SUATEA critica los erros nel calendariu escolar

SUATEA vieno acabante d’asoleyar una nota de prensa na que critica los erros de l’Alministración alrodiu del calendariu escolar. día d’ayeri vuelve sorprendenos l’Alministración educativa asturiana con otra subsanación d’errores. Nesti casu afecta al calendariu escolar nel que quiten la denominación de non lectivu al 20 de marzu.

Sigún el sindicatu, a puntu d’empezar el mes d’ochobre, los cambeos de calendariu son un elementu más qu’aburuya la organización del centru y el desenvolvimientu d’actividaes y programaciones: “Yá hai conceyos nos que s’establecieren los dos díes ensin actividá escolar que-yos correspuenden en función de la Resolución emitía pola Conseyería’l pasáu 5 de mayu y ello implica volver reconsiderar los calendarios locales”.

Lo que SUATEA noma de “continua pinga d’errores qu’arrastramos dende’l branu, cola publicación de la llista d’interinidaes nes que nun figuraben cientos de persones, la publicación de les llistes definitives onde nun tán correxíes toles equivocaciones, los errores na axudicación de funcionarios en práctiques, los interinos que nun tienen plaza nel centru que-yos foi asignáu, los necesarios aumentos de xornada que tenemos que defender entá correspondiendo xustamente a necesidaes reales de los institutos o escueles, l’apaición de numberoses vacantes en segunda o tercer convocatoria que tendríen qu’apaecer na primera d’agostu… nun puede llevanos más qu’a esixir a l’Alministración que se tomen midíes pa una mayor eficacia na Planificación educativa y un mayor respetu a la Comunidá Educativa que tien que sufrir les consecuencies de la so inoperancia”.