Sociedá La RAE recopila la obra que Pidal dexó ensin terminar by asturnet 12 de xunetu, 2005 La RAE presentó ayeri la ‘Historia de la lengua española’ que Ramón Menendez Pidal dexó ensin acabar y que’l so nietu, Diego Catalán, recopila agora depues d’años d’investigación sobre los testos orixinales. La obra, coeditada pola Fundación Ramón Menendez Pidal y la RAE, col patrociniu de la Fundación Areces, ta editada en dos volúmenes que distribúi Marcial Pons. El primeru d’ellos, de casi mil cuatrocientes páxines, recueye los diferentes capítulos de la ‘Historia de la lengua española’ que Pidal entamó a preparar y que diba hasta’l sieglu XVIII. El segundu volumen, d’ochocientes páxines, contien un estudiu sobre la evolución de la llingua, una historia de la ‘Historia’ de Diego Catalán y los índices analíticos que faciliten la consulta de los testos. Nel actu de presentación de la ‘Historia de la lengua española’ tuvieron presentes l’academicu Manuel Seco, el director de la RAE, Víctor García de la Concha; l’academicu y historiador de la ciencia Jose Manuel Sánchez Ron; el secretariu de la Fundación Ramón Menendez Pidal, Jose Manuel Perez-Prendes, y Ignacio Perez Pascual, de la Universidá de La Coruña; l’academicu Luis Ángel Rojo fue en representación de la Fundación Areces. El nietu y discípulu de Pidal, Diego Catalán, que define esta obra como ‘una catedral para una lengua’ nun pudo tar presente nel actu por motivos de salú. 12 de xunetu, 2005 0 FacebookTwitterPinterestEmail
Sociedá El CAO entama una ronda de diálogu colos partíos alrodiu de la oficialidá by asturnet 11 de xunetu, 2005 El Conceyu Abiertu pola Oficialidá escomenzó esti llunes 11 la so ronda de contactos colos partíos políticos representaos na Xunta Xeneral pa espone-yos el conteníu de la so “Propuesta de diálogu pa salvar la llingua asturiana”. El grupu popular foi el primeru en recibir la propuesta nuna reunión con representantes del CAO na que’l PP comprometióse a estudiar el documentu con atención. La ronda de contactos va siguir en setiembre colos otros grupos políticos. La intención de Conceyu Abiertu pola Oficialidá ye falar con tolos partíos pa abrir un calce de diálogu permanente alrodiu de la situación actual de la llingua asturiana y les midíes necesaries pa invertir esa situación al través d’una ampliación del marcu xurídicu actual que garantice la supervivencia del idioma y los derechos llingüísticos de los falantes. Dependiendo de la receptividá qu’adviertan nos partíos a falar sobre esta propuesta el CAO entamaría una mesa con toos ellos o un diálogu por separao con cada grupu y calteniendo la periodicidá de los alcuentros. Nel alcuentru calteníu col grupu popular el CAO llogró sacar un compromisu del PP a estudiar con procuru la propuesta de diálogu, ensin entrar n’otres consideraciones primero de conocer y analizar el conteníu del documentu. Los diputaos Rodrigo Grossi, Emilio Pérez y Emilio Rodríguez fueron los encargaos de recibir pol so grupu a los representantes del Conceyu Pilar Fernández y Xulio Casado. En pasando’l veranu el CAO tien previsto reanudar los sos aconceyamientos colos partíos políticos pa valorar les posibilidaes de llograr un consensu alrodiu de la llingua asturiana. 11 de xunetu, 2005 0 FacebookTwitterPinterestEmail
Sociedá L’informe de Tolivar sobre la reforma l’estatutu aconseya descartar la oficialidá by asturnet 10 de xunetu, 2005 L’informe encamentáu al caderalgu de Derechu Constitucional de la Universidá d’Uviéu Leopoldo Tolivar Alas pola Xunta Xeneral sobre la reforma del Estatutu aconseya non incluir la cooficialidá del asturianu. Asina lo publica esta mañana la edición del diariu El Comercio, na que’l propiu Tolivar matiza en declaraciones a esi mediu que toles posibilidaes tan abiertes incluíu el reconocimientu oficial, sicasí nel so informa señala más inconvenientes que ventayes pa esta midida. Díes después de que l’Academia de la Llingua dexare aparcada la so propuesta d’un Alcuerdu Social pola Llingua y la Cultura Asturianes pola negativa del PSOE a asumir el principal de los puntos, la oficialidá, fíltrase parte del conteníu del informe elaboráu pol Leopoldo Tolivar nel que, siempre según el rotativu xixonés citáu, afirma que “deben ponderase los problemes normativo-llingüísticos, les peculiaridaes de la franxa estremo occidental, el coste d’una Administración billingüe, que recaería, al nun proceder de tresferencia dalguna, sobre los presupuestos de la comunidá autónoma, y, cómo non, l’aceptación social d’una midida sin duda conflictiva”. Esti informe tampoco descarta que la posibilidá de declarar cooficial a la llingua asturiana nun pueda tar nel nuevu Estatutu y asina diz: “en contra d’una opinión mui estendida, nun ye nada insensato nin superfluo meditar sobre la conveniencia” de la oficialidá. Tampoco refuga la posibilidá de referver “sobre la forma de consultar a la población asturiana alrodiu d’esta cuestión”.L’informe de Tolivar señala arriendes que la falta d’una titulación específica de Llicenciatura académica de llingua asturiana ye un enzancu más pa les posibilidaes d’inxerir estos conocimientos nos currículos profesionales. L’informe ye parte de los encamentaos pola Xunta Xeneral a un grupu d’espertos pa qu’estos encamienten les sos suxerencies y les sos propuestes énte la futura reforma del Estatutu en 2006. La situación llegal del asturianu y les posibilidaes de camduala, ampliando la so amparanza xurídica hasta la so equiración oficial coles otres llingües del estáu, ye una de les cuestiones que traten esos informes, concretamente l’encargáu al xurista y miembru de la AMSO Leopoldo Tolivar Alas. 10 de xunetu, 2005 0 FacebookTwitterPinterestEmail
Sociedá Anxo Quintana fala nun mediu asturianu de la visión del so partíu tocante al Navia-Eo by asturnet 10 de xunetu, 2005 El diariu La Nueva España publica na so edición d’esti llunes 11 una entrevista col dirixente del BNG y posible nuevu vicepresidente de la Xunta de Galicia na que’l cabezaleru nacionalista afirma que “la esistencia de falantes de gallego nel occidente d’Asturies nun tien por qué ser un problema, sinón una oportunidá llingüística”. Quintana tamién respuende a una pregunta sobra l’apropiación del periodu del Reinu d’Asturies por parte de la historiografía nacionalista gallega actual diz que “hai toa una relación de reis qu’utilicen como llingua el gallego, y que lo faen non como cuestión puntual, sinón institucionalizada”. L’apropiación del periodu hestóricu del reinu asturianu por parte d’hestoriadores galleguistes y grupos nacionalistes ye una constante nos últimos tiempos onde abonden les publicaciones y páxines webs nes que se defende que los monarques del estáu astur-lleonés son en realidá reis gallegos. Estes mesmes corrientes de revisión y interpretación hestoriográfica remonten la esistencia del Antigu Reinu de Galicia al sieglu VI col empiezu del reinu Suevu y llévenlu hasta los últimos sieglos de la dómina medieval. Anxo Quintana opina al respective en La Nueva España afirmando que “too lleva a pensar qu’ellí onde hai un rei gallegu tien d’haber un reinu” y que hai “una historia por contar, paralela a la historia oficial”. Tocante a les declaraciones del cabezaleru del BNG referíes a la fala del Navia-Eo, son les primeres que fai a un mediu asturianu sobre esi tema y inda’l tonu moderáu qu’usa pa falar d’ello nun mediu que de xuro nun desconoz la postura que caltién respective a esti polémicu asuntu, pueden interpretase tamién en clave d’advertíu a les autoridaes del Principáu sobre un tema que’l nacionalismu gallegu considera parte de la so política llingüística. 10 de xunetu, 2005 0 FacebookTwitterPinterestEmail
Sociedá PSOE, IX y BA escenifiquen el so deséu de cumplir el pautu de gobiernu hasta’l final by asturnet 8 de xunetu, 2005 El presidente del gobiernu asturianu y los tres cabezaleros de la FSA, Izquierda Xunida y Bloque por Asturies comparecieron énte los medios con más d’una hora de retrasu y semblante seriu. Xunta ellos, los miembros de les delegaciones polítiques que participaron nel conceyu d’evaluación del pautu de gobiernu soscritu va dos años, ente ellos el conseyeru Valledor y Esteriores y la viceconseyera María José Ramos, sentaos na sala de prensa ente los informadores. El balance a la mitá de la lexislatura: un 66 por cientu de les midíes del pautu executaes y prácticemente toles otres entamaes. El primeru en garrar la palabra, foi el portavoz del Bloque, Rafa Palacios que lleó una valoración propia n’asturianu na que consideraba l’alcuerdu políticu tan necesariu agora de rematar de cumplir como va dos años de firmalu. Palacios terminó afirmando que pa la so organización inda quedaben munches coses pendientes y asuntos nos qu’afondar y sobre los que debatir. Al empar dixo que’l Bloque por Asturies nunca va renunciar a siguir lluchando polos derechos políticos, sociales, llaborales y llingüísticos del pueblu asturianu. El coordinador d’Izquierda Xunida d’Asturies,Jesús Iglesias, intervieno darréu pa resumir el balance que la so organización facía de los dos años de gobiernu compartíu. Na so valoración Iglesias incidió na importancia de lo avanzao n’asuntos como la vivienda, sanidá, servicios y derechos sociales, normalización del asturianu, y sobremanera nel nuevu clima políticu “de progresu y diálogu” que propiciara el gobiernu de coalición. L’últimu en falar foi Javier Fernández, secretariu xeneral de la FSA que dixo coincidir no esencial coles valoraciones espresaes polos representantes del Bloque ya Izquierda Xunida y amosó la voluntá del so partíu por siguir cumpliendo los oxetivos del pautu hasta’l final de la lexislatura. Nel documentu soscritu polos tres partíos del gobiernu asturianu afírmase qu’Asturies “avanzó respective a lo que yera en 2003 cuando FSA-PSOE, IX y BA firmábamos l’alcuerdu que fizo posible’l gobiernu de la izquierda plural”, sicasí reconozse que “inda queda abondo por facer” y que “nos prósimos dos años tenemos que poner en marcha o acelerar les midíes pendientes d’execución pa poder cumplir íntegramente el compromisu qu’adquirimos coles ciudadanes y ciudadanos d’Asturies”. Nel documentu van repasándose los distintos capítulos de la política desenvuelta dende la formación del gobiernu tripartitu y resalta el capítulu de política cultural tituláu “Identidá cultural asturiana” nel que se diz que la identidá propia del pueblu asturianu “ye un sentimientu común que sirve como nexu d’unión ente asturianos y queremos estender los sos valores per mediu de la comunicación social”. Nesti capítulu cultural destácase la llingua asturiana como “una de les nuestres señes d’identidá” y tocante al Plan de Normalización considérase que tán reflexaes nél toles midíes contemplaes nel pautu de gobiernu: “lo que-yos da un fuerte impulsu políticu y mayor concreción en cuantes a la so execución”. Tocante a la enseñanza del asturianu dizse que la llingua ta presente en tolos niveles educativos y resáltase que “el númberu d’alumnos que se matricula nesta asignatura crez cada añu”. El gobiernu amuesa darréu el so apoyu a l’aprebación de la llicenciatura de Filoloxía Asturiana nel marcu del Espaciu Européu d’Enseñances superiores. La toponimia y la presencia del asturianu n’alministración y nel Ente Públicu de Comunicación son otros puntos que se destaquen en materia llingüística. 8 de xunetu, 2005 0 FacebookTwitterPinterestEmail
Sociedá IX ratifica’l pautu cola FSA y alvierte de que lo sucedío en Mieres abre les puertes a la derecha by asturnet 6 de xunetu, 2005 La presidencia colexada d’Izquierda Xunida d’Asturies ratificó’l pautu políticu robláu cola FSA va agora dos años, con un ochenta por cientu d’apoyu a la valoración positiva del alcuerdu y namás tres votos en contra y cuatro abstenciones. La coalición considera una prioritario garantizar el cumplimientu de los conteníos pendientes del alcuerdu y reforzar el gobiernu. IX, advirtió sicasí a los socialistes qu’actitúes como la que llevó a romper el pautu municipal en Mieres “podíen tar abriéndo-y al PP les puertes de les cuenques”. Al marxen de crisis como la del conceyu del Camín y d’enfrentamientos como’l calteníu pol conseyeru Valledor col viceconseyeru Iturrioz, pa la coalición d’izquierdes la valoración del grau de cumplimientu del pautu de gobiernu autonómicu ye positiva a dos años de robláu. IX valora especialmente los llogros algamaos nes sos conseyeríes, ente ellos la política de vivienda y la puesta en marcha del salariu social básicu. Al empar considera necesario dar estabilidá al executivu pa poder superar los retos pendientes d’ésti, como la financiación sanitaria y autonómica, o la negociación del Plan de la Minería. Respective a la crisis provocada en Mieres pola ruptura del pautu municipal, Izquierda Xunida fizo una llamamientu a la FSA pa que reflexonare sobre’l riesgu de qu’estos enfrentamientos tean “abriéndo-y les puertes al PP nes cuenques”. El coordinador xeneral d’IX d’Asturies, Jesús Iglesias, remembró que “nuna de les últimes convocatories electorales el Partíu Popular foi el más votáu en conceyos como Llangréu”. Iglesias afirmó tocante a les repercusiones que puedan tener crisis como la de Mieres nel futuru del pautu autonómicu que “el pautu d’Asturies y los pautos locales van xuntos”. Pal coordinador d’Izquierda Xunida “hasta agora los pautos dieron bonos resultaos, lo estraño y atípico ye que se produza una ruptura ente dos fuerces d’izquierda y se busque’l respaldu del PP”. Jesús Iglesias dixo al respective que “nunca soñara la derecha con tener un papel tan relevante nel corazón de les cuenques mineres” y que la so coalición nun yera la responsable d’ello: “dalguna estatexa y non por culpa d’IX, punxo en manes de la derecha les llaves de la gobernabilidá”. Per último fexo un llamáu a la reflexón a la FSA sobre “decisiones que nun se miden con toles consecuencies lo suficientemente”. 6 de xunetu, 2005 0 FacebookTwitterPinterestEmail
Sociedá L’Observatoriu ve nel apoyu de la Xunta al Plan de Normalización que’l consensu ye posible by asturnet 6 de xunetu, 2005 L’Observatoriu de la Política Llingüística fai una llectura positiva de l’aprebación del Plan de Normalización Social nel parlamentu autonómicu col respaldu de tolos grupos y considera qu’eso ye una “muestra clara de quedaqué se ta moviendo na política asturiana no tocante a la cuestión llingüística”. Pal Observatoriu esto tamién ye preba de “quel consensu políticu alredor de la normalización social de la llingua tien cada día más posibilidaes efectives”. La plataforma celebra los avances daos en toponimia y vuelve señalar les carencies del asturianu na enseñanza. Según afirma esti organismu independiente nun comunicáu fechu públicu ayer la valoración positiva que fai l’Observatoriu del Plan de Normalización y del so respaldu na Xunta Xeneral nun supón contradición dalguna con señalar tamién les carencies en política llingüística: “LObservatoriu, plural na so composición, nun tien nengún vínculu nin nengún compromisu con nenguna fuercia política o institución. El so únicu compromisu ye pa cola llingua asturiana. Nun tien, polo tanto, nenguna torga que-y quite de celebrar les coses que se faigan bien per parte de les instituciones públiques, nin de denunciar les que se faigan mal. Esa ye la so única función”, afirma’l comunicáu. Ente les carencies y cuestiones pendientes la plataforma señala la situación de l’asignatura de llingua asturiana na enseñanza y la presencia que vaya tener el nuestru idioma nel Ente Públicu de Comunicación. Respective a esti segundu asuntu pal Observatoriu ye “una cuestión decisiva a curtiu plazu ye la de garantizar una presencia digna y non meramente testimonial del asturianu na radio y televisión autonómiques, lo que nun va ser posible ensin profesionales aparentes”. L’Obervatoriu de la Política Llingüística critica a los “que oponen la oficialidá al Plan de Normalización, como si se tratara de cuestiones contradictories” y caltién que “laplicación del Plan, al contrario, amás de reforzar una conciencia social favorable a la normalización llingüística, tien de contribuyir a desaniciar los mieos infundaos quignoren lo que se ta convirtiendo nuna realidá social”. L’Observatoriu considera “comprensible” la insatisfación y rocea énte “l’algame limitáu del Plan”, por parte de persones y colectivos del movimientu asturianista. Nesi sen el comunicáu de la plataforma reconoz que “la conciencia de la gravedá de la situación del asturianu, el mieu a quel retrocesu llegue pronto a ser irreversible, xustifiquen la demanda de midíes más drástiques y enérxiques, ensin lambigüedá o la curtiedá que presenten dellos apartaos del Plan”, inda y too pal Observatoriu “nun tienen sentíu les descalificaciones globales. El Plan llega hasta onde foi posible, y eso ye lo quanguaño puede dar de sí”. Enfrente d’eso pa esta plataforma: “la única alternativa quesiste yel non-Plan, ye dicir, la vuelta a la pasividá que caracterizó la última década.” El comunicáu defende la oficialida como “una condición indispensable pa poder avanzar nel camín de la so normalización social” y qu’ésta ye una reivindicación común a tol movimientu de recuperación llingüística: “naide ye más que naide nesti tarrén y naide tien derechu a ponese más medalles quotros”, afirma l’Observatoriu. Darréu nel comunicáu remémbrase que namás los partíos políticos pueden traer la oficialidá: “nun foi posible hasta anguaño porque asina lo quixeron los partíos mayoritarios” y observen que “namás va ser posible cuando se produza un cambiu sustancial na actitú destos partíos”. Mentantu l’apueste d’esta plataforma ye dir vixilando’l cumplimientu de los conteníos del Plan de Normalización Social y señalando les carencies que se detecten nello. 6 de xunetu, 2005 0 FacebookTwitterPinterestEmail
Sociedá IAS tamién va entamar acciones llegales pa defender al so militante Faustino Zapico by asturnet 6 de xunetu, 2005 El portavoz d’Izquierda Asturiana (IAS), Inaciu Llope acusó a Izquierda Xunida-Bloque por Asturies de facer “xestos a la galería pa recuperar la credibilidá perdida nel mundu asturianista” nel casu de discriminación llingüísitica sufríu pol hestoriador y miembru de la dirección d’IAS, Faustino Zapico. Llope anunció tamién la intención del so grupu de sumase a les acciones llegales entames por Oficialidá y la Xunta pola Defensa la Llingua contra la Universidá y el rector Juan Vázquez. Izquierda Asturiana amosó la so solidaridá col so dirixente Zapico énte lo que califiquen de “un fechu que non por común dexa de ser habitual nesti país, al se-y xune l’ agravante de que ye la institución pública que se supón que tien erixise en promotora de la cultura la que se convierte nun axente activu de discriminación, colo que se rebaxa a ella mesma y degrada la función que-y correspuende”. Pal portavoz de IAS, Inaciu Llope lo sucedío al historiador Faustino Zapico “muestra claramente como n’Asturies la llingua asturiana ye un idioma proscritu, y los supuestos pasos que se dieron nos últimos años nun pueden evitar situaciones como esta, porque no se dieron na dirección adecuada; la del reconocimientu de los derechos de los y les falantes a utilizar la so llingua en tolos ámbitos sociales, ye decir, la normalización real de la mesma”. Llope aludió a les intervenciones públiques protagonizaes pol conseyeru de Xusticia y Esteriores, Francisco José García Valledor y pol so director xeneral de Cooperación, Rafa Palacios, pa calificales de “xestos a la galería pa recuperar la credibilidá perdina nel mundu asturianista” y acusó a IX-BA de “ser cómplices d’un gobiernu que tien secuestraos llegalmente los derechos de los y les falantes”. Pa Llope situaciones como la vivida por Faustino Zapico namás podíen evitase cola oficialidá y la necesidá “inescusable” de la so inclusión na prósima reforma del estatutu, ya que, según IAS: “de perder esta oportunidá taríamos abocaos a una situación d’auténticu cataclismu cultural”. IAS, la organización nacionalista a la que pertenez l’historiador Faustino Zapico, anunció la so intención de sumase a les acciones llegales entamaes por otros colectivos contra la Universidá y contra’l rector Juan Vázquez. 6 de xunetu, 2005 0 FacebookTwitterPinterestEmail
Sociedá El Conseyu de Gobiernu oficializa los topóminos de tres nuevos conceyos by asturnet 6 de xunetu, 2005 El Conseyu de Gobiernu del Principáu aprebó esta mañana na so reunión de los xueves dexar resultos los espedientes toponímicos de Llangréu, Gozón y L.lena, que dende güei cuente por oficiales los nomes de llugar revisaos y aviaos pola Xunta de Toponimia. Estos conceyos vienen sumase asina a los otros tres que vieron en mayu oficializaos los sos nuevos topónimos:El Franco, Llanes y Carreño. El procesu de normalización y revisión de los nomes de llugar de los conceyos sigue’l so pasu coles avezaes demores del ritmu administrativu y a espera de que se vayan xuntando na bandexa nuevos espedientes revisaos polos conceyos y la Xunta de Toponimia. Nel procesu de revisión tán anguañu otros diez conceyos: Ayer, Bimenes, Cabranes, Colunga, Cabranes, Llanera, Nava, Sariegu, Villaviciosa y Xixón, qu’una vez tengan solventao tolos trámites, ente ellos la revista final de la Xunta d’espertos, habrán empobinase al Principáu pa la so aprebación nun Conseyu de Gobiernu. Acordies cola Llei d’Usu y Promoción del asturianu dende agora namás esos nuevos topónimos aprebaos pol Gobiernu autonómicu son los que gocen de calter oficial nos respectivos conceyos. 6 de xunetu, 2005 0 FacebookTwitterPinterestEmail
Sociedá El Bloque fai la so propia valoración del pautu de gobiernu y comparte con IX el balance positivu by asturnet 6 de xunetu, 2005 El Bloque por Asturies comparte colos sos coaligaos d’Izquierda Xunida la valoración positiva del alcuerdu políticu robláu va dos años cola FSA, sicasí fáenlo remembrando que’l pautu ta firmáu ente tres partíos y por eso la organización nacionalista va tar presente cola so propia valoración nel conceyu d’esti viernes ente IX, BA y PSOE. Na comparecencia énte los medios posterior al conceyu, el portavoz nacional del Bloque por Asturies apurrirá tamién el balance qu’esti partíu fai de los dos años d’executivu compartíu. Los socios nacionalistes del tripartitu asturianu consideren que’l grau de cumplimientu de los puntos soscritos nel pautu hasta agora ye “aceptable al pesar de les coses qu’inda tán pendientes”, declaró a Asturnews el secretariu xeneral de la organización, Roberto Colunga. Talo ficiera nel so últimu aconceyamientu xeneral, el Bloque por Asturies, fai una llectura positiva en términos xenerales de los dos años de gobiernu compartíu col PSOE, y cuida que siguen vixentes les razones que llevaron a la organización nacionalista, dientro la so estratexa de coalición con Izquierda Xunida, a firmar el pautu políticu pol que se constituyó darréu l’executivu asturianu. Asina la dirección del Bloque considera que la situación política d’Asturies nel momentu en que se celebraron les últimes elecciones autonómiques facía necesario qu’una organización como BA diere’l pasu alantre y se comprometiere a entrar nun gobiernu “con toles consecuencies posibles como oportunidá única entós pa influir nun rumbu distintu al nuevu gobiernu, un compromisu cola realidá asturiana qu’ensin la presencia del Bloque ya Izquierda Xunida nun fuera imaxinable”. Esa ye la razón que fai a los nacionalistes coaligaos con IX entamar la so llectura xeneral de lo que significó l’alcuerdu y “sigue significando, porque inda hai asuntos perimportantes nos que tenemos abondo que dicir”, afirmen estes fontes de la dirección del Bloque. Tocante a los desalcuentros sucedíos nes últimes selmanes ente IX-BA y los socialistes, que tuvieron el so puntu más fonderu na ruptura del pautu local de Mieres, Roberto Colunga coincide tamién cola interpretación del coordinador d’Izquierda Xunida de que “son asuntos diferentes y nun tien por qué influyir nun pautu p’Asturies que ta firmáu pa cumplir” y refugó pronunciase sobre si había intentos per parte de dalgunos sectores socialistes en furar la paciencia d’IX-BA con actitúes como la caltenida pol PSOE de Mieres: “nós firmamos unos alcuerdos políticos de lo que nun somos responsables ye de lo que pudieren facer o querer facer otres partes, en cualquier casu, nun tengo motivos pa fundamentar el qu’eses maniobres desestabilizadores respuendan a una estratexa pal futuru”. Esti viernes, nunes feches nes que se cumplen los dos años de pautu políticu, el presidente Areces, el coordinador d’Izquierda Xunida, Jesús Iglesias y el portavoz nacional del Bloque, Rafa Palacios van escenificar la bona salú del alcuerdu y de xuro tamién incidir nos temes inda pendientes de cumplir según los puntos alcordaos nel pautu. Un de los asuntos que de xuro rondará sobre la mesa na que se sienten los representantes del PSOE, IX y BA, va ser ensin dulda el del modelu de financiación autonómica, sobre’l que non tolos socios coinciden en cuantes a la fórmula más afayadiza. Otru asuntu, inda nun tuviere contempláu como puntu del pautu soscritu en 2003, ha ser, de xuro el debate sobre la prósima reforma estatutaria, un asuntu sobre’l que, como ya espresaran los sos coaligaos d’Izquierda Xunida, el Bloque por Asturies afirma que “nun tamos dispuestos a renunciar a la nuestra posición propia nun asuntu nel que ta en xuegu el futuru del nuestru país”. 6 de xunetu, 2005 0 FacebookTwitterPinterestEmail