Sociedá El Sporting va ser recibíu nel Parlamentu Europeu y inagurará una esposición itinerante en Bruseles by asturnet 20 d'abril, 2005 El Sporting va celebrar el so centenariu n’Europa y na capital de la Unión, Bruseles, la ciudá qu’acueye la mayor colonia d’emigrantes asturianos del continente. La directiva y xugadores del club van ser recibíos nel Parlamentu Europeul prósimu 3 de xunu y entamaráse na capital belga la inaguración duna esposición itinerante sobre la hestoria del equipu playu. Ente los actos programaos en Bruseles pa conmemorar el centenariu sportinguista ta’l de vistir al popular Manekem Pis cola camiseta colorada y blanca. El xerente del Sporting, Alfredo García Amado, presentól programa dactos conmemorativos del centenariu del equipu, nel que destaca la recepción nel Parlamentu Europeul prósimu 3 de xunu, asina como la inaguración duna esposición itinerante. Esta muestra incluyirá semeyes dépoques hestóriques del equipu, na que destaca la de Quini, na que va tar el delegáu del Sporting, xunta Eloy Olaya, Manuel Vega-Arango y lalcaldesa Paz Fernández Felgueroso, pa intervenir nun coloquiu colos emigrantes.El club tamién va ser recibíu pol alcalde de Bruseles, al que va regaláse-y una camiseta del equipu col so nome serigrafiáu y firmada por tolos xugadores. Esta fiesta asturiana na capital europea va tar amenizada por grupos folklóricos y gaiteros asturianos. El 4 de xunu vestirásel Menneken Pis, el famosu emblema de Bruseles, colos colores del Sporting y va sustituíse-y lagua por sidra. Amás, va facese una exhibición de bolos, o bien na Gran Plaza, o na plaza España, ente la Peña Blimea y una selección de xugadores de Xixón. Los actos terminarán con una fabada, que será regada con unes trenta caxes de sidra pa escanciar, xunta otres diez pa tomar en mesa. A la presentación destos actos asistió Rafael Estrada, presidente de la Peña Eloy de Bruseles, xunta Luis Miguel Fernández Romero, Director Xeneral dEmigración; Daniel Gutiérrez Granda, Director Xeneral de Ceportes; Teresa Ordiz, conceyala de Deportes, y Goyo Ezama. 20 d'abril, 2005 0 FacebookTwitterPinterestEmail
Sociedá Los topónimos de los conceyos de Llanes, Carreño y el Franco ya son oficiales by asturnet 20 d'abril, 2005 El Conseyu de Gobiernu del Principáu aprebó na mañana d’esti xueves 21 la oficialización de los topónimos de los primeros conceyos asturianos en solicitar la revisión de los sos nomes de llugar. Carreño, El Franco y Llanes conviértense asina nos primeros conceyos que van tener la so toponimia correxida y afayada a les sos denomaciones tradicionales. En prósimes selmanes el Gobiernu asturianu va aprobar nuevos espedientes toponímicos d’otros conceyos que lo solicitaron y que ya tienen solventáu el so casu pola Xunta de Toponimia de la Conseyería de Cultura. Los tres primeros conceyos de los ventinueve que tienen pidío hasta agora la revisión de los sos nomes de llugar ya tienen resueltu y aprebáu el so espediente y una vez que la decisión del Conseyu de Gobierno apaeza publicada nel Boletín Oficial del Principáu d’Asturies (BOPA) los topónimos tradicionales de Llanes, Carreño y el Franco pasarán a ser los oficiales, talo encamienta la llexislación tocante al llabor de la Xunta de Toponimia. Si se cumplen les previsiones de la Oficina de Política Llingüística de la Conseyería de Cultura los siguientes conceyos que puen ver aprebáu el so espediente toponímicu nel Conseyu de Gobiernu van ser L.lena, Llangréu y Gozón, que tamién tienen superao tolos trámites hasta empobinase a les instancies del gobiernu autonómicu. 20 d'abril, 2005 0 FacebookTwitterPinterestEmail
Sociedá El documentu de la X Asamblea d’Izquierda Xunida pide una mayor sintonía cola l’Academia y la so reconocencia by asturnet 17 d'abril, 2005 El documentu políticu que va aprebar la X Asamblea d’Izquierda Xunida d’Asturies valora positivamente los avances en normalización de la llingua asturiana frutu del so pautu de gobiernu col PSOE y al empar, con cierta autocrítica, reconoz que ye necesaria una mayor relación cola Academia de la Llingua y el reconocimientu del so llabor. El documentu tamién defende una implicación más fonda d’IX nos movimientos sociales pola defensa de la llingua y considera primordial “recuperar relaciones y trabayu conxuntu” colos colectivos y plataformes del asturianismu social. Nel terrenu políticu considera imprescindibles la oficialidá y el reconocimientu d’Asturies como nacionalidá na prósima reforma l’Estatutu. La ponencia central que va sirvir de documentu de discusión na prósima Asamblea d’Izquierda Xunida d’Asturies faise una valoración positiva del pautu de gobiernu soscritu col PSOE y de la so política d’aliances que llevó a la coalición federal a xuntase col Bloque por Asturies, al que considera coincidente “na nuestra vocación de tresformación social cola nuestra apuesta pola construcción dAsturies como país”. Pa IX la so xuntura col Bloque: “dos años depués desti alcuerdu, la valoración sólo puee ser favoratible” y caltién que “por ello mesmo tenemos dampliar la rellación ente toles dos organizaciones a tolos niveles, avanzar nel trabayu conxuntu a la fin dincorporar nesta alianza estratéxica a otros coleutivos y persones.”. Igual de “favoratible” abúlta-y a la coalición el marcu creáu pa la normalización del asturianu gracies a los alcuerdos de gobiernu, al pesar de que reconoza les diferencies que caltienen colos socios mayoritarios del executivu autonómicu:”estos avances no se producieron ensin tensiones nel marcu del gobiernu, con resistencies dende la parte socialista”, les diferencies col movimientu social polos derechos llingüísticos tamién se reconocen: “ye evidente quesisten diferentes valoraciones y preocupaciones nos ámbitos sociales del asturianismu, y ye necesaria una mayor iniciativa dende IU-BA nesti campu, recuperando relaciones y trabayu conxuntu pa non solo avanzar en medíes concretes sinón que estas contribuyan al oxetivu de la oficialidá y la normalización efectiva del asturianu y gallego-asturianu”, afirma la ponencia. Nestes llinies déxase entever una cierta autocrítica tocante les tensiones y enfrentamientos que calterizaron la relación d’IX-Bloque col asturianismu social y sobremanera cola Academia de la Llingua dende la presencia de la coalición nel gobiernu. El tonu autocríticu faise esplícitu nes llinies onde se defende recomponer la relación cola Academia y facer una reconocencia del so llabor.La institución llingüística y los sos másimos responsables fueran especialmente críticos dende la firma del pautu de gobiernu con Izquierda Xunida-Bloque y nos últimos meses estes diferencies aumentaran d’intensidá hasta’l puntu d’acusar al gobiernu asturianu nel que participa la coalición de querer “crear una Academia paralela” y nun respetar el so papel después del enfrentamientu algamáu pola Xunta de Toponimia. Nel apartáu de política cultural y llingüística del documentu políticu de la X Asamblea d’Izquierda Xunida hai constantes referencies a que les propuestes recoyíes nesa materia han contestualizase siempre nel enfotu “de la construcción d’Asturies como país” y no referío esclusivamente a la defensa de los drechos llingüísticos asturianos apúestase por combinar les iniciatives institucionales col sofitu activu al llabor de movilización entamáu dende’l Conseyu Abiertu pola Oficialidá, del que diz “fai falta impulsar nos prósimos meses” de cara al debate sobre la reforma estatutaria. 17 d'abril, 2005 0 FacebookTwitterPinterestEmail
Sociedá L’actu del Día de les Lletres fairáse’l 6 de mayu nel Campoamor con delles novedaes by asturnet 15 d'abril, 2005 L’Academia de la Llingua Asturiana ta acabante de dar anuncia qu’esti añu l’actu oficial del Día de les Lletres Asturianes fairáse’l día 6 de mayu, vienres, a les 20 hores nel Teatru Campoamo, con delles ya importantes novedaes con respeutu a les ediciones anteriores. Na solemne sesión académica, van tomar posesión como nuevos miembros de l’Academia Xosé Ramón Iglesias Cueva (académicu de númberu) y Marta Mori d’Arriba (académica correspondiente). Arriendes del discursu institucional de la Presidenta de l’Academia de la Llingua Asturiana, habrá una actuación musical na que participarán el gaiteru José Manuel Tejedor y el grupu folk Lliberdón. Y llueu del actu académicu, habrá una espicha, abierta a la participación de tola xente, nel Restaurante La Gruta, con bailles y música asturiana. La gran novedá d’esti añu ye qu’amás de lo anterior, nel actu académicu fadráse un homenaxe al traxe asturianu del país, polo que s’encamienta darréu d’ello a los asistentes que, na midida de les sos posibilidaes, lleven traxe asturianu como simbolización del so copromisu cola cultura d’Asturies. El Día de les Lletres que celebra l’Academia de la Llingua Asturiana nun ye la única celebración nesa primera selmana de mayu alrodiu de la llingua y la lliteratura de nueso. Tolos años nesa selmana, la Conseyería de Cultura desendolca tamién una programación que lleva por nome Selmana de les Lletres y que davezu se dedica a destacar a un escritor n’asturianu. Pero la edición d’esti añu, la XXVI edición de la Selmana de les Lletres va tar dedicada non a un escritor sino a tola poesía asturiana contemporánea dando asina esti añu un nuevu xiru col fin de proyectar na sociedá la lliteratura qu’anguaño s’escribe y remebrar el valor d’unos autores que tan construyendo dende los primeros años del Surdimientu un mundu referencial pal futuru del idioma. Como amuesa del calter universal y afayáu al so tiempu de les actuales lletres asturianes dos de los poetes más importantes d’Europa, Seamus Heaney y Luis García Montero, participen nos actos organizaos pola Conseyería de Cultura na primer selmana de mayu. Después de venticinco ediciones dedicaes a l’alcordanza y homenaxe d’autores antiguos en llingua asturiana (cola escepción de les dos ocasiones nes que se dedicó a escritores contemporáneos fallecíos: Llorienzu Novo Mier y Andrés Solar), Cultura y Política Llingüística quieren dar un nuevu xiru a esta celebración aprovechando esta cita añal coles nuestres lletres pa difundir ente la sociedá l’interés de la lliteratura qu’anguaño se ta escribiendo y publicando n’Asturies. La calidá de los autores de poesía ye una amuesa del valor que presenten les lletres actuales y a ellos ta dedicada esta XVI Selmana embaxo’l títutu ‘Poesía en Movimientu’. Más información sobro’l programa 15 d'abril, 2005 0 FacebookTwitterPinterestEmail
Sociedá El PSdG recula na so propuesta pa esparder el gallego pelos conceyos de Navia-Eo by asturnet 10 d'abril, 2005 El diariu uvieín La Nueva España informaba na so edición del pasáu sábadu 9 de que’l PSdG retirara de la mesa del parlementu de Galicia la proposición no de llei presentada va unes selmanes col fin d’esparder la llingua gallega fuera de les llendes administratives de la comunidá vecina. Según la información publicada nel rotativu asturianu los encamientos fechos dende la FSA y l’esmolecimientu de los alcaldes socialistes de la zona influiríen nesta decisión de retirar la propuesta. Talo informaba Asturnews el pasáu 29-03-05 varios diputaos del grupu socialista na cámara autonómica de Galicia presentaran una na que pidíen al gobiernu de la Xunta una serie de midíes empobinaes a la promoción de la llingua oficial de la comunidá vecina n’Asturies, Lleón y Castiella, y Estremadura. Ente elles proponíase incorporar los territorios de fales del troncu común galaico-portugués a los programes de difusión cultural y normalización llingüística entamaos pola Xunta, la incorporación d’un representante d’eses zones al Consello de Cultura de Galicia, alcuerdos coles autoridaes educatives d’eses comunidaes pa la enseñanza de la llingua gallega y otres propuestes destinaes a sofitar el llabor de colectivos d’esos territorios implicaos nel espardimientu del gallegu, asina como propuestes de programes d’inmersión llingüística pa los escolinos de les zones con fales galaico-portugueses al través de cursos intensivos y vacaciones pagues na comunidá gallega. La iniciativa parlamentaria del PSdG causar un plasmu grande nos conceyos asturianos d’Entrambasaguas y al paecer tamién nel senu de la Federación Socialista Asturiana, asina como nes instituciones y colectivos en defensa de la llingua asturiana y del gallego-asturiano. Los socialistes asturianos falaríen colos sos compañeros de Galicia pa qu’estos retiraran la so proposición non de llei, de ser cierta la información publicada pol diariu La Nueva España. 10 d'abril, 2005 0 FacebookTwitterPinterestEmail
Sociedá El mundu de la cultura asturiana despide a Mánfer de la Llera en Xixón con un cálidu y unánime respetu by asturnet 7 d'abril, 2005 Una emocionante ceremonia civil d’alcordanza y homenaxe celebráu na capiella del tanatoriu de Xixón valió pa despidir al escritor y académicu asturianu Manuel d’Andrés Fernández, Mánfer de la Llera, arrodiáu de los suyos y d’una sinfinidá de xente que quiso acompañar cola so presencia silenciosa al patriarca de les lletres asturianes nel so últimu actu públicu. Talo-y sucediera en vida, la figura de Mánfer, llogró xuntar alrodiu suyu y de la so memoria, el respetu unánime de tolos que compartieron con él los mesmos ideales por un mundu más xustu y una Asturies arguyosa de la so propia identidá. La capiella del tanatoriu de Cabueñes, en Xixón, quedó pequeña pa tola xente que quiso tar ende arropiellando a los familiares del poeta Mánfer de la Llera na ceremonia civil de despidida a un home que supo ganar la consideranza más fonda de tolos que lu conocieron y que significó a lo llargo de tola so vida un referente moral na llucha poles llibertaes mientres la dictadura franquista y dende la so incorporación enfotada al proyectu cívicu entamáu por Conceyu Bable pa la recuperación de la identidá cultural asturiana, un exemplu de compromisu col movimientu en defensa de los derechos llingüísticos y nacionales del so pueblu. El compromisu activu de Mánfer de la Llera cola realidá que-y tocaba más cerca y cola llucha por un futuru posible pa la so tierra quiso recordalo la voz emocionada d’Amelia Varcárcel na so intervención nel actu d’homenaxe cuando afirmó que’l so antigu compañeru de Conceyu Bable “sabía que tenía una patria y esa patria tenía’l nome d’Asturies”. La filósofa, que precedió nel cargu de presidenta de C.B. a Mánfer, evocó l’exemplu moral y vital d’un home “al que-y tocó vivir nun tiempu nel que non toos teníen accesu a los estudios por cuenta de la so condición social y onde tampoco abultaba compatible l’estudiu col trabayu d’un obreru”. De la coincidencia del escritor llangreanu colos mozos universitarios qu’entamaron Conceyu Bable, Varcárcel, acudiendo a la so memoria personal, amosó la so convición en que la presencia de Mánfer aportaba “una profundidá nel tiempu, un sentíu hestóricu a aquel movimientu d’unos cuantos ‘rapazucos’, como nos llamó ciertu mediu entós”. Amelia Varcárcel, visiblemente emocionada, robró la so intervención col deséu de que l’alcordanza del escritor desapaecíu valga pa remembrar que “namás vivimos pa dexar de nós un poco de memoria, porque’l tiempu somos nós”. Numberoses persones del ámbitu de la vida pública asturiana, ente elles podía vese a los conseyeros de Xusticia y Esteriores Francisco Javier García Valledor y d’Educación, José Luis Iglesias Rioperdre; los directores xenerales de Cultura, Carlos Madera y de Prevención y Seguridá nel Trabayu, José Couto; el director del centru territorial de RTVE n’Asturies, Pedro Alberto Marcos;la conceyal de Llingua y Cultura asturianes de Xixón, Carmen Rúa; el secretariu xeneral del Bloque por Asturies, Roberto Colunga; el presidente del PAS, Xuan Xosé Sánchez Vicente o el conceyal d’URAS en Villaviciosa, Xicu Díaz Yepes. Del ámbitu de la cultura y el mundu académicu, podía vese, a escritores como Lourdes Álvarez, Taresa Lorences, Xandru Fernández, Xosé Bolado, Antón García o Humberto González; los académicos Miguel Ramos Corrada y Urbano Rodríguez, el presidente del Foru Xovellanos, Jesús Menéndez Pelaez, ente otres figures destacaes. Ente la xente del mundu de la cultura asturiana el respetu y la consideranza a la personalidá de Mánfer yera unánime, asina afirmaba Chema Vega, compañeru del escritor fallecíu na tertulia El Garrapiellu: “Mánfer yera sobre too un paisanu, nel sentíu que tien esa palabra n’asturianu, un home íntegru, bonu, paisanu de los pies a la cabeza”. L’actor Lluis Antón González, compañeru de Mánfer de la Llera en Conceyu Bable, destacaba que “yera un home que concitaba nél el respetu de tolos que lu conocíen, siempre tuvo alloñáu de cualquier tipu d’enfrentamientu o dixebra, per enriba de cualquier engarradiella”. Al so llau el realizador Ramón Lluis Bande señalaba que “Mánfer supo xuntar la cultura popular con formes de creación modernes, a la vez qu’él mesmu facía de ponte ente la so xeneración y les más nueves, na so faceta como creador yo destacaría esa manera tan moderna de xunir tradición y cultura populares cola so lliteratura de calter documental o testimonial”. El críticu Leopoldo Sánchez Torre coincidía na valoración de la figura de Mánfer de la Llera como “ponte ente les xeneraciones lliteraries, nesi sen el so papel foi fundamental y la so personalidá una referencia importante”. Na ceremonia pudieron escuchase nes voces del Coru del Llano, canciones populares como “El Chalaneru” o “Si la nieve resbala”, que teníen un significáu especial pa Mánfer, y el poeta Xuan Santori y el músicu Toli Morilla lleeron dalgunos poemes que’l propiu autor escoyera pa cuando llegara esi momentu, según cuntó l’escritor Vicente García Oliva, oficiante laicu del actu tamién por deséu de Mánfer de la Llera: “él yera consciente de qu’esi momentu podía llegar y quiso dexalo too preparao, quería que lu despidiéramos asina”. Unes emocionantes palabres d’Amelia Varcárcel valieron pa evocar la personalidá moral y vital del escritor llangreanu. Nelles Varcárcel recordó los díes de la so mocedá cuando coincidió con otros compañeros de xeneración en Conceyu Bable y onde s’atoparon con Mánfer de la Llera, “un home de cierta edá que pa nós entós, malpenes ‘unos rapazacos'(como nos llamó dalguién nun periódicu de la época), y la presencia de Mánfer daba al nuestru proyectu profundidá nel tiempu”. Con voz emocionada Amelia Varcárcel acabó les sos palabres evocando la estela de lluz que dexaba el poeta llangreanu y afirmó “qu’a poco más podemos aspirar a nun ser dexar daqué de nós nel tiempu, porque somos memoria”. 7 d'abril, 2005 0 FacebookTwitterPinterestEmail
Sociedá Los diputaos van usar la llingua na Selmana de les Lletres by asturnet 4 d'abril, 2005 Los versos de los poetes contemporáneos en llingua asturiana van sonar nel parlamentu autonómicu na voz de distintos diputaos de los grupos representaos na Xunta Xeneral. La iniciativa entamada ente la Oficina de Política Llingüística de la Conseyería de Cultura y la presidencia del parlamentu asturianu tenta tresmitir a la sociedá la necesidá de normalizar l’usu de la nuestra llingua en tolos ámbitos. Ye la primer vez que’l másimu órganu lexislativu del Principáu al través de los sos representantes parlamentarios participa institucionalmente nuna iniciativa en favor del usu del asturianu. Fiel al lema col que se presenta la XXVI Selmana de les Lletres dedicada a reconocer y difundir la obra desenvuelta poles tres xeneraciones de poetes contemporáneos: “Poesía en movimientu”, los versos y l’idioma nel que fueron escritos van movese per estremaes fasteres del país. Una d’eses fasteres desavezaes al ecu de les voces revitalizadores de la llingua asturiana, la Xunta Xeneral del Principáu, va ser escenariu d’un de los actos institucionales de la Selmana: representantes de los distintos grupos políticos pondrán voz a poemes d’autores del Surdimientu. Según afirmaron a Asturnews fontes del departamentu de Política Llingüística énte la iniciativa nengún de los grupos presentes nel parlamentu refugó participar y vamos ver, poro, la primer vez a diputaos del PSOE, Partíu Popular y Izquierda Xunida-Bloque por Asturies usando en públicu y nun actu oficial l’asturianu. Va ser un momentu ensin dulda memorable d’esta Selmana de les Lletres que cuenta nesta ocasión con un arropu de luxu na presencia del poeta y premiu Nobel irlandés Seamus Heaney, una de les referencies de los autores contemporáneos en llingua asturiana. 4 d'abril, 2005 0 FacebookTwitterPinterestEmail
Sociedá Les ordenances pal usu del asturianu en Xixón enfrenten a IX-Bloque colos sos socios del PSOE by asturnet 3 d'abril, 2005 La negativa del grupu municipal del PSOE nel Ayutnamientu de Xixón a aceptar la propuesta d’ordenances pal usu del asturianu nel conceyu elaborada pola Oficina de la Llingua tien provocao un fondu maltar nos sos socios de gobiernu d’Izquierda Xunida-Bloque. La pasada selmana el representante del Bloque por Asturies nel Ayuntamientu de Xixón, Roberto Colunga y el portavoz nacional d’esa formación, Rafael Palacios deunciaben nuna rueda de prensa la posición de los socialistes énte les ordenances y afirmaben que de siguir la so negativa Izquierda Xunida-Bloque “actuaríen en consecuencia”. En declaraciones a Asturnews, Roberto Colunga (BA) reafírmase nesta advertencia al PSOE inda enfótase en que se pueda solventar la situación plantegada. Colunga declaró que la negativa del grupu socialista a aceptar les ordenances pal usu del asturianu n’administración municipal: “supón un menospreciu a los llabores de la Oficina de la Llingua de Xixón y al so Conseyu Asesor” al empar que “una actitú que truña contra l’enfotu de los alcuerdos de Gobiernu de Xixón y d’Asturies, contra la Llei d’Usu del Asturianu, el Plan de Normalización y los derechos recoyíos na Carta Europea de les Llingües y la Declaración de Derechos humanos”. El reprentante del grupu municipal d’Izquierda Xunida-Bloque por Asturies afirma que la coalición “nun va tar de brazos cruzaos énte la negativa del PSOE a negociar o consensuar un alcuerdu pal desbloquéu de la propuesta d’usu del asturianu nel conceyu” y d’aporfiar los socialistes na so actitú: “el nuestru grupu actuaría en consecuencia si considera que nun se tan respetando les propuestes d’un órganu, como la Oficina de la Llingua, creáu polos alcuerdos del pautu de gobiernu en Xixón”. El principal trabancu col que se topen les ordenances ellaboraes pola Oficina de la Llingua pa los socialistes taría nos articulaos referíos al derechu de los ciudadanos a usar l’asturianu nes sos comunicaciones cola adminstración municipal y a qu’esta-yos conteste na mesma llingua. La propia alcaldesa, Paz Fernández Felgueroso, tresmitió a la conceyal de Llingua y Cultura Asturianes, Carmen Rúa, d’IX-BA, que d’aprebase estos artículos podía tar “incurriéndose nuna posible illegalidá al representar de una oficialidá de fechu”,como la que ya fuera recurrida y derogada nos conceyos que nel so día aprebaron la declaración d’oficialidá nel so ámbitu municipal. Roberto Colunga adelantró a Asturnews que’l so grupu ta tratando de desbloquear la situación plantegada con una prósima reunión colos socialistes pa buscar maneres de consensuar un alcuerdu al respective. Sicasí advirtió: “nun vamos consentir que se menosprecie’l llabor de la Oficina nin del so COnseyu Asesor y eso ye lo que ta faciéndose al tornar unes propuestes que se presentaron a los grupos municipales fai más de seis meses”. 3 d'abril, 2005 0 FacebookTwitterPinterestEmail
Sociedá Les II Sesióis d’Estudio del Occidente afonden na conocencia de la realidá cultural d’Entrambasaguas by asturnet 31 de marzu, 2005 La realidá cultural y llingüística de la tierra d’Entramabasaguas va centrar el conteníu de les II Sesióis d’Estudio del Occidente, empobinaes pol departamentu dedicáu al gallego-asturiano inxertáu n’Academia de la Llingua. Les xornaes desenvolveránse a lo llargo d’esti viernes 1 y mañana sábadu cola participación de diversos especialistes na cultura y la llingua d’esta fastera del occidente asturianu. La villa de A Caridá acueye estes xornaes que tenten afondar na conocencia d’una realidá cultura bayurosa como poques n’Asturies. El conceyu d’El Franco acueye esti viernes 1 y el sábadu 2 d’abril les II Sesióis d’Estudio del Occidente organizaes pola Secretaría Llingüística del Navia-Eo y dedicaes a esponer estremaos asuntos de la cultura y la fala d’esta fastera asturiana. Diversos especialistes xuntaránse nestes xornaes en A Caridá pa tratar aspectos filolóxicos del gallego-asturiano, la lliteratura nesa modalidá llingüística, la hestoria, el patrimoniu y la etnografía d’esta zona, una de les más afitaes na so propia personalidá y sicasí non siempre conocía nel restu d’Asturies. La Secretaría Llingüística del Navia-Eo, inxerta n’Academia de la Llingua, tenta con estes Sesióis afondar nel estudiu y la conocencia de la bayura cultural qu’abelluga la fastera más occidental del nuestru país y al empar esponer nueves aportaciones d’especialistes en materia filolóxica sobre dellos aspectos de la fala d’Entrambasaguas. Les xornaes empiecen el viernes 1 d’abril a les 17.30 cola comunicación d’Ignacio Vares García titulada: “Pasao y presente del gallego asturiano”. Darréu y lo llargo de la sesión de tarde van esponese los trabayos: “Galego-asturiano nas aulas de Secundaria”, de Fanny López Valledor y Mónica Loza López; “El proyecto del Diccionario Básico de Gallego-Asturiano (DBGA)”, a cargu de Rafael Cascudo Noceda, Xosé Miguel Suárez Fernández y Ignacio Vares García. Rafael Cascudo Noceda falará tamién de “Ruta mitolóxica del Eo al Porcía” y col mesmu asuntu de fondo, Aurona Bermúdez Navia y Angélica Fernández Taborcías espondrán la comunicación “Miloloxía local y pasiaxe a través d’un itinerario didáctico”. Piesllarán esta primer sesión José Luis Díaz Álvarez tratando de “Os tempos d’onte en Santalla” y Benxamín Méndez y Fredo de Carbexe falando de “Patrimonio lingüísticos del Navia-Eo y marca territorial”. Les Sesióis reanúdense’l sábadu a les 10,30 cola ponencia d’Isabel Torrente Fernández titulada “Navia-Eo: dalgús aspectos hestóricos”. José Antonio Fernández Vior falará de siguío del “Achegamento á realidá lingüística del Navia Eo”; Xosé Miguel Suárez Fernández tratará de “El teatro en galego-asturiano. Dos empezos á Guerra Civil (1899-1936); ya Inaciu Llope referiráse al “Xogo d’identidades na terra del Navia-Eo. Un achegamento crítico”. Les comunicaciones titulaes “Os tópicos literarios na poesía en galego-asturiano d’agora mesmo” d’Aurora García Rivas y “Vocabulario d’Entrambasaguas” de Xosé Lluis García Arias, pondrán remate a esta sesión de mañana. La última de les sesiones escomienza a les 17.OO cola comunicación d’Ana Mª Cano González “Os sufixos con valor colectivo nel Navia-Eo”. Darréu Mª José Fraga Suárez falará de “Os personaxes nel teatru de Manuel García-Galano.Tipos”; Ruth González Rodríguez dedicará la siguiente ponencia a tratar de “A sustantivación d’oracios relativas en gallego-asturiano”; Servando J. Fernández Méndez falará de “Dalgúaas obras arquitectónicas dos americanos nas terras d’Entrambasaguas”; Felix Martín Martínez tratará “Da música en Tapia”; y Alfredo Álvarez de Ponticiella falará de “A Rieira: territorio de mestas y…d’arcuños”. La comunicación de Mª Concepción Álvarez Lebredo titulada “Asomeñanzas engañosas entre el galego-asturiano y el español:falsos amigos” valdrá pa piesllar estes II Sesióis d’Estudio del Occidente. 31 de marzu, 2005 0 FacebookTwitterPinterestEmail
Sociedá El PSdG propón l’espardimientu de la llingua y cultura gallega pel Navia Eo, El Bierzo, As Portelas y tres villes de Cáceres by asturnet 28 de marzu, 2005 El grupu parlamentariu de los socialistes gallegos presentó’l pasáu 23 d’abril una iniciativa dirixida a promover l’espardimientu de la llingua y la cultura gallega per delles fasteres d’Asturies, Lleón, Zamora y Estremadura que’l PSdG considera “de fala galega”. El testu presentáu poles diputaes Natividad González Laso, Laura Seara Sobrado y Manuel Luis Rodríguez González articúlase en cuatro propuestes d’actuación ente elles “fortalecer les relaciones ente los gallego-falantes d’estos espacios y los de Galicia” y considera necesario “apoyar l’actitú de los que tán contribuyendo neses zones al espardimientu del gallegu”. Les cuatro propuestes que faen los socialistes de Galicia al gobiernu de la Xunta empobínense a les fasteres de Navia-Eo, El Bierzo, As Portelas y tres villes de la provincia de Cáceres, según publicaba la edición del pasáu 23 d’abril de ‘La Voz de Galicia’. Nelles los diputaos firmantes de la iniciativa consideren “preciso establecer alcuerdos coles instituciones educatives d’Asturies, Lleón, Zamora y Extremadura pa que’l gallego pase a formar parte de manera permanente de les actividaes culturales y educatives d’eses zones”. La segunda propuesta consite en proponer “que los circuitos culturales promovíos pola Xunta de Galicia s’espardan hasta les cuatro zones de fala galega”. Darréu el PSOE de Galicia pide “fortalecer les relaciones ente los gallego-falantes d’estos espacios y los de Galicia, proponiendo programes vacacionales o d’intercambiu al través de los programes de les distintes conselleríes”, al empar qu’instituciones como’l Consello da Cultura Galega incorpore persones representantes d’eses zones, como ya ficiera apocayá l’Academia Galega. A lo último el grupu socialista nel parlamentu gallegu considera “necesario apoyar l’actitú de los que tán contribuyendo neses zones al espardimientu del gallegu y facer participar a la población de les mesmes nes iniciatives culturales que contribuyan a fomentar la difusión del idioma gallegu”. 28 de marzu, 2005 0 FacebookTwitterPinterestEmail