Portada Sociedá Sigue desenvolviéndose’l “Setiembre Mitolóxicu” en Samartín

Sigue desenvolviéndose’l “Setiembre Mitolóxicu” en Samartín

by redacción asturnews
Dellos participantes nes xornaes del Setiembre mitolóxicu de Samartín 2015

L’etnógrafu, dibuxante y escritor Alberto Álvarez Peña participó ayeri nes xornaes que Samartín del Rei Aurelio dedica esti mes a la mitoloxía asturiana, y fízolo con una charra na Casona del Bravial de Blimea.

Nella subrayó cómo la mitoloxía foi un saber que se despreció durante munchu tiempu, y al que ta entamando a dase-y valor por tolo que tien d’apegu a la tierra y a la historia real d’un pueblu. Tamién destacó que si eses histories nun se recueyen y se guarden van desapaecer cola xente mayor, polo que ye importante trabayar pol so caltenimientu.

Álvarez Peña nes xornaes del Setiembre mitolóxicu de Samartín 2015

Álvarez Peña nes xornaes del Setiembre mitolóxicu

Otru aspeutu nel que se centró especialmente foi nel paralelismu xeográficu y temporal que se da ente los mitos, de mou qu’en munchos países estremaos y n’époques distintes atópense histories asemeyaes. Tamién fizo referencia a la influencia del cristianismu na mitoloxía y los cambios que se produxeron dende los mitos orixinales a l’actualidá.

Alberto Álvarez Peña ye autor d’abondes obres de temática etnográfica, n’especial sobre la mitoloxía y tradición oral asturiana, con títulos de referencia como “Asturies máxica, un viaxe ilustráu pela mitoloxía asturiana”, ente otres munches. Dende 1996 forma parte de la Fundación Belenos d’Estudios Etnográficos y del conceyu de redaición de la revista “Asturies” editada por esta mesma fundación. Tamién collabora na revista “Entrambasauguas”, editada pola Academia de la Llingua Asturiana, y ye ún de los colaboradores del Salón del Cómic de Xixon. En 2011 algamó’l Premiu Fierro Botas d’ensayu que concede’l conceyu de Xixón pola so obra “Mitoloxía de los santos n’Asturies. Raigaños paganos nel cristianismu”.

El Setiembre Mitolóxicu de Samartín del Rei Aurelio continúa hasta’l día 30 de setiembre, últimu día pa visitar la esposición “Mitos Asturianos” del dibuxante llangreanu Javier Iván Villa Vilchez, muestra que yá se pudo ver na FEMEX y qu’agora ta na Casona del Bravial.

Tamién te podria gustar