SUATEA denuncia que’l gastu n’educación amenorga un 15% dende 2009

Dende 2009 hasta 2015, la perda porcentual del gastu destináu a Educación nos presupuestos asturianos ye del 14’59% sigún denuncia esti día SUATEA.Nun analís d’urxencia sobre la evolución del gastu públicu n’educación y ante les propuestes de los partíos políticos pa les próximes elecciones xenerales, SUATEA esponía ayeri martes nuna nota de prensa la so reflexón sobre la situación de la enseñanza na nuesa comunidá autónoma.

Al mesmu tiempu que facíen un completu analís presentaben unos gráficos que nun dexaben llugar a dulda denguna: Dende 2009 hasta 2015, la perda porcentual del gastu destináu a Educación nos presupuestos asturianos ye del 14’59%. Sicasí, estos díes apaecieron estudios y programes electorales que “resalven la verdadera situación de la educación: los retayos fueron radicales y pa recuperalos sería necesariu una medría de la inversión cimera a 14 puntos porcentuales”.

SUATEA quier dexar afitao que les principales afectaes son partíes como la formación del profesoráu: “La desapaición de la rede de centros de formación y la mengua de les partíes dedicaes a esti fin amuesen una alministración que fai desdexación de les sos funciones y abandona al profesoráu a la so suerte. D’esta manera faen l’agostu delles organizaciones -inclusive sindicatos- que se dediquen a vender cursos, cuidando que l’Alministración, que tien la obligación de formar al so personal, nun cumple les sos obligaciones”.

Tamién ye significativu’l drásticu amenorgamientu de les partíes dedicaes a la Enseñanza Secundaria, obligatoria y post-obligatoria: “La medría tanta del horariu lectivu como del non lectivu n’enseñanza secundaria -que como demostró SUATEA nun tien oldéu nel restu del estáu- sirvió a les socesives alministraciones pa faer caxa a mariña del sobreesfuerzo del profesoráu, p’amenorgar l’atención a la diversidá y p’empiorar les condiciones nes que s’imparte la docencia. La medría de la precariedá y de les tases d’interinidá, según unes ratios qu’aumentaron mientres amenorgó’l númberu de docentes que trabayen en Asturies, son les consecuencies lóxiques d’una política restrictiva qu’afecta a tola comunidá educativa”.

Los gráficos amuesen, a última hora, que los retayos afecten a la inmensa mayoría de les partíes educatives. Coles mesmes, estos díes, el profesoráu de la escuela pública asisti varáu a una campaña de desprestixu y descreitu ante la sociedá na opinión de SUATEA polo que’l sindicatu asturianu “quier faer públiques estes partíes y collo amosar lo que tolos docentes en Asturies sabemos: Que los retayos tán afogando a la escuela pública; qu’el que quiera formara ten de pagá-ylo del so bolsu y que cada vez se destinen menos recursos a sofitar el trabayu de los docentes. Nesta situación, la propuesta de presupuestos ye un mal parche que poco va solucionar. El profesoráu precisa un amenorgamientu del horariu lectivu pa tolos docentes, contrataciones a tiempu completo que dexen atender toles xeres derivaes de la mayor complexidá social y de los graves problemes qu’aquexen a la infancia y la mocedá asturianes, según un plan d’inversiones ambiciosu de construcción y meyora de centros educativos”.