‘Shrek’ y ‘El gatu con botes’ quieren volver al cine

‘Shrek’ y ‘El gatu con botes’ quieren volver al cine
09 08:57 2018 Imprimir

Shrek y El gatu con botes van tener nueves versiones de la mano de Chris Meledandri, responsable de la saga Gru. El mio villanu favoritu. Meledandri señaló que la so intención ye caltener a los mesmos actores qu’emprestaron les sos voces a los personaxes nes cintes anteriores (Mike Myers y Antonio Banderes, según Eddie Murphy, qu’encarnó a Donkey).

Según informó esti martes la edición dixital de Variety, l’estudiu Universal Pictures pidió a Meledandri qu’atope nuevos filos narrativos para’l popular ogru y el felín espadachín, qu’hasta agora apaecieron en delles películes de DreamWorks Animation.

“Podría faese una reinvención completa, pero tírame enforma la señardá y quiero volver a eses caracterizaciones”, almitió’l cineasta. “El retu para nós ye atopar daqué que nun paeza a cencielles otra película más d’una serie de remortines”, amestó. Esta decisión llega dempués de la compra de DreamWorks Animation per parte de Comcast en 2016, una operación por valor de 3.800 millones de dólares.

La saga Shrek ta compuesta por cuatro películes: Shrek (2001), Shrek 2 (2004), Shrek terceru (2007) y Shrek: Felices para siempres… (2010). Más palantre llanzóse’l filme deriváu El gatu con notes (2011), coles voces d’Antonio Banderes y Salma Hayek. Eses cintes recaldaron más de 3.500 millones de dólares en tol mundu.

  Categories: