Sociedá Cola futura llei de llingües del Estáu ábrese un camín a la esperanza pal asturianu by asturnet 11 d'ochobre, 2004 Roberto González-Quevedo, secretariu de l’Academia de la Llingua, representó a la institución asturiana nel aconceyamientu del pasáu 8 d’ochobre en Barcelona, nel que miembros de los diversos organismos lingüísticos del estáu se xuntaron pa poner en común les necesidaes esistentes nesta materia a nivel español. Nun foru paralelu asistieron representantes políticos de les comunidaes con idioma propiu, cola escepción del gobiernu asturianu. En declaraciones a Asturnews, l’académicu González-Quevedo amosóse contentu y enfotáu nos resultaos d’esi alcuentru inicial ente instituciones lingüístiques del estáu. Nel aconceyamientu, el representante asturianu pudo esponer la situación real del nuestru idioma, l’únicu de los presentes nel foru que nun ye oficial. “Hubo un fondu interés ente los representantes de les otres comunidaes pa col casu d’Asturies”, afirmó González-Quevedo. Un casu que nes sos propies palabres “ya yera conocíu en bona parte polos asistentes al alcuentru”. Un de les pretensiones d’esti foru ye la de puxar por una llei xeneral de les llingües del estáu y participar de manera activa na so ellaboración. Según informó nel alcuentru el Conseller en Cap de la Generalitat de Cataluña, Josep Bargalló, organizador del foru, esiste un compromisu seriu de la vicepresidenta del gobiernu central Teresa de la Vega y del propiu executivu que preside Rodíguez Zapatero p’agospiar esta llei qu’asegure’l futuru de la diversidá idiomática a nivel d’estáu. La mesma Teresa de la Vega tenía previsto asistir al alcuentru, según l’asturianu Roberto González-Quevedo, inda compromisos d’última hora impidiéron-ylo.En paralelo al foru llingüísticu entamóse un conceyu de representantes políticos de los gobiernos autonómicos. A esti alcuentru nun asistión nengún representante de l’administración asturiana. Asturies foi xunta la comunidá valenciana -que tampoco unvió representate llingüísticu- l’únicu territoriu con llingua propia ausente del foru. 11 d'ochobre, 2004 0 FacebookTwitterPinterestEmail
Sociedá La llingua asturiana tará presente de forma cimera nel Congresu de CCOO d’Asturies by asturnet 9 d'ochobre, 2004 Comisiones Obreres d’Asturies cellebrará nel mes d’Avientu’l so Novenu Congresu y la llingua asturiana tará presente dafechu dende la mesma Ponencia Sindical que ya se ufierta nel so sitiu web dafechamente n’asturianu pa que seya estudiada polos afiliaos y puean presentar enmiendes a la mesma, tanto de manera parcial como total. El Congresu de Comisiones va desendolcase los díes 15, 16 y 17 del mes d’Avientu y a lo llargo d’estos díes vienen cellebrándose les asamblegues sectoriales ya territoriales del sindicatu pa escoyer a los delegaos. El Congresu de CCOO d’Asturies tendrá l’asturianu como referente cimeru del so desendolcu congresual como ya asocediere hai cuatro años nel congresu anterior. D’esta mena, los documentos cimeros del Congresu tendrán otra vuelta una versión n’asturianu al tiempu que en Castellán afitando l’emplegu normalizáu de la llingua de nueso. Comisiones Obreres d’Asturies vien siendo un exemplu nidiu de compromisu col emplegu del asturianu tanto nes sos actividaes, cartafueyos, ya publicaciones, como nos desendolcos congresuales. 9 d'ochobre, 2004 0 FacebookTwitterPinterestEmail
Sociedá Espertos de tol estáu van tratar en Xixón de les redes municipales nel desenvolvimientu llingüísticu by asturnet 6 d'ochobre, 2004 Especialistes en normalización llingüística d’Aragón, Cataluña, País Vascu, Galicia y Valencia van xuntase en Xixón pa debatir el papel de los conceyos nel desenvolvimientu social de los idiomes minorizaos. Xunto a ellos, axentes implicaos na normalización de la llingua asturiana van tratar d’afondar na problemática y soluciones pal nuestru idioma nes administraciones municipales. Les xornaes van celebrase los díes 15, 16 y 17 de Payares, organizaes pola Oficina Muncipal de la Llingua del Ayuntamientu de Xixón. Les I Xornaes sobre la Normalización Llingüística nos Conceyos van desenvolvese nel Centru de Cultura Antigu Institutu en sesiones de mañana y tarde. Les mañanes van tar dedicaes a amosar les distintes esperiencies que se vienen faciendo en cinco comunidaes autónomes con idioma propiu y nes sesiones de la tarde trataráse específicamente’l casu asturianu. La primer sesión va desarrollase’l 15 d’ochobre na sala conferencies del CCAI cola ponencia del valencianu César Mateu i Beltrán titulada “El serviciu de Dinamización Llingüística d’Almassora, una esperiencia en rede”. Esa mesma mañana Socorro García Conde, del departamentu de llingua gallega del conceyu de Santiago, va lleer la so aportación a les xornaes col títulu: ‘La esperiencia del Serviciu Llingüísticu del Conceyu de Santiago: L’aprovechamientu de les redes”. Les esperiencies normalizadores del País Vascu y Aragón van conocese na sesión de mañana del día 16 cola ponencia ‘Patronatu Municipal d’Euskera, 17 años na normalización en Donostia-San Sebastián’, presentada pol conceyal delegáu de Cultura y Euskera del ayuntamientu donostiarra, Ramón Etxezarreta Aizpuru; darréu va ser Franco Nagore Laís, vicedireutor del Institutu d’Estudios Altoaragoneses el que llea la so comunicación: ‘Aspeutos de la normalización y normativización del aragonés’. La última de les sesiones dedicada a les esperiencies de dinamización llingüística va dar a conocer na mañana del día 17 la esperiencia catalana: ‘La normalización llingüística en Barcelona: Ente una metodoloxía clásica y los nuevos retos’ de Toni Mataix Ubach, del Centre de Normalización Lingüística de Barcelona, y va cerrar el ciclu María Xosé Rodríguez cola ponencia: ‘La Oficina municipal de la Llingua de Xixón: un añu faciendo camín pola normalización llingüística’. La situación específica del asturianu va tratase nes sesiones de tarde. El día 15 el profesor de Derechu administrativu de la Universisá d’Uviéu, José Manuel Pérez Fernández va presentar la ponencia ‘Normalización y Administración nos conceyos’. La sesión del día siguiente va tratar el tema ‘Normalización y ciudadanía’, con Dolfo Camilo Díaz como ponente y la última na tarde del día 17, el responsable de Política Llingüistica del Principáu, Ramón d’Andrés va falar de ‘La rede de normalización llingüística nos conceyos d’Asturies’. Les comunicaciones d’estes sesiones enfocaes al casu asturianu van debatise en meses redondes nes que van participar especialistes del ámbitu institucional y de los movimientos sociales pola defensa de la llingua. 6 d'ochobre, 2004 0 FacebookTwitterPinterestEmail
Sociedá Les Xornaes Internacionales d’Estudiu de l’Academia de la Llingua ufren un completu programa de conferencies especializaes by asturnet 5 d'ochobre, 2004 David Heap, de la Universidá de de Western Ontario, nos Estaos Xuníos y Paquita Suárez Coalla, de la City University of New York, van ser como adelantara n’Agostu Asturnews los espertos cimeros de les XXIII Xornaes Internacionales d’Estudiu que va desendolcar nesti mes d’ochobre de 2004 l’Academia de la Llingua Asturiana. Les Xornaes d’estudiu van tener llugar n’Uviéu los díes 25, 26 y 27 d’ochobre y van cuntar cola participación de munchos otros espertos como Emilio Ridruejo, Carmen Muñiz, Roberto González-Quevedo y el direutor d’Asturnews, Próspero Morán, ente otros. El profesor de la Universidá de de Western Ontario David Heap va falar nes Xornaes sobro “Las encuestas del ALPI para Asturias” y Paquita Suárez Coalla de la City University of New York va disertar alrodiu de “La experiencia de la escritura dende dos llinguas marxinadas: l’asturianu y el castellanu”. Na programación de les xornaes, amás d’estes conferencies tan previstes otres del académicu de la llingua asturiana Roberto González-Quevedo sobre “Símbolos de Sangre”, otra de Carmen Muñiz Cachón, de la Universidá d’Uviéu, sobro “La entonación y el conxuntu de rasgos prosódicos na carauterización d’una llingua” y d’Emilio Ridruejo, de la Universidá de