ssoleyada esti mesmu llunes pela tarde, SUATEA reconóz que “sí hubo una rectificación parcial: tres el desastre de convocatoria de les places de los Conservatorios d’Asturies la Conseyería rectifica ante les presiones de les persones afectaes y d’organizaciones que como SUATEA llevemos denunciando les aberrantes actuaciones de la Conseyería d’Educación”.

Sigún SUATEA, los contratos de los docentes de los Conservatorios van ser prorrogaos hasta’l día 20, cuando ta prevista una segunda alxudicación y por eso dicen  congratulase de que les sos postures fueren escuchaes: “Recordemos que fuimos l’únicu sindicatu presente na mañana del vienres pasáu acompañando al profesoráu afectáu por una situación como esta.Pero’l restu de miles d’interinos tán a la espera d’una axudicación que supunxo una de les mayores vergüences na hestoria d’esta Conseyería. Pa ellos y elles la incertidume vivida dende la convocatoria caltiense y va creciendo”.

La situación pal sindicatu ye ablucante: “Erros nes oposiciones, llistes llaraes de fallos, calendariu aberrante ya imposible de cumplir, plataforma informática con parones demientres hores, procesu de pidimientu de places ensin incluyir les demandes de los centros, imposibilidá d’aportar a la páxina de la conseyería mientres la mañana de güei….Son más de los cuatro de la tarde. Miles de docentes tán sufriendo una situación de stress derivada de la incompetencia de la conseyería.Mañana van tener que presentase en Peñamellera Alta, en Degaña, en Somiedu, en Taramundi, en Alles…..En toos estos conceyos asturianos mañana empieza’l cursu al igual que n’Uviéu o en Xixón. Y los docentes han de tar ellí, anque s’enteren del so destín con apenes unes hores d’antelación”.

La conclusión del sindicatu ye qu’esto nun puede siguir asina: “El Conseyeru d’Educación tien de responder ante la sociedá asturiana y ante los docentes de la vergüenza que suponen les actuaciones de la Conseyería. SUATEA esixe espeto pal profesoráu de la enseñanza pública asturiana y la dimisión de los responsables de tamañu trafullu. Los partíos políticos tendríen d’ocupase tamién de lo que-y asocede a más de la cuarta parte de los docentes asturianos y pidir esplicaciones nel parlamentu”.

Tamién te podria gustar