Seis poetes enfrenten un combate de poesía na primer final del Poetry Slam d’Avilés

Seis poetes enfrenten un combate de poesía na primer final del Poetry Slam d’Avilés
10 mayu 10:19 2019 Imprimir

Un combate de poesía al atapecerín con seis poetes, muyeres y homes, que van enfrentase esti domingu, 12 de mayu, a les 19 hores na Antigua Plaza del Pexe. pa dirimir el ganador de la primer final del Poetry Slam d’Avilés, entamáu pola conceyalía de Mocedá.

Poetry Slam ye un formatu de competición de poesía oral, nel que van participar seis poetes que más puntuación llograron nesta temporada n’Avilés: Ángel Cuesta, Paula Sotu, Nadaya, Mariano J. Sánchez, Aida Septum y Eduardo Carreteru.

La gran final foi presentada esta selmana por Raquel Ruiz, conceyala de Mocedá d’Avilés, xuntu al coordinador de Poetry Slam n’Avilés, Daniel Arévalo. Sorrayó la conceyala cómo la poesía “recupera presencia y gana llectores ente’l públicu nuevu, y adquier cada vez mayor relevancia como forma d’espresión”.

Formatos como’l Poetry Slam, nacíu nos Estaos Xuníos nos años 80 y que güei se celebren por tol mundu, añedir un componente nuevu a la poesía: alloñada de corsés, recítense les creaciones como xuna competición, al estilu de los combates de boxéu.

Na final,  va haber dos rondes, ensin eliminatoria, porque van cuntar tolos puntos llograos, y nun va poder usase nin música nin atrezo. Va disponese de trés minutos pa la so esposición, de poemes que tendrán de ser orixinales ya inéditos (nun pueden habese recitao na temporada de Poetry Slam), y de pasar esi tiempu va suponer penalización y en casos estremos, la descalificación. Recitar de memoria va dar mediu puntu extra.

El xuráu va tar compuestu por cinco persones del públicu, nunca familiares nin amigos o conocíos de los participantes. Les puntuaciones van ser de 0 a 10, y van poder incluyir decimales. En casu d’empate nel primer puestu, va ganar quien llograra la meyor puntuación na segunda ronda.

Esta final va tener convidaos especiales. Asina, Ignacio Perini, subcampeón del Petry Slam d’Arxentina 2016, va recitar dalgunos de los sos poemes. Y el dúo poéticu-musical ArPaSía, formáu por Armando Vega y Paula Sotu, va poner el contrapuntu musical.

N’Avilés, los poetes Dani Modro y Rufino García entamaron les cuatro primeres ediciones del Poetry Slam, un formatu qu’en 2017 tornó a la ciudá de la mano de Daniel Arévalo. Duelos a versos que van tener llugar esti domingu, 12 de mayu, a les 19 hores na Antigua Plaza del Pexe. Quien venza va representar a la ciudá na final estatal, en septiembre en Valladolid.

  Categories: