Sociedá El RIDEA rescata la obra “El habla de Lena” de Jesús Neira by asturnet 2 de payares, 2005 El Real Institutu d’Estudios Asturianos (RIDEA) acaba de reeditar “El habla de Lena” de Jesús Neira, una obra ya clásica de la dialectoloxía asturiana publicada en 1955 y que marcó un fitu nel estudiu de los estudios llingüísticos del país. El trabayu de Neira ye una obra de referencia de los estudiosos de temes filolóxicos relacionaos cola llingua asturiana y nella ta la base de les polémiques teoríes del investigador l.lenense sobre la diversidá dialectal del nuestru idioma. “El habla de Lena” ye al empar un volume de consulta imprescindible p’afondar na conocencia de les peculiaridaaes locales del asturianu nel conceyu natal del que col tiempu diba ser un de los másimos detractores del movimientu pola recuperación llingüística y fundador, xunto al profesor Alarcos y l’eruditu Jesús Evaristo Casariego, de l’asociación Amigos de los Bables. 2 de payares, 2005 0 FacebookTwitterPinterestEmail
Sociedá Llamazares afirma que nun hai nada qu’impida’l qu’Asturies sea Nación by asturnet 2 de payares, 2005 El coordinador xeneral d’Izquierda Unida Gaspar Llamazares declara nuna entrevista concedida a un diariu d’Uviéu que nun hai nada qu’impida na Constitución española pa qu’Asturies pueda definise como nación “igual que ye Principáu” y qu’ello depende namás de “la voluntá política” de la propia comunidá. Na entrevista apurrida pol coordinador federal d’IU al periódicu La Nueva España, Llamazares respuende a la pregunta de si Asturies podía definise nel so Estatutu como nación, lo mesmo que Cataluña nel proyectu de nuevu Estatut, respuende que eso “depende de los asturianos” y que “nada na Constitución impide que, al igual que ye Principáu, sea tamién nación, namás ye voluntá política” y diz que sobre’l respective “habrá de pronunciase la comunidá autónoma”. Na mesma entrevista el cabezaleru federal d’Izquierda Unida manifiesta l’enfotu de la so formación el que’l pautu de gobieru IX-BA col PSOE termine la lexislatura: “tamos convencíos de que vamos presentar un bon balance”. Llamazares advierte respective a esta visión positiva del pautu de que “nun queremos qu’esa llectura la faga el PSOE d’asuntos que nós llevamos a fechu, como política social y vivienda”. 2 de payares, 2005 0 FacebookTwitterPinterestEmail
Sociedá Les instituciones gallegues piden l’entendimientu con Asturies nel congresu de Ribadeo by asturnet 31 d'ochobre, 2005 La polémica entamada a esti llau del Eo tuvo bien presente nes xornaes celebraes en Ribadeo embaxo l’agospiu de la Escola Fermín Penzol de la Universidá de Vigo. Xosé Henrique Costas, representante de la institución organizadora, reclamó nel empiezu del congresu la cooficialidá pal asturianu y pal gallegu-asturianu, y criticó l’espolín que s’armó por estes xornaes n’Asturies. Otros participantes nel alcuentru coincidieron con Costas y reivindicaron la Escola Permanente como llugar d’atopada ente les dos comunidaes. Xosé Henrique Costas, de la Universidá de Vigo, calificó de “ignorantes interferencias políticas” les reacciones suscitaes a esti llau del Eo pola convocatoria del congresu de Ribadeo y denunció les que consideró «presións para boicotear a colaboración do galego e do asturiano». Na mesma llinia el primer teniente d’alcalde del conceyu agospiador Fernando Suárez criticó a los “detractores que intentan dinamitar o noso entendimento”. El responsable de la Oficina de Política Llingüística del Principáu, Ramón d’Andrés respondió a les crítiques dica Asturies na so intervención en Ribadeo afirmando que “l’entendimientu tamién pasa pola diplomacia y pola comprensión” que Galicia tien de tener pa coles instituciones d’Asturies. D’Andrés dixo nel alcuentru que les reacciones de dalgunos conceyos del Navia-Eo yeren “comprensibles” énte determinaes iniciatives “poco afortunaes”, al tiempu que pidió un consensu sobre les llingües falaes n’Asturies. Na xornada de pieslle de les xornaes el director xeneral de Difusión Cultural de la Xunta de Galicia, Luis Bará, afirmó que “l’entendimientu y el respetu mutuu” yeren imprescindibles p’asegurar la sobrevivencia de la llingua asturiana y de la fala del Navia-Eo. 31 d'ochobre, 2005 0 FacebookTwitterPinterestEmail
Sociedá El CAO denuncia la falta de voluntá de diálogu del PSOE énte les demandes d’oficialidá by asturnet 31 d'ochobre, 2005 El Conceyu Abiertu pola Oficialidá (CAO) denuncia la postura ríxida del grupu socialista na Xunta Xeneral a aceptar cualaquier diálogu cola plataforma cívica. A pocos díes de la convocatoria d’una manifestación n’Uviéu embaxo’l lema “La oficialidá ye la solución” el CAO señala al PSOE como l’únicu grupu presente na cámara asturiana que se niega a falar sobre les reivindicaciones de la plataforma en materia de derechos llingüísticos. Fontes del CAO manifestaron a Asturnews la so decepción énte la postura de los socialistes, que se negaron mesmo aceptar el documentu reivindicativu elaboráu pol colectivu unitariu. De los tres grupos con representación parlamentaria, tanto el popular como’l d’Izquierda Xunida-Bloque por Asturies caltienen abiertes meses de diálogu col CAO, mientres el PSOE nin siquier llegó a baraxar esta posibilidá. Nos últimos meses el Conceyu Abiertu pola Oficialidá aconceyó col PP y con IX-BA. De los resultaos d’eses reuniones la plataforma sacó en conclusión que los populares ufierten una actitú receptiva a siguir falando inda refuguen de momento asumir les reivindicaciones del Conceyu sobre la reconocencia d’oficialidá. Izquierda Xunida-Bloque, pel so llau, en consecuencia cola so participación nel CAO y col so propiu programa políticu, asume como propies les demandes sobre derechos llingüísticos. PP ya IX-BA comprometiéronse a siguir calteniendo abiertos los calces de diálogu cola plataforma. El Conceyu Abiertu pola Oficialidá fexo públicu’l so malagustu cola actitú de cerazón del PSOE mientres se vuelca en difundir la convocatoria del prósimu 5 de payares n’Uviéu, qu’espera masiva. Asina el CAO entamó entrambos magüestos esti domingu 30 en Xixón y n’Uviéu col fin de facer visible’l llamáu a la manifestación del sábadu y nos prósimos díes va intensificar los llabores de difusión de la convocatoria. 31 d'ochobre, 2005 0 FacebookTwitterPinterestEmail
Sociedá Areces enfótase en que les Cortes de Madrid apreben un Estatut constitucional dafechu by asturnet 31 d'ochobre, 2005 El presidente del Principáu Vicente Álvarez Areces amosóse enfotáu en que’l pasu del proyectu de nuevu Estatutu pa Cataluña peles Cortes Xenerales valga p’afaya-y un conteníu constitucional dafechu. El xefe del executivu autonómicu cuenta que nel Congresu y nel Senáu va buscase la manera na que’l testu catalán tea acordies colos principios de solidaridá y cohesión territorial recoyíos na Carta Magna. Areces respondió con esti enfotu a la pregunta fecha na Xunta Xeneral pol diputáu del PP Ovidio Sánchez na que s’interesaba por saber si el cabezaleru del gobiernu asturianu diba pidir que se convocara una conferencia de presidentes autonómicos pa tratar de la reforma del Estatut. Areces contestó en primer instancia que la conferencia de presidentes más prósima nel tiempu tenía por asuntos a tratar los d’inversiones en I+D y sobre los recursos naturales, especialmente los hidráulicos. Darréu, el presidente asturianu, espresó’l so enfotu y el del so gobiernu en que’l pasu del testu elaboráu pol parlamentu catalán pel Congresu y pel Senáu diba valir pa que se limaran los aspectos menos constitucionales del proyectu: “les Cortes Xenerales van servir sin duda pa que s’apruebe un estatutu que sea plenamente constitucional, que respuenda a los intereses xenerales y onde Asturies, por supuestu, va velar polos sos intereses y va defender les sos posiciones a través de lo qu’ ellí s’esprese”, diz Areces na so respuesta a Ovidio Sánchez. 31 d'ochobre, 2005 0 FacebookTwitterPinterestEmail
Sociedá La Xunta Xeneral pronúnciase pola corrección del Estatut nel Congresu de Madrid by asturnet 27 d'ochobre, 2005 El parlamentu asturianu pronuncióse na so sesión d’esti xueves 27 alrodiu del proyectu d’Estatutu pa Cataluña y pidió la corrección de dellos artículos del proyectu. Énte dos iniciatives presentaes pol PSOE y el PP, la Xunta Xeneral decidió a la fin sumar los grupos de tolos grupos políticos, incluíos Izquierda Xunida-Bloque por Asturies, pa pidir la igua del testu. Mentantu el republicanu catalán Carod Rovira calificaba dende un mediu asturianu la iniciativa de “insólita”. Los tres grupos parlamentarios de la Xunta Xeneral votaron a favor de la camudación de dellos artículos del proyectu d’Estatut aprebáu pel parlamentu de Catalunya. Según manifestaba la propuesta del PSOE, sofitada por PP ya IX-BA, tratáse d’evitar la discriminación d’Asturies y d’otros territorios como consecuencia de posibles “privilexos políticos o económicos” de la comunidá catalana. El grupu popular namás votó contra una de les propuestes socialistes qu’espresaba la so convición de que l’Estatut diba ser enmendáu nel Congresu. Izquierda Xunida-Bloque matizó’l so votu afirmando que si bien “hai aspectos del proyectu d’Estatut que nun compartimos tampoco pensamos qu’haya de sacralizase la Constitución”. Pel so llau, el cabezaleru d’Esquerra Republicana de Catalunya, Josep Lluis Carod Rovira calificó de “insólitu” el pronunciamientu del parlamentu asturianu en declaraciones al periódicu asturianu Les Noticies. Na edición d’esti viernes el semanariu publica una entrevista col políticu catalán na que Carod diz que “toi seguru de qu’a nin un solu de los diputaos del parlamentu catalán se-y diba ocurrir opinar sobre lo que tienen de facer n’Asturies” y que “el futuru de Cataluña vamos decidilu equí, non n’Asturies, lo mesmo que’l futuru d’Asturies nun se va decidir en Cataluña”. Na entrevista concedida al semanariu asturianu el líder d’ERC tamién se manifiesta sobre la iniciativa del so grupu nel Congresu sobre llingües del estáu y lo que podía afectar a Asturies y después de declarar que desconoz el casu específicu de la nuestra comunidá diz que: “les coses nun se resuelven namás que col refugu, tien qu’haber una alternativa que pase pel sofitu a la riqueza llingüística d’Asturies”. 27 d'ochobre, 2005 0 FacebookTwitterPinterestEmail
Sociedá El CAO y l’Academia coinciden en que namás la oficialidá y el compromisu del Principáu evitaríen conflictos llingüísticos by asturnet 27 d'ochobre, 2005 Representantes del Conceyu Abiertu pola Oficialidá y los másimos responsables de l’Academia de la Llingua ufiertaron esti xueves 27 una rueda de prensa conxunta pa convocar a la sociedá asturiana a la manifestación entamada pal prósimu 5 de payares n’Uviéu embaxo la llienda: “La oficialidá ye la solución”. L’Academia y el CAO coincidieron en señalar que conflictos como los vivíos últimamente respective a la Tierra del Navia-Eo nun esistiríen si l’asturianu y el gallegu-asturianu tuvieren la consideranza d’idiomes oficiales de la nuestra comunidá y si el gobiernu autonómicu tomara la iniciativa en política llingüística. Según declaró a Asturnews Fernando Ornosa, portavoz del Conceyu Abiertu “si el gobiernu del Principáu tuviere una política llingüística propia y comprometida cola realidá asturiana nun diba haber intervenciones ayenes como les que sucedieron apocayá” y que “la oficialidá ye la solución, como diz el lema de la manifestación, non el problema nin lo que pueda causar problemes”. Pa Ornosa “ye’l Principáu el que tien de desarrollar la so propia política y correspuénde-yos a l’adminsitración y a los propios asturianos decidir sobre la realidá llingüística d’Asturies”. La manifestación del prósimu día 5 de payares n’Uviéu va dir encabezada por una serie de personaxes públicos de la vida asturiana como’l ciclista Chechu Rubiera, la decana de la Facultá de Ciencies de la Educación Aquilina Fueyo, la decana de Filoloxía Ana Cano, el caderalgu Javier Fernández Conde, les artistes Maite Centol y María Xesús Rodrígues, los actores José Antonio Lobato y Maxi Rodríguez; los escritores Luis Arias Argüelles y Marta Mori, l’ex presidente del Real Uviéu Manuel Lafuente; les presentadores de televisión Rosa Viondi y Sonia Avellaneda; el gaiteru Xuacu Amieva, ente otros. A la fin de la manifestación na Plaza la Catedral va haber un festival de música coles actuaciones del Cuartetu Torner, Mari Luz Cristobal Caunedo, Annabel Santiago y Skama na Rede. Como adelantru de la movilización el CAO va entamar esti domingu a les 12 del meudía entrambos amagüestos nel Rastru de Xixón y delantre’l Teatru Campoamor n’Uviéu pa difundir la convocatoria y les sos propuestes. Hasta agora tienen confirmao l’apoyu a la manifestación toles organizaciones sindicales presentes n’Asturies, Izquierda Xunida, Bloque por Asturies, Izquierda Asturiana, PAS y URAS. 27 d'ochobre, 2005 0 FacebookTwitterPinterestEmail
Sociedá El conceyu d’A Veiga decide nun refugar les iniciatives llingüístiques de Galicia by asturnet 27 d'ochobre, 2005 L’Ayuntamientu d’A Veiga trató esti xueves 27 en plenu una propuesta del grupu popular pa que’l conceyu refugara iniciatives sobre la fala del Navia-Eo provenientes d’instituciones de fuera d’Asturies. El grupu socialista, nel gobiernu municipal, opúnxose a la iniciativa del PP argumentando que’l portavoz del grupu de la oposición “desconocía dafechu de lo que taba falando” y había “una bultable falta d’información sobre l’asuntu”. A Veiga nun siguió la estela de los conceyos d’Entrambasaguas que vienen oponiéndose a les intromisiones d’instituciones gallegues sobre la realidá llingüística de la zona. El plenu decidió nun sumase a les iniciatives que vienieron declarando hasta agora San Tiso d’Abres, Cuaña y El Franco. 27 d'ochobre, 2005 0 FacebookTwitterPinterestEmail
Sociedá Escomienza en Ribadeo el polémicu congresu entamáu pola Universidá de Vigo by asturnet 27 d'ochobre, 2005 La conseyera de Cultura de la Xunta de Galicia Anxela Bugallo asiste esta tarde en Ribadeo a la inauguración de la Escola Permanente Fermín Penzol dedicada a analizar la normalización llingüística en Galicia y n’Asturies. El congresu organizáu pola Universidá de Vigo y el conceyu de la mariña luguesa escomienza arrodiáu de polémica a esti llau del Eo y cola ausencia de los representantes de la Xunta pola Defensa de la Llingua y de l’asociación eonaviega Xeira. L’escritor asturianu Xuan Bello va ser l’encargáu d’abrir les xornaes de Ribadeo con una conferencia titulada “Historia de dos hermanes y un llobu malu”. Darréu de la intervención del poeta de