SUATEA esixe negociar les plantiyes docentes

Na Mesa Sectorial qu’encetó l’entamu de la negociación de la plantiya docente pal próximu cursu, SUATEA esixó a la Conseyería la puesta en marcha d’un plan de choque pa recuperar les condiciones de los centros educativos anteriores a l’aplicación de los retayos, y esto pasa necesariamente pola ampliación de les plantiyes en polo menos 913 puestos que se perdieron dende’l 2010.

L’aumentu d’horariu de secundaria de 18 a 20 hores supunxo un amenorgamientu de 555 docentes. Esti aumentu d’horariu provoca que cada docente tenga qu’atender a un númberu mayor de grupos y d’alumnao lo que fai que la calidá de la enseñanza necesariamente se resienta na opinión del sindicatu asturianu.

La eliminación adulces a lo llargo d’estos años de tutores especialistes en Primaria ye otru de los graves problemes de los centros, yá que los especialistes tienen qu’ocupase d’impartir la materia de la so especialidá amás de la tutoría. Hai colexos nos que s’esanicia de la plantiya’l profesoráu de Pedagoxía Terapéutica y Audición y Llinguaxe cola consecuente desatención al alumnáu de Necesidaes Educatives Especiales. La Conseyería incumple los alcuerdos de plantiyes roblaos polos sindicatos, obligando al profesoráu especialista a asumir una doble función y dexando al alumnáu con problemátiques especifiques ensin l’atención fayadiza a les sos necesidaes.

Tamién denuncien la conversión de places ordinaries en billingües contra la voluntá y el pidimientu espresu de los equipos directivos. SUATEA lleva esixendo a la Conseyería un estudiu seriu y rigorosu de les resultancies del programa billingüe pero, ensin qu’esti se realice, camuda la condición de les places docentes afaciéndoles a un programa de dudoses resultancies.

Otres comunidaes fueron trabayando y roblando alcuerdos colos sindicatos pal amenorgamientu de la carga llectiva y non llectiva que soporta’l profesoráu, recordando que los y les docentes d’Asturies tienen la más alta de tol Estáu. Incomprensiblemente n’Asturies “nun s’avanzó pa nada nesta llínea. Esto supón amontar l’estrés docente y torga una fayadiza atención a la diversidá del alumnáu”.

Per otra parte, denuncien que nesta propuesta de plantiyes tán afaciéndose los puestos docentes a la tarrecida LOMCE, esaniciando, por casu, les places d’Apoyu al Área Práctica. Entendemos qu’esto nun tien sentíu si tenemos en cuenta la situación política na que mos atopamos, onde esiste la posibilidá de qu’esa llei sía derogada.

La selmana qu’entra l’Administración convocará reunión de Mesa Técnica de negociación y SUATEA considera qu’esto ye una falta de respetu, especialmente tratándose de la negociación d’unes plantiyes que son la exa fundamental en redol al cual s’estructura tol sistema educativu. Paeznos que la importancia del asuntu merecería una negociación pausada, por exemplu a lo llargo del mes de xineru y non estes prieses que paecen querer convertir esto más nun trámite que nun procesu seriu y trascendente