‘Star Trek’ va tener el so primer personaxe homosexual

‘Star Trek’ va tener el so primer personaxe homosexual
14 xunetu 10:10 2016 Imprimir

La película Star Trek: Beyond, unu de los estrenos más esperaos del branu en tol mundu, va cuntar col primer personaxe gai de la célebre saga de ciencia-ficción que nel 1968 amosó, per primer vegada, un besu interracial na televisión d’Estaos Xuníos.

Dellos medios especializaos na actualidá de Hollywood fixéronse ecu esti xueves de les declaraciones del actor John Cho al periódicu australianu Herald Sun, nes que l’intérprete desveló qu’el so personaxe, Hikaru Sulu, va revelar que ye homosexual. “Gustóme l’averamientu (a esta temática) pa non sobredimensionalo”, señaló l’actor, quien dixo amás qu’espera que la sociedá camine escontra “nun politizar les orientaciones personales” de cada unu.

Coles mesmes, Cho afirmó que’l guionista Simon Pegg y el director Justin Lin tomaron esta decisión pal so personaxe como un homenaxe a George Takei, quien interpretó a Sulu na serie televisiva de Star Trek y que dedicó gran parte de la so vida a lluchar polos derechos de la comunidá LGBT (llesbianes, gais, bisexuales y transexuales).

Acordies con la información de Cho, Sulu va apaecer en Star Trek: Beyond con una pareya del mesmu sexu cola que tien una fía.

Anque se va tratase del primer personaxe de Star Trek que fai esplícita la so condición homosexual, Variety destacó que, nel pasáu, la saga apostó tamién por aumentar la diversidá na pantalla yá que en 1968 amosó, per primer vegada, un besu interracial na televisión d’Estaos Xuníos.

  Categories: