Sociedá IAS pide una cai pal ex alcalde de Xixón José Manuel Palacio by asturnet 1 d'ochobre, 2005 L’agrupación local d’Izquierda Asturiana (IAS) de Xixón pidi-y al Ayuntamientu del conceyu la recordanza del que fue’l so primer alcalde democráticu na transición José Manuel Palacio col nome d’una cai de la ciudá. Palacio, fallecíu va unos díes, fue l’entamador de los principales proyectos modernizadores del conceyu xixonés. IAS resalta na so pitición d’homenaxe al ex alcalde playu que Palacio “constituyó un exemplu pa tolos que se dediquen a la política, anteponiendo siempre el bien común al beneficiu personal o al alimentu del ego”.Pa la organización nacionalista “el trabayu a favor de la normalización de les instituciones democrátiques y les importantes tresformaciones nel espaciu urbanu acometíes na so presencia al frente de la nuestra corporación municipal han vesse en paralelo al compromisu éticu y colos valores de la izquierda que presidió tola so acción de gobiernu”. 1 d'ochobre, 2005 0 FacebookTwitterPinterestEmail
Sociedá El debate parlamentariu pieslla ensin grandes novedaes pal nuevu cursu políticu by asturnet 29 de setiembre, 2005 El debate sobre l’estáu d’Asturies remató ensin grandes novedaes pal nuevu periodu de sesiones qu’agora escomienza. Un discursu optimista del presidente Areces abrió l’alderique nel que se punxeron n’evidencia los desalcuerdos del PSOE colos sos socios de gobiernu d’Izquierda Xunida-Bloque por Asturies. El salariu social foi un de los asuntos onde s’escenificó la distancia ente les dos formaciones polítiques. Nel terrén de les propuestes y enmiendes la Xunta Xeneral peslló esta mañana’l debate sobre l’estáu de la rexón col rechazu de les 103 propuestes de resolución presentaes pol PP cuyu conteníu reflexaba, a xuiciu de PSOE y IX, la falta de proyectu de los populares. Sin embargu, estos apoyaron nueve de les diez iniciatives plantegaes conxuntamente polos grupos que formen Gobiernu. Nel debate de les propuestes, el portavoz socialista, Álvaro Álvarez, sorrayó que, pesie’l gran númberu d’iniciatives del PP, que presentó hasta 103 propuestes, el so conteníu nun permitía “ver per ónde va l’alternativa”. Aurelio Martín, portavoz d’IX, manifestóse en terminos asomeyaos al dicir que’l PP nun plantegare namás que “problemes puntuales” y que quixo facer d’ellos proyectos. Quexándose de qu’un debate como’l d’estos díes nun podía tener tantu númberu de propuestes y díxo-yos que munches d’elles yeren propies pa tratar nes comisiones parlamentaries y non nel debate sobre l’estáu la rexón. Pal portavoz popular, Joaquín Arestegui, les iniciatives del so grupu queríen “explicitar” la llínia siguía nel so discursu por Ovidio Sánchez y poner les bases pa “superar” la crisis económica asturiana. Y acusó al Gobiernu de mantenese “sordu” ente los problemes y de “nun facer nada” por solucionalos. Ente les iniciatives del PSOE y IX aprobaes esta mañana por unanimidá apaecen cuestiones como’l Plan de la Minería; la reclamación d’un plan estratexicu d’apoyu a la agricultura ecolóxica; la collaboración ente pa la execución del nuevo exe de comunicación ente La Espina y Ponferrada; amás de la busca de soluciones pal conflictu de Menasa. La única iniciativa aprobada ensin los votos del PP fue la de les midíes necesaries pa regular el tráficu rodáu nel Parque de Picos. 29 de setiembre, 2005 0 FacebookTwitterPinterestEmail
Sociedá L’Ayuntamientu de Villaviciosa aprebó’l so espediente toponímicu by asturnet 29 de setiembre, 2005 Villaviciosa sumóse dende esti xueves 28 a la llista de conceyos asturianos que ya tienen aprebao nos sos ayuntamientos los sos espedientes de revisión toponímica. El nomenclátor iguáu del conceyu maliayés cuntó col sofitu de tolos grupos políticos presentes nel consistoriu. Partíu Popular, PSOE y URAS votaron a común en favor de l’aprebación del espediente de nomes de llugar elaboráu pola Xunta de Toponimia del Principáu y namás refugaron una de les propuestes, la de llamar a la capital del conceyu La Villa por Villaviciosa y destamiente’l nome oficial va siguir siendo esti últimu. Con Villaviciosa prácticamente los conceyos más importantes y con más población d’Asturies entamaron la igua de los sos topónimos castellanizaos y puestos al día agora según los criterios elaboraos polos espertos de la Xunta de Toponimia. 29 de setiembre, 2005 0 FacebookTwitterPinterestEmail
Sociedá Areces ta dispuestu a retocar los fondos previstos pal Salariu Social by asturnet 28 de setiembre, 2005 El presidente del Principáu, Vicente Alvarez Areces, amosó güei na segunda xornada del debate del estáu la rexón, la so disposición a ‘retocar’ los fondos previstos pa la puesta en marcha del salariu social, tal y como-y pide IX, en casu de que nun se cubrieren toles necesidaes de les families en situación de probeza que demandasen esta prestación. Esti tema fue quiciás el puntu más importante y más esperáu por toles partes nel debate, yá qu’amenaza dende va tiempu la relación del gobiernu en coalición. Na so replica nel debate del estáu de la rexón a la intervención de la portavoz d’IX, Noemí Martín, Areces pidió ‘rigor’ y ‘prudencia’ pa evitar qu’esta cuestión se vuelva ‘un elementu de fricción fundamental’ y se reste valor a ‘un gran esfuerzu’ na llucha contra la esclusión social. El xefe del Executivu reiteró la so intención de da-y cumplimientu al alcuerdu de concertación firmáu con sindicatos y empresarios que ponía’l llímite presupuestariu pal salariu social en 60 millones d’euros nos sos primeros cuatro años de vixencia. Asinamesmo, emplazó a Martín a nun facer ‘esi exerciciu’ de dicir, tal y como ficiere la portavoz d’IX, que se quiten fondos d’otros proyectos ‘porque eses iniciatives xeneran riqueza’ y, sorrayó, ‘ensin crear riqueza nun se pue repartir solidaridá’. No tocante a la llingua, Areces llimitóse a felicitase pol Plan de Normalización Social del Asturiano, por ser ‘un avance, al travies del consensu de la sociedá, partiendo dende la base de la voluntariedá’. Y esi avance vese, sigún el presidente, nos ‘ciento sesenta profesores d’asturiano qu’hai nel nuestru sistema educativu’. Areces pidió qu’esti tema se despolitice y se ‘soporte con normalidá ensin provocar crispaciones ente la sociedá’. Na so intervención na segunda xornada del debate de la rexón, Ovidio Sánchez (PP) ofreció una batería de datos que contradicen ‘sustancialmente’ la perspectiva ofrecida ayeri por Areces, basada, al so xuiciu, en ‘mentires’ que’l presidente rexonal ‘aporfia machaconamente en tratar colar’ nos sos discursos. Sigún el dirixente popular, qu’acusó a Areces d’actuar ‘como un vendedor de feries’, Asturies nun supo aprovechar ‘el contestu económicu nacional boyante’ deriváu de los ocho años de xestión del PP pa ‘xubise al carru’ de les comunidaes más prósperes. A lo qu’Areces respondió ensiñando los datos de les últimes actuaciones del gobiernu en comparanza col gobiernu del PP, polo que acusó d’’hipócrita’ l’actitú de la oposición nes sos valoraciones. 28 de setiembre, 2005 0 FacebookTwitterPinterestEmail
Sociedá Andecha Astur denuncia que la Oficina d’Información Xuvenil de Corvera lleva cinco meses ensin responsable by asturnet 28 de setiembre, 2005 L’agrupación local d’Andecha Astur en Corvera y el colectivu mozu Darréu denuncien nun escritu que la Oficina d’Información Xuvenil y la mediateca del conceyu lleven pesllaes varios meses ensin que l’Ayuntamientu tome midíes pa solventalo. El fallecimientu de l’anterior responsable de la OIX ye’l motivu pol qu’entrambos servicios dexaron de funcionar n’abril. Agora pídese la so reapertura. Andecha y Darréu consideren que la ufierta de los servicios interrumpíos ye “indispensable” y cuiden qu’anguañu la mocedá corverano nun tien un espaciu onde informase de los temes del so interés. Entrambes organizaciones cuenten necesario el restablecimientu desta oficina pa la mocedá y el nomamientu duna persona responsable que la dirixa.Tamién pescancien que ye precisa la reapertura de la Mediateca del Centru Sociocultural de Les Vegues “pa facilitar lacesu a internet a los escolinos, estudiantes y ciudadanos quasina lo deseen”. Andecha Astur y Darréu de Corvera, afirmen nel so escritu, que llamenten la perda de l’anterior responsable de la OIX, al empar que camienten imprescindible el restablecimientu de los servicios interrumpíos n’abril. 28 de setiembre, 2005 0 FacebookTwitterPinterestEmail
Sociedá Areces fai un diagnósticu optimista de la realidá asturiana nel Debate sobre l’Estáu de la Comunidá by asturnet 27 de setiembre, 2005 El discursu del presidente del Principáu, Vicente Álvarez Areces nel Debate d’Orientación Política d’Asturies tuvo marcáu pol optimismu y l’enfotu nes espectatives de medre económicu de la nuestra comunidá nos prósimos años. El cabezaleru del executivu autonómicu evitó referencies a los desalcuentros colos sos socios de gobiernu d’IX-BA y resumió la so visión optimista con un contundente:”Asturies tien futuru”. Areces afitóse nel compromisu del so gobiernu de poner en mercáu 15.000 viviendes con dalgún tipu de protección oficial, prometió un plan espefíficu pa fomentar l’accesu al empléu de la xente mozo y afirmó que la nuestra comunidá “va tar ente les cuatro o les cinco más avanzaes del nuestru entornu”. El presidente asturianu emponderó nel so discursu’l llabor del conseyeru Francisco Javier García Valledor na negociación del trespasu de competencies pendientes y como nuevu guiñu de complicidá a los sos socios de gobiernu reafirmóse nel compromisu firmáu nel pautu políticu con Izquierda XUndida-Bloque del Salariu Social, del que dixo “Asturies, xunto al País Vascu, ye la comunidá que más dineru destina a talu fin”. Ente les iniciatives puestes en marcha pol executivu autonómicu Álvarez Areces citó el desarrollu en 2006 de les midíes conteníes nel Plan de Normalización Social pal Asturianu y tocante al Ente Públicu de Comunicación, definiólu como “serviciu públicu encamináu a favorecer el desarrollu y la cohesión territorial d’Asturies”. Respective al desarrollu del pautu de gobiernu con IX-BA, el presidente autonómicu, cifró nun 66% el grau de cumplimientu del alcuerdu políticu y del restu de los puntos conteníos nel pautu afirmó que ya taben toos en víes de solventase. Areces aludió tamién a la bona sintonía col gobiernu central y emponderó les inversiones destinaes por Madrid pa la nuestra comunidá. 27 de setiembre, 2005 0 FacebookTwitterPinterestEmail
Sociedá Izquierda Xunida afirma que nun da por peslláu nengún alcuerdu presupuestariu nel Principáu by asturnet 27 de setiembre, 2005 El grupu parlamentariu d’Izquierda Xunida-Bloque por Asturies afirmó per voz de la so diputada Noemí Martín qu’inda nun hai peslláu alcuerdu presupuestariu nengún colos sos socios nel gobiernu autonómicu y qu’inda se ta al empiezu de la negociación. Martín fexo esta aclaración na so intervención nel plenu de la Xunta Xeneral d’esta mañana. Ente les propuestes d’IX-BA al debate sobre l’estáu de la Comunidá tán la puesta en marcha urxente del Plan de Normalización pal Asturianu y la Consolidación económica de la rede d’oficines llingüístiques municipales. Izquierda Xunida-Bloque tamién pidió ente les sos propuestes qu’Asturies seya incluída ente les comunidaes afectaes pola seca y que’l Plan d’Empléu Mozu anunciáu pol presidente Areces potencie’l sector públicu y valga pa enfrentase al problema de la emigración forzada de los más mozos. Tocante al Salariu Social, la coalición d’izquierdes afirmó que nun pide “más dinero sinón el cumplimientu de lo alcordao nel pautu políticu de gobiernu”. 27 de setiembre, 2005 0 FacebookTwitterPinterestEmail
Sociedá La Xunta Xeneral celebra el Debate sobre l’Estáu de la Comunidá by asturnet 26 de setiembre, 2005 La Xunta Xeneral del Principáu acueye dende esti martes 27 y hasta’l prósimu xueves 29 el plenu sobre l’Estáu de la Comunidá col qu’abre’l cursu políticu d’Asturies tres el paréntesis del veranu. El debate parlamentariu valdrá pa calibrar el momentu de les relaciones ente los socios del executivu autonómicu enantes d’entamar los últimos tramos de lexislatura. L’estáu del pautu políticu enriba’l que se sofita’l gobiernu de PSOE y Izquierda Xunida-Bloque va escamplar a lo llargo de les xornaes parlamentaries del plenu xeneral col qu’escomienza les sos sesiones la Xunta Xeneral. Les distintes posiciones