Portada Entrevista de la selmana Sonia Fidalgo: “La programes n’asturianu apaecen cada vegada con más naturalidá na TPA”

Sonia Fidalgo: “La programes n’asturianu apaecen cada vegada con más naturalidá na TPA”

by asturnet

Ye una de les cares más reconocíes de la televisión asturiana. Programes como Terapia de grupo, Conexión Asturias o Sones convirtiéronla nuna de les estrelles de la TPA. Agora Sonia Fidalgo lleva delles selmanes d’ésitu d’audiencia con “Estes es mi pueblo”, un programa nel que percuerre Asturies d’un xeitu diferente. Falamos con ella d’esti y otros proyectos de la presentadora.

-Acabes de ponete en marcha con “Este es mi pueblo”, ¿qué tal acoyida ta teniendo’l programa?

-Mui bona, nun facemos más que dar les gracies. A cada llugar al que vamos trátennos como en casa. Ye mui prestoso ver l’arguysu que sienten los asturianos de selo.

-¿Cómo ñaz la idea d’esti programa?

-Supongo que de la necesidá de munchos de caleyar a la gueta d’ayalgues. Creo que a todos nos apetecía facer parada y fonda nos pueblos asturianos.

-¿Recíbenla bien nos pueblos d’Asturies?

-Mui bien, ye increíble les ganes que tenemos n’Asturies de compartimos na allegría. Ye mui guapo ser parte d’un mundu aunque sólo seya por un ratín.

-¿Qué ye lo que más-y presta d’esti proyectu?

-Munches coses, sobremanera el tratu cola xente, les coses que voi deprendiendo, lo bien que se come y qu’agora que quedé ensin los mios mayores teo la oportunidá d’esfrutar de los mayores de toa Asturies.

-¿Siguimos minusvalorando a l’Asturies rural dende les ciudaes del país?

-Cuentote un secretu… (rises) Tán cambiando les tornes, agora onde se vive bien ye nos pueblos. Como me dixeron un día ‘tranquila nina, que por mui males que vengan nosotros somos de los que sabemos semar patates’. Pue qu’en tiempos fuera asina, pero pasu ente pasu la zona rural va ganando tarrén.

-¿Qué pue aportar esti programa pa camudar esa visión?

-Si tovía queda algún que piensa asina, va dase cuenta de la importancia que ye dir de casa en casa y sólo topar sorrises. Si eso nun ye abondo, entós el problema ye otru.

-¿Qué coses vamos atopanos según avance la temporada?

-La idea, foi percorrer Asturies d’oriente a occidente, parando nesos sitios que dacuando nun tán nin siquiera nos mapes. Llugares con una carga emocional que tienen el futuru aseguráu.

-Podemos vela tamién presentando’l programa “Sones”, ¿qué-y presta más, el teatru o grabar a pie de cai cola xente de “Este es mi pueblo”?

-Corta un deu y dime cual te duel más (rises) Los dos sumen y son compatibles, cuando toi caleyando dícenme, Meca, tu yes la de la tonada y cuando toi nel teatru dicen que soi la de los pueblinos. Son dos formatos de raigañu y yo nesi tarrén toi feliz.

-¿Prestaría-y que la TPA emitiera más programes n’asturianu?

-Tán faciendiendose cada vegada más coses n’asturianu. La Bolera, La Quintana de Pola, dalgunos capítulos de Clave de Fondo, Superasturianos… y más que vendrán. Y Lleguen cada vegada d’una manera más natural y espontánea. Si saques les cámares a la cai y dexes que los asturianos falen, daráste cuenta de lo que se fala n’Asturies.

-¿Qué más proyectos tien Sonia Fidalgo en camín?

-Proyectos muitos, como dicen per Tinéu, agora hai que lluchar porque se cumplan. Hai quien diz que sí los cuentes, cháfense. Por sí acasu voi callar.

Tamién te podria gustar