SUATEA denuncia que se pierden unidaes públiques pa favorecer les concertaes

SUATEA denuncia que se pierden unidaes públiques pa favorecer les concertaes
21 avientu 09:35 2016 Imprimir

SUATEA vieno acabante denunciar que se pierden unidaes públiques pa favorecer les concertaes pal próximu cursu 2017-18.

El día d’ayeri la Conseyería d’Educación comunicó a los centros d’educación Infantil y Primaria el númberu d’unidaes (aules) que s’autoricen pal próximu cursu 2017-2018. Ye este un momentu clave pa los colexos en cuantes que van determinar (especialmente en 3 años) el númberu de places que van poder ufiertar a les families que quieran matricular a los sos fíos.

Dede SUATEA reparen nun comunicáu que “les declaraciones per parte del Conseyeru sobre’l fin de la crisis y los presupuestos que constreñían el gastu n’educación, nun son más que puestes n’escena que nun concordar coles polítiques qu’apliquen y piensen siguir aplicando. Nesti casu atopamos con que non solamente nun hai posibilidá de recuperar les unidaes perdíes el cursu pasáu (siete na ciudá de Xixón) sinón qu’hai nuevos retayos que van amenorgar la ufierta per parte de la escuela pública”.

Ente les propuestes qu’impón l’Alministración “atopamos fusiones de grupos n’Infantil, perda d’unidaes en Primaria y l’imposibilidá d’ufiertar más places que les de correspuenden a una aula naquellos centros que sufrieron zarros esti mesmu cursu”.

Pa SUATEA, perder una unidá en 3 años d’Infantil, que ye cuando empieza de normal la escolarización de los neños y neñes, tien efectos inmediatos y a mediu y llargu plazu: “Lo primeru que puede asoceder ye la perda de profesoráu de sofitu y la consecuente sobrecarga del restu de docentes que permanecen, pero tampoco nun ye baladí’l fechu de que se condiciona’l futuru del centru, que va ver amenorgaes les unidaes consecutivamente según avanza l’alumnáu polos siguiente cursos”.

Ayeri celebróse una xunta cola Xunta de Personal Docente y a pesar de solicitar información sobre datos d’escolarización y el númberu d’unidaes, “en nengún momentu comunicósenos que yá fuera unviada la información sobre les autorizaciones pal próximu cursu. La falta d’información o qu’esta llegue tarde o d’improviso nuna xunta ye daqué que llevamos denunciando les organizaciones sindicales dende fai enforma tiempu y ante la que l’Alministración nun paez tener interés en solucionar”.

  Article "tagged" as:
  Categories:
Loading Facebook Comments ...