Valladolid, sobro “El aprovechamiento de los mecanismos analógicos en los procesos de estandarización de las lenguas. El ejemplo del asturiano”. Comunicaciones estremaes Amás de la participación del Profesor de Periodismu de la Universidá Carlos III de Madrid y académicu de la llingua asturiana, Próspero Morán, que falará sobro “El periodismu alternativu y les llingües minoritaries”, presentaránse nes Xornaes comunicaciones d’Ana Cano González (“L’álbum de Josefina Pérez d’Ayala”), Xosé Lluis Campal (“Sobre el bable (1902), una reflexón d’un interesante artículu periodísticu de fai más d’un sieglu apaecíu por entregues en El Carbayón”), Xosé Lluis García Arias (“Galicismos”), Miguel Ramos Corrada (“Dalgunos casos de yeísmu n’asturianu”) o Xulio Viejo Vázquez (“aloración, intercomunicación y dialectoloxía: la vivencia de la llingua nel Quirós tradicional). Xunta estos espertos presentarán comunicaciones otros como Liliana Díaz Gómez, María del Pilar Fernández González, Héctor García Gil, Esperanza Mariño Davila, María del Mar Martín Martín, Xuan Porta Allende, Rafael Rodríguez Valdés, Xuan Santori Vázaquez, Aníbal González Miyares, Hermenegildo Bardio Díaz y Javier Fernández Irigoyen. 5 d'ochobre, 2004 0 FacebookTwitterPinterestEmail
Sociedá Cooperación al Desarrollu empobinó alrodiu un millón d’euros pa acciones humanitaries by asturnet 5 d'ochobre, 2004 L’Axencia Asturiana pa la Cooperación al Desarrollu dedicó un total de 911.200 euros a acciones humanitaries nuna decena países que se vieron somorguiaos en catástrofes naturales, béliques o debíes a causes estructurales. El dineru empleáu nestes ayudes sobrepasa la cantidá prevista de mano en casi el doble motivao por situaciones como les que padecieron países como Haití o Sudán. Pal siguiente exerciciu va entamase esta partida con un millón d’euros. Rafael Palacios, director de l’Axencia Asturiana de Cooperación, fexo públicos estos datos énte los medios de comunicación pa rendir cuentes del dineru empleáu en socorrer a países envueltos en situaciones catastrófiques. El responsable d’esti departamentu resaltó que la filosofía que preside la distribuición de les ayudes nun se queda namás en sofitar a rexones del mundu desborades por cataclismos de la naturaleza sinón que considera igual de graves les catástrofes producíes por acción del ser humanu como guerres, xenocidios, desplazamientos o crisis económiques y sociales capaces d’emburriar a la población d’un país al llende de la sosistencia.Palacios desplicó les dos llinies enriba los que s’encadarmen les ayudes: el de la seguridá alimentaria, dedicáu a asegurar el suministru d’alimentos a poblaciones esfamiaes y l’ayuda d’emerxencia a países que necesiten socorru inmediatu énte una situación crítica. A la postre empobináronse ayudes a diez proyectos xestionaos por diverses organizaciones humanitaries, la mayoría encarrilaos a países del continente africanu y del americanu. La cuantía más importante foi pa socorrer a la población de Darfur, en Sudán, nun proyectu de la Cruz Colorada desplegáu p’atender a los miles de desplazaos pol conflictu armáu de la rexón. El segundu proyectu al que se dedicó una cantidá importante foi al dirixíu por Médicos ensin Fronteres nel conceyu angolanu de Kuvango p’atenciones sanitaries básiques. El restu les ayudes foron destinaes a actuaciones en Nicaragua, Chad, Sierra Lleona, Marruecos, Cuba, Haití y la República Dominicana. 5 d'ochobre, 2004 0 FacebookTwitterPinterestEmail
Sociedá Mocedaes Socialistes d’Uviéu denuncia una actividá violenta y peligrosa nos planes d’ociu municipales by asturnet 5 d'ochobre, 2004 L’agrupación uvieína de les Mocedaes Socialistes d’Asturies critica nun comunicáu la programación ente les actividaes de ‘La noche es tuya’ d’una práctica de llucha nomada ‘krav maga’, a la que consideren “d’inequívocu conteníu violentu” y na que s’utilicen diversos artefactos esplosivos. Esti tipu de llucha foi desenvuelta pol exércitu israelí como métodu d’adiestramientu n’operaciones béliques de combates cuerpu a cuerpu. Los socialistes mozos consideren que la la ‘krav maga’ ye una actividá que “va contra l’espíritu y finalidá que defienden les campañes d’ociu alternativu” y que se trata d’una práctica violenta na que se empleen esplosivos, qu’a xuiciu de les MMSS: “que nengún xuez duldara en calificar d’arma peligrosa y que nin seiquier ta reconocida pol Conseyu Superior de Deportes”. Los autores del comunicáu afirmen qu’actividaes como la insertada ente los programes d’ociu de ‘La noche es tuya’ entren “en contradición con valores ciudadanos que toa administración tien de promover” y piden que se replantee el caltenimientu de l’actividá motivu de polémica. 5 d'ochobre, 2004 0 FacebookTwitterPinterestEmail
Sociedá Cangas del Narcea tamién amuesa voluntá de participar na rede d’oficines llingüístiques del Principáu by asturnet 3 d'ochobre, 2004 Tres d’una xunta que caltuvieron esti caberu vienres el Director de la Oficina de Política Llingüística, Ramón d’Andrés, y la conceyala de Cultura del Ayuntamientu de Cangas del Narcea, Mónica Díaz, la puesta en marcha d’una oficina o serviciu de normalización llingüística ye una posibilidá enforma futurible. Los conceyos d’Avilés, Mieres y Llanes ya se pronunciaron hai bien poco favoratibles a siguir los pasos de Siero, Carreño, Gozón, la Mancomunidá de la Sidra y los que ya tienen el serviciu en marcha. La conceyala de Cangas del Narcea entrugó-y al Director de la Oficina de Políticas LLíngüística sobro les posibilidaes pa poner en marcha’l serviciu interesándose por fórmules en comuña como la participación d’Ayuntamientos de la rodiada, como’l de Degaña o Tineo. Por embargu, por mucho qu’esta seya una bona noticia entá s’alcuentra na memoria el ‘parón’, fechu realidá esti branu, que postergaba la puesta en marcha d’oficines llingüístiques en Siero y les Mancomunidaes del Cabu Peñes y la Comarca de la Sidra. En total, esa postergación afectaba de mou inmediatu a nueve conceyos -Siero, Carreño, Gozón y los seis municipios ‘sidreros’-, y suponía pone-y un seriu pilancu a la Rede de Normalización Llingüística nos Conceyos, anunciada pola propia conseyera de Cultura, Ana Rosa Migoya, nel so discursu institucional d’apertura de la XXV Selmana de les Lletres Asturianes y presentada el pasáu 25 de mayu pol director xeneral de Promoción Cultural y Política Llingüística, Carlos Madera. Nesa iniciativa enmarcábase l'”establecimientu de convenios cola Conseyería de Cultura” p’alitar la creación de nuevos servicios llocales de normalización, que quedaba aparáu nel branu. Por embargu, sigún fontes dela Conseyería, les perres acabarán aportando a los conceyos darréu s’afayen fórmules alternatives a los convenios. El ‘parón’ nos convenios que diben dar llugar a nueves oficines llocales de la Llingua prodúxose amás alpenes 48 hores depués que’l Gobiernu de coalición ente PSOE, Izquierda Xunida y Bloque por Asturies asoleyara una valoracíón enforma positiva del so primer añu de xestión na defensa y promoción del asturianu, nun documentu nel qu’anunciaba el prósimu desarrollu de la Llei d’Usu y Promoción del Asturianu y reivindicaba los “alcuerdos de collaboración técnica con distintos conceyos que pusieron en marcha les sos oficines de normalización llingüística llocales o comarcales”. 3 d'ochobre, 2004 0 FacebookTwitterPinterestEmail
Sociedá L’Academia desixe’l reconocimientu de la oficialidá na reforma del Estatutu “de mou esplícitu y ensin ambigüedaes” by asturnet 30 de setiembre, 2004 L’Academia de la Llingua Asturiana fizo públicu esti xueves día 30 de setiembre nel Club de Prensa de La Nueva España n’Uviéu la so postura ente la futurible reforma del Estatutu d’Autonomía qu’atalanta como irrenunciable “la denomación de la llingua como llingua asturiana, la consideranza desa llingua como llingua propia, el so calter de llingua oficial xunto al castellán, el derechu de tolos ciudadanos de la comunidá a conocela y a emplegala, la non discriminación por mor de la llingua, y la seguranza del emplegu normal y oficial de les dos llingües y de midíes afayadices pafitar la so conocencia”. La postura oficial de l’Academia pue consultase n’Asturnews nesti documentu en formatu pdf, un documento nel que s’afita la necesidá de que la llingua asturiana algame la oficialidá pa garantizar la so supervivencia. Nun documentu midíu y enllenu de referencies al sentíu común, políticu y cultural, la presidenta de l’Academia de la Llingua asoleyaba el posicionamiento de la institución alrodiu de la futurible reforma estatutaria que, como nun podía ser d’otra miente, afita la oficialidá como “linstrumentu xurídicu básicu pa facer efeutiva la normalización de la llingua”, talamente como asocede nel contestu español, y pa la totalidá de les comunidaes billingües. Ana Cano dió llectura al documentu institucional depués de qu’abriera l’actu ‘l secretariu de l’Academia de la Llinua Asturiana, Roberto González Quevedo, faciendo un repasu a la situación na que s’atopa’l procesu normalizador dende una perspeutiva política, dexando bien nidio que si hai una cuestión pendiente nel Estáu Español “ye l’asturiana” y faiendo una alvertencia a los políticos asturianos de que nun puen negar los derechos fundamentales a la población asturiana nesta nueva ocasión. Darréu de les pallabres de Roberto González Quevedo y enantes de qu’interviniere la presidenta de l’Academia, el vicepresidente de la institución, Miguel Ramos Corrada fizo un repasu del momentu nel que nos afayamos dende un puntu de vista llingüísticu y cultural afitando dos finxos imprescindibles p’algamar un futuru vidable pal asturianu: “la normtivización de la llingua y la normalización social, el so usu y emplegu en tolos ámbitos de la vida”. Ramos Corrada fizo alcordanza de los momentos cimeros nel procesu de normativización, remembrando l’entamar coles primeres ediciones de les “Normes Ortográfiques y entamos normativos” y finando col Diccionariu de la Llingua Asturiana, ensin escaecese del cumal que foi la edición de la Gramática. La gran asignatura pendiente Ana Cano entamó la llectura del documento yendo darréu a lo fondero, esmoleciéndose por esclariar conceutos como los de política llingüística, planificación llingüística, normalización social y oficialidá: “Pue dicise ensin gota mieu a enquivocase que nAsturies, hastal día de güei, nun tuviemos una política llingüística medianamente seria y empobinada a la recuperación y dignificación de la llingua asturiana”. Y Ana Cano pudiera dicilo al altu la lleva, pero dende llueu non con más serenidá y convencimientu. Sicasí, pala presidenta de l’Academia “ye nidio que cada partíu y cada gobiernu pescancien la política llingüística duna manera determinada, acordies coles creyencies y opiniones de so sobrol papel que tien de xugar la llingua asturiana na sociedá. El problema dAsturies, nesti sen, ta en quequí esa política llingüística consistió siempres nescaecer o en despreciar esi papel”. Darréu, Ana Cano desplicó lo que ye una planificación llingüística axustada y eficaz: aquella a “la qua la fuercia shan venceyar un conxuntu de midíes o planes dactuación que, afitándose nunos oxetivos concretos y con una temporalización dada, puean ser evaluaos a lo cabero del periodu planificáu”. Y darréu d’ello fizo alcordanza de que “lasturianu tien un tratamientu atípicu y particular en comparanza cola política y la planificación llingüística fecha en Galicia, País Vascu, Cataluña, Valencia, Navarra y Baleares: Los ciudadanos asturianos carecen, carecemos, bien a les clares duna discriminación con respeuto a los ciudadanos de les otres comunidaes billingües del estáu, nel sentíu de que nAsturies nun esisten garantíes reales que mos dexen exercer el derechu a la llibertá del usu llingüísticu”. Esa ye la gran asignatura pendiente del Estáu de les Autonomíes pa con Asturies y nun se igua namái que d’una manera: cola “reconocencia dafechu del asturianu como llingua co-oficial nAsturies”. Pala presidenta de l’Academia la reconocencia tien de facese “de mou esplícitu, ensin dengún tipu dambigüedaes nin pilancos que la torguen, na reforma del Estatutu dAutonomía quagora se discute”. Y amás, la so redaición “tien de ser homologable a la plantegada pa Galicia, Valencia, Navarra, Baleares, Cataluña o País Vascu”. O dicho dotru mou, “nestos momentos de denguna de les maneres ye yá aceptable que lEstatutu nun faiga otro que recoyer una oficialidá aplazada que shabría facer efeutiva más tarde cuando, por exemplu, una mayoría cualificada de la Xunta Xeneral del Principáu lo tuviere a bien. Esto ye, nun se pue dar el preste más qua una formulación del tipu de la que sinxer nos estatutos de les otres comunidaes del Estáu con llingua propia”. Tres de la intervención d’Ana Cano, abrióse un turnu d’entrugues ya intervenciones nes que los presentes pudieron facer una exposición de les sos opiniones y pedir que se-yos esclariaren cuantes duldes quedaren alrodiu de lo presentao nel documentu. 30 de setiembre, 2004 0 FacebookTwitterPinterestEmail
Sociedá Los gays y lesbianes asturianos celebren la llei que va igualar los sos derechos llegales by asturnet 30 de setiembre, 2004 Representantes del colectivu XEGA amuesaron el so contentu pola aprebación güei en Conseyu de so contentu pola aprebación güei en Conseyu de Ministros del proyectu de Llei de Camudación del Códigu Civi que va suponer si s’apreba nel parlamentu la igualación de los derechos de los homosexuales, hasta agora privaos de la posibilidá llegal de xuntase en matrimoniu civil y del derechu a l’adopción, mesmo les pareyes coles que conviven les madres y padres biolóxicos. Tino Brugos, miembru de Xente Gay Astur, manifestó el contentu col que’l so colectivu celebra la presentación del proyectu de camudación de la llexislación civil española. Si el proyectu del gobiernu recibe’l sofitu del parlamanentu va suponer en palabres de Brugos: “el que los gays y lesbianes dexemos de ser ciudadanos de segunda”. El testu presentáu pol executivu “respuende a toles nuestres espectatives en materia llegal”, afirmó el representante de XEGA, pa quien acaba dase “un pasu hestóricu importante que termina con años de discriminación”. En cualquier casu, Brugos considera que la batalla nun ta tovía ganada y qu’inda queda muncho por facer p’acabar colos prexuicios y la homofobia, inda que “esta batalla va ser más educativa y cultural, que reivindicativa”. Dende’l colectivu XEGA ven con esmolición la campaña de tracamundios entamada por sectores católicos y conservadores tocante al asuntu de l’adopción. Nesi tema “había que recorda-yos a estos sectores que se trata sobretoo de regularizar la situación de les pareyes homosexuales nes qu’una de les persones tenga fíos d’una relación anterior y que nun va producise nenguna ‘avalancha’ d’adopciones como ellos la presenten”. Tino Brugos amosóse bien críticu dica l’aparente xiru dau pol Partíu Popular nesti tema, al que calificó de “oportunista y cínicu”. 30 de setiembre, 2004 0 FacebookTwitterPinterestEmail
Sociedá L’Academia presenta güei el so informe sobro l’inxerimientu de la oficialidá nel nuevu Estatutu by asturnet 29 de setiembre, 2004 L’Academia de la Llingua Asturiana va facer públiques les sos esmoliciones y propuestes énte la inminente reforma estatutaria nun actu que va celebrase n’Uviéu a les 20,00 hores nel Club Prensa Asturiana de ‘La Nueva España’. La conclusión más resaltable del informe ye la necesidá irrefugable d’inxerir la oficialidá del asturianu como única fórmula llegal que puede valir p’asegurar la normalización social y el futuru del idioma La másima institución llingüística asturiana ya adelantrara la so posición ente la revisión del marcu autonómicu nun comunicáu emitíu el pasáu día 22 nel que se denunciaba la precariedá de la enseñanza del asturianu n’Educación Secundaria. Nél dábase por supuesta la necesidá d’incluir la declaración d’oficialidá pa la llingua y aludíase al tratamientu qu’habría tener nel Estatutu reformáu y “nes lleis qu’habríen desendolcar ésti”. 29 de setiembre, 2004 0 FacebookTwitterPinterestEmail