Portada Fiestes Siguimientu multitudinariu de les fiestes d’El Bollu, cola Comida na Cai como actu más numberosu

Siguimientu multitudinariu de les fiestes d’El Bollu, cola Comida na Cai como actu más numberosu

by redacción asturnews

Más de 20.000 persones enllenaron les cais del centru de la ciudá d’Avilés esti llunes na ventiavu séptima edición d’esta celebración de la Comida na Cai. El programa de les fiestes d’El Bollu cuntó con muncha música, deporte y artesanía.

Les fiestes d’El Bollu cuntaron, en toles sos actividaes, con un respaldu multitudinariu d’avilesinos y visitantes, que mientres tol períodu vacacional enllenaron cais y places d’Avilés n’una Selmana Santa hestórica tocantes a ocupación hotelera y participación en toles actividaes programaes.

La XXVII Comida na Cai foi, un añu más, l’eventu más multitudinariu y con mayor participación, con 15.000 comensales en cais y places y una barganal de 5.400 mozos nel parque La Ferrera nel momentu de mayor arribación.

La conceyala de Festexos quixo destacar la concienciación progresiva per parte de les persones, mayoritariamente nueves, qu’esfruten de la Comida na Cai nes praderíes del La Ferrera. “Yá lo comprobemos l’añu pasáu y anguaño esi enclín consolídase: hai un mayor civismu que se traduz en menos borrafes nes praderíes y más nos contenedores”, esplicó. Hevia añedió que “tenemos que siguir afondando nesti aspeutu y siguir ameyorando esti indicadores en socesives ediciones, para demostrar que l’usu del parque ye compatible cola Comida na Cai”.

Nesti sentíu, la conceyala señaló qu’anguaño’l Conceyu “retiró la basura xenerada nel parque con celeridad: a les 21 hores les praderíes taben llibres de basura, llistes por que esta mañana, a primer hora, personal municipal de Parques y Xardinos pudiera empezar a revisar al detalle cada tramu para recoyer les borrafes más pequenes”. Hevia tamién se refirió al “eficaz control nos accesos al parque por que nun s’introduzan vasos de cristal, control que ta directamente rellacionáu cola presencia cada vez menos numberosa de restos de vidriu nel parque”.

Los desfiles de Xarrés, nos sos dos pases de domingu y llunes, cuntaron dambos díes con miles de persones a lo llargo de los sos percorríos, qu’esfrutaron de les 15 xarrés y 7 carros del país, 14 bandes de música, gaites y grupos folclóricos, 4 charangues, la Chicolatera, y los xigantes y cabezudos.

La programación musical tuvo un añu más a los soníos folk como protagonistes, con conciertos tan destacaos y bien acoyíos pol públicu como los de Rubén Alba, Ún de Grao o Xabier Díaz y As Adufeiras de Salitre, ensin escaecer el Festival del Cantar Asturianu y la ventiavu octava edición del Alcuentru Coral d’Habaneres. Fora de la música tradicional, la Gran Verbena de “El Bollu”, coles orquestes Anaconda y Cañón, volvió rexuntar a mamplén de persones na Pista de la Esposición.

El refuerzu de l’animación de cai enllenó d’ambiente festivo’l cascu urbanu, colos pasacalles protagonizaos pela Banda de Música y Gaites Dambara, procedente de la localidá lucense de Burela, según poles fanfarries El Felechu, Dexe’l Pasu, Menudos Notes y Pepe El Chelo.

El colofón a esti programa musical ponlu’l festival “L’Universu del Cantar”, que se va celebrar el sábadu 4 de mayu, a partir de les 19:30 hores, con actuaciones d’ópera, pop-rock, música clásica o música tradicional asturiana, ente otros estilos. Y l’artesanía cuntó tamién col so espaciu nestes fiestes d’El Bollu, cola décima edición de la Feria d’Alfarería Tradicional “Villa d’Avilés”.

A lo último, nel programa d’eventos deportivos d’El Bollu 2019 destacaron el Campeonatu d’España de Rugby de Selecciones Autonómiques Sub-14, que se desenvolvió nel estadiu Muro de Zaro; la XXXII Milla Urbana; el tornéu de Fútbol-8 Prebenjamín, y los trofeos de Natación, Skate y Billar a Trés Bandes, que sigue hasta’l 3 de mayu. El Campeonatu Interterritorial de Taekwondo va poner el broche d’oru a esti programa deportivu’l próximu sábadu 27 nel Complexu Deportivu Avilés.

Tamién te podria gustar