Skanda y Xera na segunda xornada del Xixón 5º40’

by asturnet | agosto 18, 2010 8:28 am

[1]

El Xixón 5º40’ sigue güei col so programa de conciertos y dende doce la mañana y hasta la una y media de la nueche, col I Alcuentru de Cerveces del Mundu na playa de Poniente.

A les ocho y mediu, l’Escenariu de la Plaza Mayor va recibir al grupu asturianu Skanda, y a les diez y media, sedrán los componentes de Xera, tamién d’Asturies, los encargaos de pesllar la xornada.

Skanda

Skanda ye un grupu mierense que cunta con casi 15 años de trayectoria y cinco disco orixinales, amás de participar en dellos recompilatorios nel so haber. El postreru, Folk & Roll Circus, acaba de salir al mercáu. El so estilu amiesta los sones del rock, el soul, jazz o ska cola música tradicional desenvolviendo’l denomináu folk mestizu o industrial.

Xera

Lleven seis año trabayando nel so proyectu, naciendo como grupu musical nel Valle del Trubia. Verval, Flavia, Anibal, Míguel y Ana dan llugar a un directu con personalidá propia onde s’entemez música electrónica con preseos acústicos de la música folk, como’l bouzouki, violín, gaita o zanfonía. La densidá ye una característica básica de la so música. Podemos atopar dende reminiscencies del rock sinfónicu de los setenta, a soníos envolventes propios del boom sintéticu de los ochenta.

Endnotes:
  1. [Image]: http://asturnews.com/bancofotos/fotos/2/5011.jpg

Source URL: http://asturnews.com/skanda-y-xera-na-segunda-xornada-del-xixon-5o40%c2%92/