Sociedá La defensa del asturianu provoca’l segundu desalcuentru en diez díes de los socios de Gobiernu by asturnet 16 de setiembre, 2004 La llingua asturiana afitáse como’l principal motivu de desavenencia ente los tres partíos que gobiernen el Principáu. La conseyera de Cultura, la socialista Ana Rosa Migoya, censura al so compañeru d’Executivu Francisco Javier García Valledor (Izquierda Xunida-Bloque por Asturies) por unvia-y una carta al ministru d’Esteriores na que reclama l’usu oficial del asturianu n’Europa. El PSOE reitera que la oficialidá nun ta ente les sos prioridaes. Poco depués que Valledor asoleyara ayeri la so misiva al titular d’Asuntos Esteriores, Miguel Ángel Moratinos, carta que’l conseyeru de Xusticia entiende “dientro de les sos competencies” y na que pide la reconocencia europea del asturianu como una cuestión de drechos fundamentales, Migoya desmarcóse del unvíu precisando que l’asuntu nun se trató en Conseyu de Gobiernu y, amás, los términos qu’emplega Valledor “nun s’axusten a la realidá del Estatutu d’Autonomía”. Nuna comparecencia na qu’asoleyó a les clares la so disconformidá cola iniciativa de García Valledor, la conseyera de Cultura insistió en que’l llabor del Gobiernu’l Principáu ye “informar” al ministru del marcu estatutariu d’Asturies, y non empobina-y comunicaciones que, como la del conseyeru de Xusticia y n’opinión de Migoya, puen conducir a “error”. Acordies con esi argumentu, el PSOE reitera que la oficialidá de la llingua asturiana nun ta na so axenda de prioridaes, y llánza-y un toque d’atención a los sos socios de Gobiernu nel que ye’l segundu incidente con tresfondu llingüísticu qu’enfrenta a los tres partíos del Executivu nos últimos diez díes. En viéspores del Día d’Asturies, cellebráu el pasáu 8 de setiembre, tanto Izquierda Xunida como’l Bloque por Asturies acusaron con firmeza a los socialistes d’amosar falta d’interés y sensibilidá p’hacia l’asturianu, depués d’editar namás en castellán tola propaganda institucional de les cellebraciones y rectificar ‘in extremis’ cola edición de parte de la cartelería n’asturianu. 16 de setiembre, 2004 0 FacebookTwitterPinterestEmail
Sociedá L’Ayuntamientu d’Uviéu ignora dos peticiones de les mocedaes socialistes pa potenciar l’asturianu by asturnet 15 de setiembre, 2004 Dos cartes ensin rempuesta. Les Mocedaes Socialistes d’Uviéu mantiénense entá a la espera de recibir una contestación a sendes peticiones cursaes énte l’Ayuntamientu de la ciudá en febreru y mayu pasáu, nes que-y reclamaben al Consistoriu una normalización llingüística planificada pa recuperar y dignificar la llingua nel conceyu. Asina lo afirma’l secretariu xeneral de les Mocedaes Socialistes d’Uviéu, David Rodríguez, pa quien los militantes más mozos del PSOE asturianu “ya tienen asumida” la reivindicación de la coficialidá na prósima reforma del Estatutu d’Autonomía. “Cada vez hai más xente a favor dientro’l partíu, anque tovía nun somos mayoría”, asegura Rodríguez. Les Mocedaes Socialistes d’Uviéu entamaron esti mediudía una simbólica clase de llingua asturiana al aire llibre, nún de los puestos allugaos na cai San Francisco con ocasión de les fiestes de Samatéu. N’opinión de los militantes más mozos del PSOE uvieín, “la difusión del asturianu debe ser una prioridá de toles instituciones”, un xuiciu que nun comparte na práctica un sector de cabezaleros de la Federación Socialista Asturiana. Pesie a pesllar con una breve cita n’asturianu el so discursu institucional nel actu d’entrega de les Medalles d’Asturies, cellebráu el pasáu 7 de setiembre n’Uviéu, el presidente autonómicu, el socialista Vicente Álvarez Areces, manifestara pocos díes antes la so apuesta por postergar la coficialidá de la llingua asturiana “pa nun reforzar lo que nos separa de los demás”. Francisco Llera retrúca-y a Areces qu’apostar poles señes d’identidá “refuerza la España plural” 15 de setiembre, 2004 0 FacebookTwitterPinterestEmail
Sociedá Venticinco núcleos de población dispútense’l Premiu al Pueblu Exemplar d’Asturies by asturnet 13 de setiembre, 2004 Venticinco candidatos. El premiu al Pueblu Exemplar d’Asturies na so edición de 2004, que concede la Fundación ‘Príncipe de Asturias’ y col qu’esta entidá quier galardonar a una comunidá destacada nel llabor n’andecha, otorgaráse a partir d’una llista d’aspirantes na que figuren pueblos o comunidaes de venti conceyos. El galardón pesllará’l xueves los fallos de los xuraos de la Fundación ‘Príncipe’ darréu de la concesión, mañana, del galardón na estaya de Deportes. Concebíu pa premiar al pueblu, aldega, núcleu de población o grupu humanu destacáu na defensa’l so entornu o patrimoniu, o na fechura de notables obres en comuña, el premiu al Pueblu Exemplar d’Asturies podrá dir a parar esti añu a dalgún puntu xeográficu ente Valdés y Peñameyera, o bien al únicu grupu humanu ‘desllocalizáu’ que concurre al galardón, los responsables de les asociaciones de criadores de ganao de les races Asturiana de los Valles y Asturiana de la Montaña. Nel oriente, destaquen les candidatures de los pueblos de Tazones (Villaviciosa), Cabrales, Tereñes (Ribesella), La Piñera (Piloña) y Alles (Peñameyera Alta), mientres que na franxa occidental opten al premiu, ente otros candidatos, el collectivu humanu de Cuideiru, el núcleu de Vil.lar de Vildas (Somiéu) y les parroquies de Somao (Muros) y Rubiano (Grao). No que cinca al centru, son aspirantes la ciudá de Llugones, la comunidá de vecinos de la zona rural de Xixón, los Humanitarios de San Martín (Ayer), el pueblu uvieín de Priañes, el núcleu d’Insiertu (Mieres) y la villa de Ciañu, en Llangréu. El premiu al Pueblu Exemplar d’Asturies, que se concede dende 1990, correspondió-y l’añu pasáu a Navelgas. El xuráu que va concedelu aniciará la so xuntanza el mesmu xueves, poques hores antes d’asoleyar el fallu nel hotel Reconquista, n’Uviéu. Web de la Fundación ‘Príncipe de Asturias’ 13 de setiembre, 2004 0 FacebookTwitterPinterestEmail
Sociedá La Xunta de Toponimia revisa los nomes de llugar de Llanes, na so primer reunión fuera d’Uviéu by asturnet 13 de setiembre, 2004 La Xunta de Toponimia viaxa a Llanes. L’organismu asesor, ensertáu nel organigrama de la Conseyería de Cultura, Comunicación Social y Turismu, cellebró güei nesa villa del Oriente la so primer xuntanza de trabayu fuera d’Uviéu, col envís d’acabar de revisar los nomes de llugar de Llanes y la participación de dos altos cargos del Principáu: los directores xenerales de Política Llingüística, Carlos Madera, y d’Alministración Llocal, Valentín Ruiz. El primeru d’ellos preside la Xunta acordies cola regulación por llei d’esi organismu, mientres que Ruiz, qu’ocupa una de les vocalíes tamién por mandáu llegal, tomó parte tamién d’una comparecencia pública posterior a la reunión de la Xunta, la primera convocada espresamente p’asoleyar el llabor d’esti organismu asesor dende la so puesta en marcha, hai agora cuatro meses. Nesi periodu de tiempu, la Xunta Asesora de Toponimia del Principáu d’Asturies recibió les solicitúes de doce conceyos que quieren recuperar a tolos efectos los sos nomes tradicionales de llugar n’asturianu. Los primeros dos espedientes, los correspondientes a Carreño y El Franco, yá tán remataos, mientres que’l de Llanes pesllaráse na xuntanza de güei y l’informe sobro L.lena podría empezar a iguase tamién na xuntanza d’esta mañana. Si ye asina, entá quedarán pendientes les peticiones d’otros ocho municipios: Mieres, Casu, Llangréu, Xixón, Castrillón, Ayer, Siero y Gozón. Nesi procesu nun participará L’Academia de la Llingua, qu’ayeri tuvo ausente por primer vegada nes reuniones de la Xunta de Toponimia y que yá anunciara, tal como adelantó Asturnews el pasáu 19 d’agostu, el so distanciamientu del organismu al considerar que’l llabor que-y correpuende nél “ya ta fechu y plasmáu” nel nomenclátor de conceyos, parroquies, pueblos y llugares editáu pola institución académica nel añu 2000. Acordies con esi plantegamientu, l’alcaldesa de Xixón, la socialista Paz Fernández Felgueroso, y la presidenta de L’Academia, Ana Cano, firmaron el pasáu xueves un conveniu pol que la entidá académica comprométese a asesorar al Consistoriu particularmente nel bon usu de los topónimos del conceyu. La Xunta de Toponimia podrá elevar al Gobiernu los primeros informes definitivos a partir d’ochobre 13 de setiembre, 2004 0 FacebookTwitterPinterestEmail
Sociedá L’encarecimientu de la cultura provocó una xubida de los precios n’agostu by asturnet 9 de setiembre, 2004 El veranu disparó los precios de la cultura n’Asturies. Según asoleyó esta mañana l’Institutu Nacional d’Estadística, les tarifes de los bienes y servicios culturales medraron un 1,7 por cientu n’agostu y tiraron p’hacia arriba del Índiz de Precios de Consumu (IPC) nel Principáu, que rexistró un discretu aumentu de los precios de mediu puntu respecto al mes de xunetu motiváu tamién pol encarecimientu de les tarifes nel tresporte y na hostelería. La xubida rexistrada n’agostu na estaya d’ociu y cultura afita un crecimientu de los precios nesi sector entamáu yá con fuercia en xunetu, mes nel que los precios yá aumentaren un puntu, y dexa la inflación acumulada de los productos y servicios culturales -perda progresiva del valir alquisitivu de les perres no que va d’añu, manifestada na xubida de los precios- nun 1,4 por cientu. Ensin embargu, mercar cultura sigue siendo agora más barato qu’hai un añu, yá que l’indicador de la inflación interañal amuesa que los precios n’ociu y cultura yeren un 1 por cientu más baratos al acabar agostu en rellación al mesmu mes de 2003. De fechu, la estaya cultural ye la única, xunta les comunicaciones, na que los precios baxaron n’Asturies nos últimos doce meses. Con calter xeneral, l’Índiz de Precios de Consumu medró nel Principáu un 0,5 por cientu nel mes d’agostu, mientres que la inflación acumulada allúgase nel 1,4 por cientu y la interañal elévase al 3,1 por cientu. Datos completos na web del INE 9 de setiembre, 2004 0 FacebookTwitterPinterestEmail
Sociedá L’Academia recláma-y al rector una edición billingüe de los Estatutos de la Universidá by asturnet 9 de setiembre, 2004 Na Universidá ta “casi too por facer” na promoción del asturianu; “malpenes ta la secha abierta”. Por esa razón y con esi argumentu, la presidenta de L’Academia de la Llingua, Ana Cano, reclamó-y esta tarde al rector, Juan Vázquez, una edición billingüe -y non estremada- de los Estatutos de la Universidá. El rector retruca que na entidá “tán faciéndose coses” pola llingua asturiana. La demanda de Cano, que pidió espresamente un volume estatutariu únicu qu’incluya les versiones n’asturianu y castellán y no ediciones separtaes de dambes versiones, como planea la Universidá, completóse cola reivindicación de que la entidá universitaria emplegue con mayor profusión l’asturianu na retulación, nos sos documentos y nes sos publicaciones, yá que, sostién la presidenta de L’Academia, la comunidá universitaria amuesa “sensibilidá” p’hacia l’usu de la llingua asturiana. Sentáu a escasos centímetros de Cano, el rector, que presidía nel Aula Magna de la Universidá la entrega de diplomes a los 150 alumnos de los XXII Cursos de Branu de L’Academia -tres d’ellos acoyíos al programa d’Estensión Universitaria-, respondió que la Universidá “ta faciendo coses pol asturianu, que tien que formar parte d’ella” y asoleyó como argumentu la prósima edición de los estatutos en llingua asturiana, que na so opinión supón un simbólicu “gran pasu alantre”. Juan Vázquez, que comprometió la so presencia na inaguración de la prósima edición de los Cursos de Branu, xustificó amás el so argumentu na “consolidación” del títulu propiu que la Universidá ufierta en Llingua Asturiana y felicitóse del doble valir de los monográficos cellebraos en Santantolín d’Ibias na primer quincena d’agostu, porque, afirmó, “tuvieron un elementu d’aprendizaxe, pero tamién de convivencia”. Más d’un cientu d’alumnos corrompinaron l’Aula Magna pa recibir los sos diplomes, correspondientes a seis cursos: ún elemental y otru avanzáu de Llingua Asturiana, ún de torna al asturianu, ún de patrimoniu, un quintu d’ecoloxía y, a la fin, un cursu de capacitación en gallego-asturiano. Al actu asistieron, amás de Cano y Vázquez, la vicerrectora d’Estensión Universitaria, Paz Andrés, y el director de los cursos, l’académicu Xosé Antón González Riaño. 9 de setiembre, 2004 0 FacebookTwitterPinterestEmail
