Stan Lee despidiose con un tuit póstumu

Stan Lee despidiose con un tuit póstumu
15 14:13 2018 Imprimir

El curtiu y postreru tuit que’l ceador de grandes personaxes de cómic, como Spider-Man y Iron Man, llanzó de manera póstuma para despidise trescaló a les sos fans. Pocu dempués del so fallecimientu a la edá de 95 años, nel perfil de Twitter del escritor y editor de cómics estadounidense Stan Lee apaeció un mensaxe de tan solu dos cifres y una palabra sobro un fondu negru que rápido se convirtió nun fenómenu viral.

Amás de ser responsable d’una llarga llista de personaxes del universu Marvel, Lee yera conocíu pola so faceta como xeniu del marketing. Una cualidá que volvió demostrar, inclusive, dempués de la so muerte, asocedida ayeri en Los Ánxeles por cuenta de dellos problemes de salú qu’esta lleenda del cómic sufría dende va tiempu.

Nel mensaxe, solo intelixible pa fans y entendíos del mundu del cómic, puede lleese: “1922-2018 Excelsior!”. Evidentemente, los años qu’apaecen nel tuit faen referencia a la fecha de la nacencia y de la muerte del escritor, ¿pero qué significa “Excelsior”? Esti términu forma parte del mundu imaxinariu creáu por Stan Llee nos sos cómics. Una palabra qu’empezó a utilizar nos años 60 pa despidise y que llueu se convirtió nuna marca distintiva de la so obra.

El mesmu autor esplicó en 2007 por qué escoyó esti términu pa les despidíes: “Tenía un montón d’espresiones coles qu’acabar les mios columnes y afayé que la competencia siempres taba asonsañándoles y usándoles. Asina que dixi que diba atopar una espresión que nun diben a saber qué significaba, nin siquier cómo escribila. Ende surdió Excelsior y afortunadamente nunca la coyer”.

Sicasí, nun tuit publicáu en 2010 Stan Llee matizó inda más el significáu del términu. “Finalmente, ¿qué significa Excelsior? “¡Escontra riba y escontra alantre pola gloria mayor!” ¡Eso ye lo que vos deseyo cuando acabo de tuitear! ¡Excelsior!”, escribió’l prestixosu ceador de cómics. Una palabra que daquella naide abarruntaba qu’emplegaría tamién nel so últimu adiós.