Sesenta entidaes participaron na II Feria Avilesina d’Asociaciones (FAVA)

Sesenta entidaes participaron na II Feria Avilesina d’Asociaciones (FAVA)
23 abril 11:24 2018 Imprimir

Esti sábadu 21 d’abril tuvo llugar na plaza de los Hermanos Orbón la segunda edición de la Feria Avilesina d’Asociaciones (FAVA). Los puestos informativos de les entidaes y asociaciones presentes tuvieron muncha asistencia y amosaron l’ésitu de la cita.

Tres de la primer edición, celebrada nel Centru Sociu-Cultural de Los Canapés con una participación de 54 entidaes, nesta ocasión foron 60 les asociaciones avilesines que visibilizaran el so trabayu, non yá atendiendo a la ciudadanía al traviés de los distintos puestos informativos, sinón tamién por aciu un programa d’actividaes variaes. A elles sumáronse otres entidaes ensin puestu informativu pero tamién collaboradores cola II FAVA y con delles de les asociaciones presentes.

Esta iniciativa, que surdió nel senu de los 4 Conseyos de Participación de Zona nos que s’estrema la ciudá, ta impulsada y coordinada pol Conceyu d’Avilés. Tien ente los sos oxetivos dar a conocer a tola ciudadanía’l llabor que desenvuelve caúna de les entidaes presentes nel conceyu.

Coles mesmes, pretendi ser un puntu d’alcuentru, d’intercambiu d’esperiencies ente toles persones que participen ya implíquense en caúna de les entidaes tolos díes del añu, y qu’inciden n’ámbitos como l’asociativu-vecinal, cultural, deportivu, sociosanitariu, o l’educativu, ente otros.

L’ampliu programa d’actividaes de la Feria tuvo compuestu por actuaciones musicales, teatrales, baille, xuegos infantiles y talleres, ente otros. La primer edición de FAVA cuntó cola asistencia de más de 300 persones que se superaron enforma nesta ocasión.

  Categories: