Portada Educación Suatea entama una campaña pa meyorar les condiciones llaborales del Profesoráu

Suatea entama una campaña pa meyorar les condiciones llaborales del Profesoráu

by asturnet

Nuna rueda de prensa convocada por SUATEA esti día fíxose pública la campaña “Pola escuela pública” cola que’l sindicatu educativu quier enfotase en denunciar la yá insostenible situación del profesoráu asturianu nos centros.

Esta campaña, que yá ta siendo espublizada polos institutos y colexos averase a pidir una meyora de les condiciones llaborales del personal, incluyendo ente otres reivindicaciones, la recuperación del poder adquisitivu, l’amenorgamientu de la xornada y el refugu a la contratación de becarios con funciones docentes qu’introduciríen la precariedá, nel términu más absolutu, ente los enseñantes.

La Conseyería d’Educación, na opinión de SUATEA, “a pesar de les sos declaraciones grandilocuentes contra la Llei Wert lo que fai ye siguir realizando retayos y, tocantes a los currículos, aplicala a raxatabla”. Por eso, consideren qu’esti ye’l momentu de denunciar que “siguir cola implantación de la nueva llei d’educación va suponer imponer, ensin alderique social nin conocencia con antelación abonda , una nueva organización nos centros que va llevar a una reconversión de parte del profesoráu de resultes de la perda de la carga horaria pa munches especialidaes”.

Tamién consideren en SUATEA qu’esti ye un momentu clave pa retomar les reivindicaciones docentes: “per un sitiu enfrentamos a un ábanu de cambeos col trabayu extra qu’ello implica cuando ye sabíu que la LOMCE puede tener fecha de caducidá y sería un esfuerzu baldío; per otru llau la proximidá de les elecciones autonómiques oblíganos a faer manifiestes les necesidaes urxentes del profesoráu y del propiu sistema educativu asturianu pa qu’éstes sían recoyíes poles distintes organizaciones polítiques ente los sos compromisos electorales”. Nesti sentíu dende SUATEA soliciten entevistes colos principales partíos que se van presentar a los comicios.

Tamién te podria gustar