Portada Comunicación Suatea denuncia la situación del Colexu Santiago Apostol de Mieres

Suatea denuncia la situación del Colexu Santiago Apostol de Mieres

by redacción asturnews
Captura de la web del sindicatu SUATEA col so logu y direcciones de redes sociales

Suatea vieno acabante denunciar esti día la situación del Colexu Santiago Apostol de Mieres, colexu públicu onde cuasi el 100% del alumnáu de 4 grupos d’Educación Infantil (EI) demandaron recibir enseñances de Llingua Asturiana, ensin que se dotare al profesoráu necesariu pa ello.

La escuela de Mieres lleva impartiendo estes enseñances na Educación Infantil dende hai una montonera años y lo mesmo asocede col alumnáu d’Educación Primaria qu’escoyó mayoritariamente esta asignatura. La dirección del centru demandó a la Conseyería Educación, yá al acabar el cursu pasáu, la necesidá de contratar a tiempu completu a un profesor/a de Llingua Asturiana p’atender a tol alumnáu qu’escoyó recibir clases d’esta área. Sicasí, solo contrató a una persona a media xornada.

Como consecuencia d’ello, y según despliquen dende SUATEA, lleva  ensin recibir clases d’Asturianu tol alumnáu d’EI dende primeros de cursu y va siguir ensin recibiles tou esti cursu si la Conseyería d’Educación nun camuda la so decisión. Esta forma d’actuar ye contraria a derechu y atiende esclusivamente a criterios economicistes de recortes nel gastu a costa de los derechos de los padres y madres. Vulnera la llei d’Usu de 1998 que nel so artículu 10.1 diz: “Nel exerciciu de les sos competencies, el Principáu d’Asturies ha garantizar l’enseñu del bable/asturianu en tolos niveles y graos, respetando sicasí la voluntariedá del so aprendimientu.”

Pal sindicatu “nun ye comprensible qu’un Gobiernu que va promover la reforma del nuestru Estatutu Autonomía pa que recueya la oficialidá de les nuestres llingües siga actuando activamente contra los derechos llingüísticos de la ciudadanía yá recoyíos na normativa asturiana.
Dende SUATEA denunciamos a la opinión pública esta forma d’actuar de la Conseyería d’Educación contrariamente al derechu, apoyamos la demanda de l’Asociación de Padres y Madres del Colexu y, esiximos l’ampliación de la xornada llaboral de la persona contratada pa impartir enseñances de Llingua Asturiana de media a completa pa poder atender a tol alumnáu d’EI”.

Tamién te podria gustar