Sociedá La presidenta de L’Academia alita a los conceyos a siguir l’exemplu de Xixón na política llingüística by asturnet 8 de setiembre, 2004 Los conceyos que quieren promover l’usu de la llingua asturiana bien puen mirase nel espeyu de Xixón. La presidenta de L’Academia de la Llingua Asturiana, Ana Cano, sostuvo güei esi argumentu na firma d’un conveniu cola alcaldesa de la ciudá, la socialista Paz Fernández Felgueroso, qu’alitará una mayor presencia del asturianu na vida municipal y nel que Cano ve que l’Alministración llocal va más rápido que l’Autonómica na normalización llingüística. O dicho n’otres pallabres, tamién de la presidenta de L’Academia, la sociedá civil va per delantre de les instituciones na promoción y usu de la llingua asturiana, nun contestu nel que, insistió Cano, el reconocimientu de la coficialidá ye cada vez más imperativa y “lo contrario ye pura retórica”. Ana Cano firmó esta mañana nel Ayuntamientu de Xixón un conveniu que tien vixencia pa 2004 -pero prorrogable añalmente- y cuyes aplicaciones práctiques resumió l’Alcaldesa nel asesoramientu na retulación de topónimos nos indicadores viales, el conseyu académicu nel usu cotidianu del asturianu na vida municipal, la inclusión de L’Academia nel conseyu asesor de la Oficina Municipal de la Llingua y la presencia de miembros de la institución nos xuraos de premios lliterarios entamaos pol Consistoriu xixonés. Pol so llau, la conceyala delegada d’Educación, Carmen Rúa (Izquierda Xunida-Bloque por Asturies), artífice del conveniu xunta la directora de la Oficina de la Llingua, María Xosé Rodríguez, comprometióse a mirar pol cumplimientu del alcuerdu y evitar que’l testu firmáu esta mañana “seya papel moyao”. 8 de setiembre, 2004 0 FacebookTwitterPinterestEmail
Sociedá Xixón da-y un impulsu al usu municipal del asturianu con un conveniu ente l’Ayuntamientu y L’Academia by asturnet 7 de setiembre, 2004 Completar la retulación n’asturianu de topónimos na rede viaria, alitar publicaciones en llingua asturiana y supervisar la ‘visibilidá’ d’esi idioma nel conceyu más populosu d’Asturies. A too ello quier contribuyir de forma decisiva el conveniu que l’Ayuntamientu de Xixón y L’Academia de la Llingua Asturiana firmarán mañana nel Consistoriu xixonés, pactu qu’abre un nuevu escenariu municipal de posibilidaes pal espoxigue efectivu del usu del asturianu. L’alcaldesa de Xixón, la socialista Paz Fernández Felgueroso, y la presidenta de L’Academia, Ana Cano, tienen previsto rubricar un alcuerdu que-y dea puxu a la promoción y dignificación ‘dende arriba’ del emplegu de la llingua asturiana a tolos niveles, d’aplicación tanto nel cascu urbanu como na zona rural y como desendolcu de la Llei d’Usu y Promoción, aprobada hai agora seis años. Com primeros resultaos concretos del pactu, L’Academia de la Llingua asesorará directamente al Consistoriu n’asuntos de toponimia, participará nos xuraos de los premios lliterarios convocaos pol Ayuntamientu p’alitar la creación n’asturianu y dará-y una atención especial a Xixón na difusión de les sos actividaes editoriales, formatives y culturales. Nel so llabor, L’Academia trabayará coldu a coldu cola Oficina Municipal de la Llingua de Xixón, organismu qu’echó a andar en xineru pasáu y qu’acumula una llarga llista de tornes al asturianu yá realizaes tanto pa servicios municipales como pa empreses y particulares. Col conveniu ente Ayuntamientu y Academia, Xixón afítase como la punta de llanza de la eclosión a nivel municipal de la promoción de la llingua asturiana, yá qu’amás prevé tener ellaboráu antes de fin d’añu un estudiu sociollingüísticu dirixíu pol caderalgu Francisco Llera Ramo que, según adelantó Asturnews, basaráse en 600 entrevistes y permitirá asoleyar los primeros resultaos nel mes d’ochobre. L’estudiu sociollingüísticu de Xixón basaráse en 600 entrevistes y tará llistu pa fin d’añu 7 de setiembre, 2004 0 FacebookTwitterPinterestEmail
