Sidonie programa un segundu conciertu n’Avilés

Sidonie programa un segundu conciertu n’Avilés
26 marzu 10:40 2021 Imprimir

Tres l’acandilante sold out consiguíu na fecha inicial del conciertu de Sidonie nel Teatru Palacio Valdés, la banda catalana y la conceyalía de Cultura d’Avilés alcordaron entamar un nuevu recital. Adelántrase un día la cita, del sábadu 24 d’abril al vienres 23, y cola mesma hora en dambos, a les 19.30 hores.

Una nueva oportunidá para los y les arrezagaes que nun llegaron a tiempu d’adquirir les localidaes na cita orixinal, d’esfrutar de la esclusiva presentación n’Asturies del nuevu y esitosu trabayu de la banda, “El regresu de Abba”.

Les entraes yá s’atopen a la vienta, con precios de 15 a 25 euros, en función del allugamientu nel teatru, nes canales habituales, la taquilla de la Casa de Cultura y la páxina web https://entraes.liberbank.es/palaciovaldes.

Con “El regresu de Abba”, Sidonie, unu de los estandartes del rock n’España, robló un atayante ésitu de crítica y de públicu. Un vibrante álbum, una esplosión de creatividá con 23 cantares roblaos por Marc Ros, inspiraes y concebíes como unu allongamientu del so estrenu lliterariu, la novela homónima.

Novela y discu texen una celebración musical, una esaltación de la vida nel que Ros, Jesús Senra y Áxel Pi, líderes de la banda, se enfundan nos aires del rock, la sicodelia y l’electrónica, col so habitual espíritu hedonista y mediterráneu, ayudaos por collaciu como Kimberley Tell, en llámome Abba”, o Delaporte, en “La mio vida ye la música”.

Un viaxe al traviés de los sentíos, que podrá esfrutase n’Avilés nun directu nel que Sidonie tresfórmase, y entórnase col públicu, al qu’acorica como si fora asistir a una cita íntima cola banda, una sesión na que cimblar coles nueves composiciones y los sos ésitos de siempre, tres más de 20 años de trayectoria.

N’esclusiva p’Asturies y nun escenariu únicu, un Teatru Palacio Valdés con aforu amenorgáu y les garantíes de seguridá sanitaria frente a la pandemia del COVID-19.

  Categories: