Secretu a dos voces

08 xunu 03:07 2005 Imprimir

Una llamativa sorpresa y toa una novedá de lliteratura arriesgada ye la obra que’l valencianu Josep Carles Laínez (Valencia, 1970) acaba de publicar “Lenta lletanía del cuerpu nel hedreru”(Academia de la Llingua,2005), un conxuntu de poemes a dos voces que s’articula alredor d’un xuegu lliterariu de ficción sobro una muyer hispano-romana de la que namás se sabe’l nome y qu’esistió alrodiu’l sieglu I-II. Una llábana afayada en Caudiel, el pueblu natal de Laínez, conviertese nel puntu de partida d’esti llibru esperimental escritu, como otres obres d’esti autor plurillingüe, n’asturianu, y que traza al traves de dos voces una hestoria nebulenta de pasiones y deseos tapecíos embaxo la capa borrosa del misteriu.
Como singularidá y col fin de remarcar la diferencia de voces, los textos nos que fala’l personaxe poeticu coincidente cola voz del autor, apaecen n’asturiano central y los poemes nos que se siente la voz de Cynthia Surula, na variante occidental, dalgo que’l mesmu Laínez desplicaba recientemente nuna entrevista: “el dialectu occidental del asturianu siempre me paeció una forma llingüística remota y como misteriosa, dalgo que me paeció encaxaba bien cola voz d’esa muyer que fala dende’l misteriu”.

Un secretu a dos voces

Como parte fundamental y articuladora de la ficción que s’establez al traves de los poemes, inclúinse tres apendices nos que s’ufierten la versión orixinal de los fragmentos conservaos d’una supuesta carta d’amor escrita por Cynthia a un home o a una muyer, una versión “lliteraria” d’esa epístola, y unes anotaciones de diariu escrites pol propiu Laínez nel so llugar de Caudiel.
A lo llargo del llibru, embaxo los poemes ufiertense notes a pie de páxina apócrifes con referencies a la figura imaxinaria de C. Surula, col fin d’afondar na construcción de la
hestoria ficcionalizada.
Amás d’un conxuntu de poemes emocionantes y lluminosos, nos que suena la voz clara de les fontes de la lírica primitiva griega: “Paso las manos porriba de la carne que nun yía carne en ti;/yía’l soníu la inesistencia de lo que mienten las sílabas;/de la nacencia qu’añera, del trubiecu avieyáu de las mañanas”, amás de too eso y d’un llibru que se puede lleer como una autentica novela desenvuelta en poemes y fragmentos, “Lenta lletanía del cuerpu del hedreru” de Josep Carles Laínez ye una brisa fresca y misteriosa nel panorama poeticu en llingua asturiana, onde les voces de tonu testimonial.

  Categories:
Loading Facebook Comments ...