Portada Cine Star Wars supera a Harry Potter

Star Wars supera a Harry Potter

by redacción asturnews

Star Wars: Los postreros Jedi sigui rompiendo récords, superando a Harry Potter y asitiándose como la segunda franquicia más taquillera de la hestoria.

La última entrega de la saga galáctica yá superó los mil millones de dólares na taquilla mundial dende’l so estrenu’l pasáu 15 d’avientu. D’esta manera Star Wars consiguió convertise na segunda franquicia más taquillera de la hestoria. La saga Star Wars, formada por diez películes, recaldó hasta’l momentu más de 8.556 millones de dólares, y superó a Harry Potter, que les sos nueve entregues cinematográfiques amasaron 8.539 millones. La franquicia máxica basada nes noveles de J.K. Rowling ocupaba’l segundu puestu de la llista hasta agora.

La próxima cinta de Star Wars que va llegar a los cines ye Solo: Una hestoria de Star Wars, el spin-off centráu na mocedá del gran amor de Leia Organa, al que da vida Alden Ehrenreich. El filme de Ron Howard va estrenase’l próximu 25 de mayu y al igual que Rogue One, la so trama ta ambientada antes de los acontecimientos de la triloxía orixinal. En 2019 va ser la vez del Episodiu IX, dirixíu por J.J. Abrams. D’últimes va ser la vez de la nueva triloxía empobinada por Rian Johnson, que la so producción va empezar en xunu n’Escocia.

La franquicia más taquillera de la hestoria ye l’Universu Cinematográficu Marvel, porque los sos títulos recaldaron 13.500 millones de dólares. A pesar de les tresmandaes cifres de la saga creada por George Lucas, ye bien complicáu que consiga superar al conxuntu de les cintes de la Casa de les Idees, yá que, ente que Lucasfilm tien previstu llanzar un filme de Star Wars al añu, Marvel Studios estrena dellos títulos nel mesmu períodu de tiempu.

Coles mesmes, l’alquisición de Fox per parte de Disney, va faer que Marvel Studios pueda amasar otros mil millones de dólares al añu con filmes de personaxes como los X-Men o los Cuatro Fantásticos. Amás, el 27 d’abril va llegar a la gran pantalla Vengadores: Infinity War, la xunta de los pesos pesaos de Marvel, que’l so tráiler ye’l más vistu de la hestoria de YouTube.

Tamién te podria gustar