Stoned Atmosphere presenten el so videoclip ‘Patria sin sol’

El grupu Stoned Atmosphere va presentar esti xueves nel Forum de Fnac el videoclip del so tema ‘Patria sin sol’ con una sesión de showcase. El clip ta dirixíu por Gonzaga H.G. Antuña y rodóse en diverses localizaciones de la Cuenca’l Nalón pa ilustrar un tema que radiografía con claridá meridiana la Asturies post-industrial. La presentación va ser a les 20.15 cola presencia en directu del grupu.

Procedentes de Samartín del Rei Aurelio, en plenu centru la cuenca minera, Stoned Atmosphere preséntase como un grupu que va más allá del rap, rozando la electrónica y tocando de pleno múltiples estilos musicales. Ceeris, productor musical, aborda la música dende un puntu de vista orixinal a la vez qu’alternativu, diseñando unes bases instrumentales mui elaboraes qu’esperimenten col drum’n’bass y el triphop, pasando pol stoned y el punk. Les lletres d’Arma X son esperiencies intimistes y aventures autobiográfiques hasta agora inédites nel nuestru país.

El duu de Blimea presenten agora’l clip de “Patria sin sol”, acasu el tema que meyor los define y fáenlo embaxo la mirada inquieta y tresgresora del realizador Gonzaga H.G. Antuña.