Softastur pon clases n’asturianu con Edubuntu

by asturnet | junio 18, 2009 7:39 am

El colectivu SoftAstur entama esti vienres 19 de xunu nel cibercentru de Sama (Llangréu) de les Escueles Dorao, segunda planta, una actividá educativa na que va ponese clases a neños d’ente 3 y 11 años, n’asturianu. Los profesores van ser docentes que falarán n’asturianu y va usase Edubuntu, un sistema informáticu de sofitu pa les clases, na so versión n’asturianu, como aida na so impartición de la materia.

De 18.00 a 18.40 hores va dase clas real a neños pequeños (ente 3 y 6 años) de conocimientu del mediu, nel sentíu de remanar un mur, un tecláu, xuntar formes, facer cuentes básiques… Darréu, de 18.45 a 20.00 hores, van ufrir clas real a neños ente 7 y 11 años, dando matemátiques, inglés, informática y xeografía n’asturianu con Edubuntu.

La xornada va sirvir pa probar el sistema y dalu a conocer ente los maestros del país, amosando la gran cantidá de medios esistentes anguaño pa la puesta en marcha de clases de cualesquier materia n’asturianu.

Source URL: http://asturnews.com/softastur-pon-clases-n%c2%92asturianu-con-edubuntu/