Skama La Rede adelanta con “Primaveres” el conteníu del so nuevu discu y estrena cuenta en Twitter y nueva web

El grupo asturianu Skama La Rede vieno acabante esti llunes d’asoleyar al traviés de You Tube el que ye’l Primer adelantu del so discu nuevu. El cantar qu’adelanta esi nuevu discu llámase “Primaveres” y so espardimientu coincide col aportar del grupu a Twitter con una cuenta na que ya tan dando anuncia a la fecha del lanzamientu del discu, previstu pal próxima día 26 de xunetu. Nunos díes tamién van presentar el diseñu nuevu de la so web y otru cantar d’adelantu del discu.

El grupu candansín foi formáu por dellos músicos de la fastera central asturiana, muchos d’ellos sin nin siquiera conocese personalmente, col enfotu de formar un grupu de ska con influyencies rock, punk y folk (siguiendo’l camín de Dixebra), emplegando la trompeta y la gaita asturiana nos sos temes. Tamién deciden emplegar esclusivamente l’asturianu como llingua d’espresión, participando ansí na vindicación llingüística del país y faciendo d’ella bandera permanente.

Sigún asoleya la Wikipedia, “el nome de la banda vien d’una anéudota asocedida demientres les fiestes de Candás de 2000, cuando un parroquianu apaeció en metanes de la folixa “canciando” enfiláu’l tema Smoke on the water de Deep Purple, pero camudando la lletra por Escama la rede, espresión de los conceyos mariñanes del centru d’Asturies que se refier a l’aición de robar los pexes de la rede d’otru piescador. Al velu, dellos de los que depués compondríen Skama la Rede comentaron, ensin mayores pretensiones, qu’aquel sedría un bon nome pa un grupu de ska”.

El grupu debuta de forma “oficial” el 27 de febreru de 2004 en Candás, nún conciertu de baldre xunta otres trés bandes de la fastera y na primavera d’esi mesmu añu asoleyen so primera maqueta, “Hestories absurdes”, qu’incluyiría cinco cantares. Finen l’añu con una ventena conciertos a lo llargo la xeografía asturiano. Dende esi momentu llegarán tres discos, el caberu nel añu 2010, y una montonera d’actuaciones per toa Asturies, España y festivales internacionales como’l de Lorient ente otros.

La nueva web del grupu Skama La Rede