SUATEA denuncia’l procesu d’interinos

SUATEA denuncia’l procesu d’interinos
28 agostu 12:26 2015 Imprimir

Nel últimu día de pidimientos del colectivu interín siguen los problemes sigún lleva denunciando SUATEA tola selmana. Los erros de la plataforma informática de la Conseyería pa regular los pidimientos que, “como tolos años, son claramente insuficientes pa cubrir les necesidaes”, ye la cuestión más escandalosa pal sindicatu.

Sigún describe nuna nota de prensa asoleyada esti día, “la plataforma tuvo paralizada doce hores. Doce hores nes que más de 5.000 persones nun pudieron usar l’únicu mediu reconocíu por Alministración pa faer los pidimientos de plaza, provocando los lóxicos nervios y stress nun colectivu permanentemente maltratáu pol gobiernu asturianu. Anque agora’l sistema funciona sigui faciéndolo de forma opaca, ensin indicar al peticionario l’estáu del so pidimientu, provocando inseguridá nun colectivu que nun acaba de tener la garantía de que los sos pidimientos fixéronse correchamente·. Por mor d’ello dende SUATEA aseguren qu’intentaron, “ensin ésitu, ser recibíos pol Director Xeneral de Personal docente y planificación educativa o pol Conseyeru d’Educación pa intentar encetar esta problemática”.

Nesti sentíu, dada la imposibilidá de tresmiti-yos directamente los pidimientos, dende SUATEA esixen públicamente lo que vien darréu:

a) El compromisu de l’Alministración de que tolos problemes derivaos de la plataforma informática atiéndanse darréu, ufiertando a los aspirantes dalgún procedimientu alternativu y ampliando el plazu de pidimientu de places. Los aspirantes a profesores nun pueden ser víctimes de la improvisación y los erros de l’Alministración, de forma que les víctimes de la inoperancia de la mesma tengan qu’esperar selmanes hasta ver iguada la so situación.
b) Que tolos contratos seyan fechos con efectos 1 de setiembre, incluyendo les places que s’anulen por razones imputables a l’Alministración, como puede asoceder con delles places del conservatorio.
Coles mesmes, SUATEA fai un llamamientu a los docentes interinos escluyíos de les llistes y aquellos que’l próximu llunes vean conculcados los sos derechos de resultes d’erros informáticos a ponese en contactu con nós. Dende SUATEA van entamar “acciones empuestes a la realmisión nes llistes de toes aquelles persones víctimes de la falta de previsión y de la incompetencia de l’Alministración y los sos cómplices, lo mesmo que de reclamación ante los previsibles problemes d’axudicaciones xeneraos polos fallos informáticos”.

  Article "tagged" as:
  Categories:
Loading Facebook Comments ...