énte la prósima reforma del Estatutu y la valoración de la xestión desenvuelta hasta agora pol executivu que preside Vicente Álvarez Areces van ser dos de los asuntos alrodiu de los que xiren les discusiones del debate sobre l’Estáu d’Asturies. El plenu escomienza esti martes 27 a les once y media de la mañana cola intervención del presidente del Principáu. Al día siguiente, reanúdase a les nueve de la mañana la sesión coles intervenciones de los portavoces de los tres grupos parlamentarios y la presentación de les sos distintes propuestes. El xueves 29 a les diez de la mañana va ser el turnu de discutiniu de les propuestes de los grupos de la cámara y la so aprebación o refugue. 26 de setiembre, 2005 0 FacebookTwitterPinterestEmail
Sociedá L’Eurobarómetru inclúi per primer vez al catalán y al euskera nun informe sobre competencia llingüística by asturnet 26 de setiembre, 2005 L’estudiu “Los europeos y les sos llingües” elaboráu pol Departamentu d’Educación, Formación, Cultura e Multillingüismu de la Comisión Europea y que trata de la competencia nel usu de los idiomes comunitarios inclúi nel informe de 2005 per primer vez llingües non oficiales na UE como’l catalán, l’euskera, el gaélicu y el luxemburgués. Ente los idiomes falaos nel estáu español, l’estudiu del Eurobarómetro nun recueye más datos que los referentes al castellán, catalán y euskera; nin el gallego -al pesar de ser oficial como los anteriores idiomes-, nin l’asturianu o l’aragonés, apaecennel informe como llingües falaes polos ciudadanos europeos. L’estudiu señala que de los países comunitarios namás nunos pocos la población fala y se identifica al cien por cien con una llingua nacional como llingua materna: ye’l casu de Polonia, Grecia, Chipre o Hungría. Lo más común ye’l multillingüismu, reconocíu como una realidá avezada en países como Luxemburgo, Bélxica, Irlanda, Finlandia o el Reinu Xuníu. La situación del Estáu español ye la d’una presencia mayoritaria del castellanu na población, afitada pol so calter d’idioma obligatoriu y fálase nel informe d’un 9% de población de fala catalana y un 1% de fala vasca. Al restu de les llingües españoles alúdese nel informe señalando que delles son oficiales nes sos respectives comunidaes, ensin especificar más. Los europeos y les sos llingües 26 de setiembre, 2005 0 FacebookTwitterPinterestEmail
Sociedá Xixón acueye esti llunes la Xunta de la Comisión de Mocedá de la FEMP by asturnet 24 de setiembre, 2005 Esti llunes, 26 de setiembre a les 10:00 hores, va xuntase la Comisión de Mocedá de la Fedración Española de Municipios y provincies (FEMP) coincidiendo col entamu de los Alcuentros de Cabueñes. Los alcuentros de mocedá más veteranos d’España tienen a les 9:15 la inauguración oficial y a Ramón Jáuregui, Portavoz del Grupo Socialista na Comisión Constitucional del Congresu y ex-portavoz de Política Social y Emplegu como ún de los protagonistes cimeros d’esta xornada. Esti llunes, 26 de setiembre a les 10:00 hores, va xuntase la Comisión de Mocedá de la FEMP (de la que ye miembrul concejal de Xixón Iván Álvarez Raja) presidía por Pilar Pérez Lapuente, alcaldesa de Torrellas. Na xunta van participar 12 conceyales de dellos conceyos españoles y va ser na biblioteca del CCAI (Primera planta). Depués desta reunión, a les 11:00 hores, va cellebrase un alcuentro ente la Comisión de Mocedá de la FEMP y conceyales dAsturies. Esti alcuentru tará presiíu por: Pilar Pérez Lapuente, Presidenta de la Comisión de Mocedá de la FEMP y por Hugo Morán Fernández. Presidente de la Federación Asturiana de Conceyos. Nel alcuentru plantegaranse estratexes y víes de collaboración ente la Comisión de Mocedá de la FEMP y les conceyalías asturianes. Darréu, de 12:00 a 14:00 hores, la comisión fadrá una visita técnica a dellos equipamientos municipales comol Centro municipal integrado de Pumarín Gijón-Sur (sede de munches de las actividaes de Abierto hasta el amanecer), los locales de ensayu para músicos del colexu Manuel Medina y el Centru de Recursos pa xóvenes xestionáu pol Conseyu de Mocedá de Xixón. 24 de setiembre, 2005 0 FacebookTwitterPinterestEmail