Siete colexos van abrir pel branu pala conciliación llaboral n’Uviéu

Siete colexos van abrir pel branu pala conciliación llaboral n’Uviéu
16 mayu 13:14 2018 Imprimir

Siete colexos van abrir esti branu pa favorecer la conciliación llaboral y familiar nel conceyu d’Uviéu. El programa d’apertura de centros escolares en periodu non colectivu de la conceyalía d’Educación llanzó yá la so próxima convocatoria y les families van poder presentar la so solicitú hasta’l próximu 31 de mayu.

Ente’l 25 de xunu y el 31 d’agostu, d’esta miente, los neños y neñes del conceyu van poer allegar a clase mientres los sos padres y madres trabayen. Los centros que participen nesta convocatoria del programa, que nun dexó de crecer desque empezó’l mandatu y que tamién almite alumnáu en Navidá y Selmana Santa, son Baudilio, La Ería, Lorenzo Novo Mier, Parque Infantil, Poeta Ángel González, Veneranda Pumar y Ventanielles.

Mercedes González, conceyala d’Educación, destaca qu’unu de los oxetivos principales ye que los neños y neñes d’ente trés y dolce años puedan cuntar con “un recursu educativu que fomente les conocencies, valor y relaciones colos demás”. Y tamién “garantizar la cobertoria de necesidá d’alimentación a la población infantil en periodu vacacional”, cuidao que puede optase al serviciu d’almuerzu y comedor.

Pa realizar la inscripción, les families (que cunten con una amplia serie de bonificaciones sobro’l preciu de matrícula) puen recoyer les solicitúes nos colexos participantes nel programa, nel  Rexistru Xeneral (calle Quintana, 6), nel Rexistru Auxiliar de La Corredoria (cai Corredoria Alta, 82) o na conceyalía d’Educación (calle Quintana 8). Tol procesu puede realizase tamién de forma telemática al traviés de la páxina web del Conceyu d’Uviéu.

  Categories: