SUATEA denuncia una campaña orquestada contra’l profesoráu

SUATEA denuncia una campaña orquestada contra’l profesoráu
25 21:35 2015 Imprimir

El sindicato denuncia la campaña nos medios de comunicación que responsabiliza al profesoráu polos defectos del sistema educativu de la totalidá del estáu.

La publicación inminente del Llibru Blancu encargáu pol ministru Méndez de Vigo a José Antonio Marina, va nesa llínea, según SUATEA, y les propuestes p’ameyorar la educación “tienen que ver con vieyes recetes neolliberales con efectos nefastos nos países onde s’apliquen. La panacea pa resolver esos problemes ye la evaluación del profesoráu”.

La denuncia del sindicato asturianu d’enseñanza nun pue ser más clara; “si hubo miles de despidos na enseñanza pública nel nuesu país, si la precariedá de les plantiyes docentes ye moneda corriente nos centros educativos, si aumentó’l númberu d’alumnáu per aula, si les families traviesen situaciones económiques y sociales pergraves, si sumieron recursos destinaos a l’atención a la diversidá, beques, comedores escolares, si’l porcentaxe destináu a educación menguó hasta un 4% del PIB, paez claro qu’estes variables nun-yos importen y por el contrario carguen tola responsabilidá sobre’l profesoráu”.

De nada valen, n’opinión de SUATEA, los esfuerzos titánicos de los docentes pa caltener l’atención al alumnáu, nin frente a la campaña orquestada contra’l profesoráu a la qu’asistimos clisaos. Linforme presentáu pola OCDE, que nos últimos años se convirtió nel máximu referente en materia educativo, cuando se trata d’una organización de calter económicu, ye un informe de más de 500 páxines sobre l’estáu de la educación nos sos países miembros, y pa SUATEA convirtióse na última andanada contra’l profesoráu nel nuesu país.

“Paez poco casual que de los miles de datos que contién l’informe- munchos d’ellos reconociendo los retayos y los sos efectos negativos nel nuesu sistema educativu- resaltare dos: el númberu de mozos que nin estudien nin trabayen y la falta d’evaluación del profesoráu“, opinen dende’l sindicato asturianu.

Los problemes que güei aquexen a la enseñanza pública “nun se resuelven culpando al profesoráu que ye víctima de los retayos, sinón revirtiéndolos, derogando la LOMCE, recuperando les condiciones llaborales anteriores a los retayos, menguando l’horariu llectivu, estabilizando al profesoráu interíno, acabando cola precariedá, estableciendo una verdadera atención a la diversidá, invirtiendo na meyora de les instalaciones, servicios complementarios y garantizando la gratuidá real de la educación pública” concluí SUATEA nun comunicáu qu’asoleyaba esti miércoles.

Lo qu’en realidá pretende’l Partíu Popular,” y llamentablemente otres opciones polítiques, ye degradar la figura de los docentes, esplicar que la falta d’evaluación ye la responsable de tolos males y poner en marcha un sistema retributivu qu’amenorgue nuevamente los salarios docentes col cebu de premiar a los bonos docentes. La razón de too ello son los compromisos adquiríos ante Bruxeles pa menguar entá más el porcentaxe del PIB destináu a Educación hasta un 3’7% nos próximos años. Y ello cuando’l mesmu Conseyu Escolar del Estáu esixía algamar un 7%. Nun hai una esmolición real nel nuesu país pola educación y pa que l’oficiu docente sía respetáu. A lo qu’asistimos ye a una campaña d’acosu y valtamientu contra quien tenemos nes nueses manes a la mocedá d’esti país. Recuperar siquier la situación anterior a los retayos, derogar la LOMCE, contratar milenta nuevos docentes y un compromisu pa que na próxima llexislatura s’algáme esi 7% son les esixencies mínimes p’ameyorar mínimamente la educación nel nuesu país”.

Estes, precisamente, son les esixencies de SUATEA y la Confederación de STEs-Intersindical que tan desenvolviendo nuna campaña estatal p’acabar colos retayos y esixir la derogación de la LOMCE.

  Article "tagged" as:
  Categories:
Loading Facebook Comments ...