Sofía Castañón de Podemos-Asturies, visitó’l llar de l’Academia

Sofía Castañón, la nueva Coordinadora de Podemos-Asturies, y Alba González Sanz, Secretaria d’Organización, fixeron esti martes, día 8, una visita institucional al llar de l’Academia. Ellí foron recibíes pol Presidente de l’ALLA, Xosé Antón González Riaño, y pol Secretariu de la mesma, Xosé Ramón Iglesias Cueva.

A lo llargo del aconceyamientu los representantes de l’ALLA treslladaron a les dirixentes polítiques les llinies de trabayu que vien llevando alantre la institución, asina como les necesidaes que, dende una perspeutiva funcional, se consideren más trescendentes pal normal desarrollu de les sos funciones.

Pela so parte, Sofía Castañón espunxo a los académicos los exes básicos de la política llingüística que Podemos-Asturies defende pa contribuyir a la dignificación de les llingües d’Asturies, sorrayando la importancia del llogru de la oficialidá, acordies col mandáu constitucional del artículu 3.2.

El procesu siguíu na negociación de la reforma estatutaria y les sos dificultaes foi otru de los temes que xurdieron nel alcuentru, que s’allargó más d’una hora.

L’ALLA y Podemos-Asturies apautáronse, finalmente, en siguir calteniendo conversaciones col envís d’intercambiar idees y posiciones en rellación coles dinámiques de negociación estatutaria que, nel so casu, se pudieren dar ente les fuerces polítiques a curtiu y mediu plazu n’Asturies.