Paniceiros va ser Marisol López, responsable de Política Llingüística del gobiernu gallegu, la que va esponer les Estratexas do Novo Plan de Normalización Lingüística. La xornada del sábadu 29 tenía previsto escomenzar con una mesa conxunta gallego-asturiana cola presencia de Carlos Callón de la Mesa pola Normalización y de Fernando Balbuena de la Xunta pola Defensa de la Llingua Asturiana. A la fin el representante de l’asociación asturiana nun va tar presente nesta mesa por desalcuerdu de la Xunta col planteamientu del congresu y en protesta poles recientes intervenciones d’instituciones gallegues n’Asturies. Sí va tar presente -a nun ser decisión d’última hora- l’asturianu Xulio Viejo pa esponer la situación de la nuestra llingua na Universidá d’Uviéu xunta Goretti Sanmartín de la Universidá d’A Coruña y Manuel Singala de la Universidá de Compostela, que van esponer la situación del gallego nes sos respectives universidaes. El responsable de la Oficina de Política Llingüística del Principáu Ramón d’Andrés va cerrar cola so presencia la delegación d’Asturies nel congresu pa esponer les virtúes y defectos del Plan de Normalización Social pal asturianu aprebáu nos últimos meses pola Xunta Xeneral. L’otru asturianu invitáu a la Escola Fermín Penzól, Xosé Miguel Suárez, de l’asociación Xeira, que tenía previsto intervenir nun debate col representante de l’Academia Galega en Navia-Eo Carlos Varela, tampoco va asistir a les xornaes, por razones que’l so colectivu espunxo esta selmana énte lo que l’asociación eonaviega considera “un actu de propaganda galleguista”. L’únicu actu previstu de la Escola Fermín Penzol n’Asturies ye l’amagüestu que l’asociación cultural San Tirso del Eo ufierta a los participantes nes xornaes esti viernes 28 en San Tiso d’Abres, nuna folixa que tamién va valir pa promocionar la candidatura galaico-portuguesa a la UNESCO. 27 d'ochobre, 2005 0 FacebookTwitterPinterestEmail
Sociedá El conceyu d’El Franco súmase al refugue de la candidatura galaico-portuguesa a la UNESCO by asturnet 26 d'ochobre, 2005 El Conceyu d’El Franco sumóse esta selmana a los de San Tiso d’Abres y de Cuaña nel so refugue a la inclusión de les fasteres de Navia-Eo nos territorios culturales de la candidatura galaico-portuguesa a la UNESCO. Mentantu el sofitu de la Federación d’Asociaciones del Occidente a la candidatura provoca la dixebra ente los colectivos que la integren. El plenu del Ayuntamientu d’El Franco rechaza la iniciativa de Galicia y Portugal ensin entrar a valorar el so conteníu fonderu y declara facelo más “poles formes que pol fondo”, sobremanera por incluir conceyos asturianos ensin tener en cuenta a les instituciones autonómiques y locales de la comunidá. L’alcaldesa del conceyu, Cecilia Pérez, del PSOE espresó’l so “respetu absolutu” pola candidatura y llamentó la manera na que s’inxertaron nella territorios del Navia-Eo “ensin tenelos en cuenta”. Per otru llau diversos colectivos integrantes de la Federación d’Asociaciones del Occidente desmarcáronse del sofitu brindáu pola xunta directiva d’esta plataforma a la declaración del patrimoniu oral inmaterial galaico-portugués como Patrimoniu de la Humanidá. Asociaciones de Bual, Porcía y A Veiga llamentaron la decisión de la xunta directiva de la Federación de brindar esti sofitu ensin consultar a los grupos que la formen. Una d’elles, San Tirso del Eo va celebrar esti viernes 28 un “magosto” n’Abres nel que se va presentar la candidatura galaico-portuguesa y al que tán invitaos los asistentes a la polémica Escola Fermín Penzol de Ribadeo qu’escomienza mañana. 26 d'ochobre, 2005 0 FacebookTwitterPinterestEmail