Somos Avilés reclama conteníos asturianos nel programa AUPLAB

El Grupu Municipal de Somos Avilés, al traviés del conceyal Xune Elipe, va facer nel plenu que va deselvolvese esti xueves que vien una pregunta sobre la falta de conteníos y temática de calter asturianu nel programa AupLab.c.

Les Aules Populares d’Avilés, antecedente del actual AupLab.c (Llaboratoriu de proyectos y utilidaes culturales), creáronse nel añu 2011 al traviés del Serviciu d’Educación del Conceyu y desenvuelvíen una serie de talleres, cursos y actividaes de calter estremáu, con una filosofía na que «prima la educación en valores, destacando la igualdá d’oportuninaes».

Esti programa, que pa los dos años vinientes va contar con una partida de 310.000 euros, llega anguaño a la so ventinueve edición y rescampla’l fechu de la cásique nula presencia de temes que tengan dalgo que ver con Asturies. Por cuenta d’ello, Somos Avilés rexistró, cola intención de tratar esti asuntu, una pregunta que va vese nel plenu ordinariu d’esti mes de payares y que ta redactada nestos términos:

«Na 29 edición de los cursos AUPA, bautizaos anguaño como AupLab.c, entamaos pola Fundación Municipal de Cultura, al traviés de La Factoría Centru Cultural, ufiértense nesti cursu 2015-2016 un total de 77 talleres y seminarios qu’abarquen nueve árees o disciplines de conocimientu. Ente ellos inglés iniciación, básicu, intermediu y conversación, francés nivel 0 y 1, árabe, sevillanes iniciación, sevillanes perfeccionamientu, flamencu, bailles de salón, «La Toscana: arte, cultura y llingua» o «Obres maestres del Muséu del Prado». Nel llistáu namás apaecen dos talleres rellacionaos col nuestru entornu cultural: «Historia d’Asturies. Edá Media» y «Los xardinos d’Avilés y la comarca. Descubrir y conocer la naturaleza na ciudá». Siendo ún de los oxetivos d’esti programa municipal educar en valores y deprender a ser ciudadanos y ciudadanes, creemos que tener la posibilidá de conocer el paisaxe cultural que nos arrodia ye mui importante ¿tienen intención d’aumentar la presencia de temática asturiana nos talleres y cursos de les próximes ediciones, dando a conocer a tola ciudadanía que lo desee, por exemplu, la cultura, etnografía, historia, mitoloxía, llingua o tradición oral d’esti país?»