Portada Educación Suatea celebra esta fin de selmana les segundes Xornaes de Llingua y Educación

Suatea celebra esta fin de selmana les segundes Xornaes de Llingua y Educación

by asturnet

El sindicatu de la enseñanza Suatea, repite la convocatoria fecha per primer vegada l’añu pasáu, y va celebrar los díes 19 y 20 d’esti mes, les Xornaes Llingua y Educación. Les conferencies y alderiques van tener llugar dende’l vienres nel Centru Municipal d’El Llano, en Xixón. Ente les novedaes más interesantes d’esti alcuentru, la presentación de los conteníos del Minor de llingua asturiana de Filoloxía y de la Mención d’asturianu de Maxisteriu, los estudios nuevos y oficiales colos que va cuntar l’asturianu na enseñanza universitaria.

Les xornaes van inaugurase’l vienres a les cuatro la tarde. Media hora dempués el director d’Hegoalde Ikastola d’Iruña, Aitor Etxarte Berezibar, va dar llectura a la comunicación “Tratamientu integráu de les llingües na escuela, compartir, estudiar y planificar”. Los recursos educativos n’asturianu van centrar la conferencia de los maestros d’Institutu Nel Caldevilla y Xulio Berros, responsables de “Puertu Asturies”.

El sábadu, 20 de marzu, les actividaes entamen a les 10:00 hores col profesor, Xosé Antón González Riaño, que va esplicar el plan d’estudios d’asturianu en Maxisteriu. Darréu, a les 11.15, sedrá Xulio Viejo, quien esplique los detalles del Minor de Filoloxía.

Poco enantes de la una la tarde, van tener espaciu nes Xornaes, les “Esperiencies na clas de gallego-asturianu”, que va esplicar Aurora Bermúdez, maestra en Tapia. L’escritor y profesor d’Institutu, Berto Cobreros Gil, dará llectura a la conferencia “Ente’l plan llingüísticu del centru y les cuatro parés del aula. Un cuentu, la realidá y un deséu”.

Les últimes hores de les Xornaes darán entamu a les 16 hores cola presentación de los nuevos llibros d’Educación Primaria, de la mano del maestru Nacho Fonseca. Paz Fonticiella y Concha Prieto van ser les encargaes de presentar los d’educación secundaria. La tarde va completase con un taller entamáu pol colectivu Softastur, nel que deprenderán a los maestros a utilizar la ferramienta Edubuntu pa les sos clases.

Fueya d’Inscripción a les Xornaes

Tamién te podria gustar