Sociedá PAS y URAS estrenen el so proyectu común d’asturianía evocando a Pelayo como artífice d’Europa by asturnet 7 de setiembre, 2004 Lo asturiano, primero; el frenu a la emigración por motivos llaborales, envís prioritariu; Don Pelayo, artífice de la Europa d’anguaño. Con esi ideariu básicu estrenaron güei en públicu el Partíu Asturianista (PAS) y la Unión Renovadora Asturiana (URAS) el so proyectu políticu en comuña, qu’anunciaron como antídotu a la “humillación continua” a la que someten a Asturies los partíos “centralistes” al despreciar les sos señes d’identidá. Nuna ofrenda floral al caudillu Don Pelayo materializada na estatua allugada na xixonesa plaza’l Marqués, los presidentes del PAS y la URAS, Xuan Xosé Sánchez Vicente y Sergio Marqués, respectivamente, presentaron la so confluyencia d’intereses como una ufierta “d’asturianía” empobinada a los ciudadanos “qu’entienden que hai dalgo más que facer que permanecer a la espectativa”. A la solombra del monumentu a Pelayo, que Sánchez Vicente reivindicó como inagurador d’Asturies como realidá política y al mesmu tiempu creador de la Europa d’anguaño, el cabezaleru asturianista fizo un llamáu a qu’Asturies vuelva ser “un país importante” y alitó a evitar “que los nuesos fíos nun tengan que salir corriendo a buscar el pan fuera”. Un argumentu nel qu’insistió Marqués, ex presidente autonómicu col PP y cabezaleru del desalcuentru con Francisco Álvarez-Cascos que derivó na creación d’URAS como escisión de los conservadores, sorrayando’l calter pioneru de Pelayo -“qu’empezó esti maraviellosu suañu”- y destacando que la nueva xuntanza política pondrá l’amor por Asturies “penriba de tolo demás”. L’homenaxe a Pelayo con ocasión del 8 de Setiembre abrió esta mañana yá dafechu les puertes al nacimientu d’una nueva opción política asturianista, que Marqués anunció “sosegada” y que concretará les cuestiones de denominación, programa y llideralgu nos prósimos meses. 7 de setiembre, 2004 0 FacebookTwitterPinterestEmail
Sociedá Valledor asegura que’l puxu de la identidá asturiana na reforma estatutaria ye una carrera “de fondu” by asturnet 7 de setiembre, 2004 “Una prueba de fondu, non de velocidá”. Asina interpreta’l conseyeru de Xusticia, Seguridá Pública y Relaciones Esteriores, Francisco Javier García Valledor, la definición del puxu final de les señes d’identidá d’Asturies nel procesu de reforma autonómica qu’entama a nivel estatal. Valledor participó güei na cellebración del 8 de Setiembre qu’Izquierda Xunida-Bloque por Asturies organizaron en Xixón al marxe’l so sociu nel Gobiernu’l Principáu, el PSOE. Nel “debate ampliu” que s’avecina, sostién el conseyeru de Xusticia, fai falta buscar un consensu lo más ampliu posible, en particular pa garantizar la declaración del asturianu como llingua coficial na inminente reforma del Estatutu d’Autonomía, reivindicación que pol momentu namás plantega IX-BA d’ente los tres grupos políticos con representación na Xunta Xeneral y capacidá final de decisión al respectu. Magar del silenciu que PSOE y PP mantuvieron sobro la llingua asturiana nos sos discursos del Plenu institucional del Día d’Asturies, cellebráu ayeri n’Uviéu, Valledor interpreta que tala omisión amuesa que nun hai una oposición esplícita a la coficialidá por parte de socialistes y populares, polo que, entiende’l conseyeru, “ábrese’l camín al diálogu pa poder avanzar”. Baxo’l lema ‘Un estatutu pa un país dende la izquierda’, Izquierda Xunida-Bloque por Asturies entamó les sos cellebraciones estremaes del 8 de Setiembre nel parque xixonés de Los Pericones con una espicha, xuegos pa neños, bailles tradicionales y l’actuación de la intérprete de tonada Mari Luz Cristóbal Caunedo. Uviéu foi otru de los escenarios de les conmemoraciones del 8 de Setiembre. La formación Andecha Astur cellebró una manifestación y una espicha na ciudá col lema central ‘Asturies tamién tien drechos’. Izquierda Asturiana, pol so llau, escoyó’l conceyu de Piloña pa realizar la so espicha conmemorativa. 7 de setiembre, 2004 0 FacebookTwitterPinterestEmail