Portada Tecnoloxía Softastur va traducir al asturianu software llibre educativu

Softastur va traducir al asturianu software llibre educativu

by asturnet

L’Asociación Softastur, que vieno acabante de traducir dafechu la suite oficial del sistema operativu Ubuntu en Llingua Asturiana facía anuncia esti día de la xera entamada hai poco de tornar tamién la versión educativa d’esti sistema operativu: Edubuntu, empobinada a escolinos de los 6 a los 18 años.

El trabayu desendolcáu dende Softastur veráse reflexáu na próxima versión del Sistema Operativu Ubuntu: Jaunty Jackalope que saldrá n’abril, y qu’inclúi aplicaciones como la suite ofimática OpenOffice, Gimp, Firefox, etc…

El siguiente oxetivu de Softastur, non menos ambiciosu ye agora Edubuntu, una derivación oficial de la distribución GNU/Linux Ubuntu, destinada pal so usu nel ámbitu escolar. Edubuntu desendólcase en collaboración con docentes y teunólogos de múltiples países. Edubuntu construyóse sobro Ubuntu ya incorpora usos educativos específicos, con un oxetivu nidiu: la población ente los 6 y los 18 años.

Nuna nota de prensa asoleyada esta selmana, l’Asociación quixo afitar que “nos caberos meses pudo vese la situación llamentable que se vien dando col asturianu en maxisteriu, y por estensión, nel sistema educativu asturianu. Énte la posible tentación a que daquién diga qu’ufrir estudios n’asturianu puede ser mui costosu, Softastur quier aportar el so granín de sable traduciendo al asturianu software educativu de calidá contrastada internacionalmente y ufriéndolo de baldre”.

Na Asociación dcien nun tar entá “seguros de los plazos pa saber cuándo puede tar llistu Edubuntu n’asturianu, pero ye dable que pueda tar disponible a finales d’abril. Calculamos que yá disponemos d’un 75% d’Edubuntu traducíu, al usar el sistema Ubuntu de base”.

Dende yá, Softastur ponse a disposición de docentes y centros interesaos en instalar y usar Edubuntu. Namás que tienen de contautar al traviés del formulariu disponible na direición http://softastur.org/contautu.php.

Más información

Tamién te podria gustar