Sigue la confusión alrodiu del centru cultural de Niemeyer n’Avilés

El presidente del Principáu, Vicente Álvarez Areces, afirmó esti llunes 13 que los conteníos del futuru centru cultural diseñáu por Oscar Niemeyer pa la ría d’Avilés tán por definir y que nun va ser namás un espaciu museísticu. Mentantu sigue la polémica entamada pola campaña del equipu de gobiernu municipal d’Uviéu pa ubicar el Muséu de los Premios Príncipe nesa ciudá, el patronatu de la Fundación que preside Graciano García reúnese p’analizar la situación creada alrodiu’l proyectu de Niemeyer.

Areces reconoció ente los micrófonos de Ser Asturies que’l centru cultural diseñáu pol arquitectu brasileiru p’Avilés “nun ye estrictamente un conceptu de museo, sinón que ye un conceptu d’un ámbitu cultural muncho más grande”. Respective a los conteníos d’esi espaciu cultural, el presidente reconoció tamién qu’inda tán por definir: “El Centru Cultural Oscar Niemeyer va tener usos diversos, que van responder a l’ambición del proyectu y vamos definilos como se fai siempre, nun proyectu museolóxicu que desarrolle el conceptu global del centru”, namás que “cuando todo eso estea definío -dixo Areces-, vamos falar con toa la precisión, como se fai en tolos sitios”. El xefe del executivu especificó que los encargaos de definir esos usos diben ser “empreses y consultoríes espertes, que ye lo que se fai en tolos casos que se desarrolla un gran proyectu cultural”, afirmó.

Tocante a les filtraciones de diversos medios respective a la posible desvinculación de la Fundación Príncipe d’Asturies del proyectu agospiáu pol Principáu, tres l’espolín armáu pol Ayuntamientu d’Uviéu, Vicente Álvarez Areces declaró que “nun ye cierto” y que taba “absolutamente convencíu de que la Fundación va participar y colaborar col Principáu nel desarrollu d’esi gran centru cultural”.

Pel so llau el patronatu de la Fundación aconceya esti martes 14 pa estudiar la situación creada y les consecuencies pal futuru de la institución de la polémica armada al respective del proyectu d’Oscar Niemeyer.