Sociedá El Ministeriu Defensa ordena a los militares falar namás en castellanu de serviciu by asturnet 12 de xineru, 2006 El Ministeriu de Defensa ordena al través d’una misiva firmada pol subsecretariu del departamentu Justo Zambrana que l’idioma oficial nel que s’espresen los militares tando de serviciu seya’l castellanu “cualquiera que seya la so localización xeográfica dientro’l territoriu nacional”. El departamentu que dirixe José Bono respuende asina a una pregunta formulada nel so discursu de la Pascua Militar pol después sancionáu xeneral Mena alrodiu del Estatut catalán. La misiva de Defensa, difundida pol diariu madrilanu El Mundo, afirma que, teniendo en cuenta el que “la comprensión inmediata de les órdenes y la tresmisión rápida y clara de les informaciones son elementos esenciales pa la eficacia en los trabayos y operaciones militares” considérase que “l’usu d’ un solu idioma nos Exércitos d’España ye un instrumentu d’insustituible valor pal funcionamientu homoxéneu, uniforme y unívocu de les unidaes militares, cualquiera que seya la so localización xeográfica dientro’l territoriu nacional”. El ministeriu especifica asina una norma con calter d’orde énte les espectatives abiertes col nuevu estatutu de Cataluña nel que se recueye la obligació d’emplear la llingua catalana en tolos actos oficiales celebraos dientro la comunidá. La nota unviada pol departamentu del ministru Bono recalca que “el criteriu en vigor sobre usu de la llingua oficial nel ámbitu de los Exércitos y de la Armada ye qu’en tolos actos, actividaes y relaciones de serviciu ha utilizase siempre’l castellano”. Y remata anunciando que :”La Secretaría d’Estáu de Relaciones coles Cortes comunica que nun se tá tramitando proyectu normativu dalgún, nin esiste intención de promovelu o apoyalu, tendente a camudar la situación actual”. 12 de xineru, 2006 0 FacebookTwitterPinterestEmail
Sociedá Dos de cada tres xixoneses demanden la oficialidá según la encuesta de Llera Ramo by asturnet 10 de xineru, 2006 La primer encuesta sociollingüística municipal de Xixón amuesa datos perfavorables a la normalización del asturianu en tolos ámbitos de la vida pública. Nel estudiu del profesor Francisco Llera Ramo -que se presentó esti llunes 9 en formatu de llibru- dos de cada tres xixoneses manifiéstense partidarios de la oficialidá, más d’un ochenta por cientu afirmen entender la llingua asturiana y una amplia mayoría demanda el so empléu polos políticos y l’aumentu de les midíes de promoción. El caderalgu de Ciencies Polítiques de la Universidá del País Vascu presentó l’estudiu que firma xunto a Pablo San Martín y el restu del equipu Euskobarometro que “la realidá de Xixón ye un reflexu de la d’Asturies” y que “nun son los ciudadanos los que ven un problema nel asuntu llingüísticu sinón les élites y los políticos, dellos de los cualos carecen una mestura d’alerxa y de neurosis énte l’asturianu”, afirmó’l profesor Llera. L’autor de la Primer Encuesta Sociollingüística Municipal de Xixón y d’anteriores estudios d’ámbitu autonómicu destacó la paradoxa de qu’Asturies “ye la comunidá na que hai más información sobre la realidá llingüística y la única onde los ciudadanos siguen sin ver reconocíos los sos derechos constitucionales nesa materia”. Llera responsabilizó a los políticos de la situación y tuvo guiños hacia los responsables asturianos del partíu onde milita na federación del País Vascu: “nun entiendo qu’un socialista pueda negase en redondo a reconocer derechos ciudadanos tan elementales como son los llingüísticos y menos cuando s’argumenta alrodiu del costu económicu d’esa reconocencia”, afirmó pa preguntase en voz alta: “¡dende cuando se puede falar de costu económicu en tratándose de derechos!”. Pa Llera los políticos asturianos “amás de gobernar tienen el deber de facer pedagoxía social” y por eso dixo “tan obligaos a reconocer los derechos llingüísticos de los asturianos cola oficialidá y a facer un llabor intensu de normalización social”. El caderalgu de la Universidá del País Vascu reivindicó el factor llingüísticu como “elementu fundamental pa recuperar l’autoestima de los propios asturianos” y p’activar “l’enorme potencial cultural de la nuestra comunidá”. N’otru sen l’autor del estudiu sociollingüísticu quiso resaltar que de los datos obteníos na so encuesta como nos de los anteriores trabayos fechos sobre esti asuntu “hai perbones condiciones pa entamar polítiques normalizadores como reflexen les actitúes positives de los ciudadanos hacia esta posibilidá y el so mesmu grau de conocencia activa o pasiva de la llingua” y arriendes d’ello consideró necesario “entamar l’alfabetización d’adultos, amás de la escolarización”, porque, según dixo “ye l’entornu familiar el que garantiza la cadena de tresmisión llingüística y el que-y da’l conteníu emocional a les llingües, porque una llingua ye emoción énte too”. 10 de xineru, 2006 0 FacebookTwitterPinterestEmail
Sociedá Los ciudadanos suspenden a los políticos en materia de promoción llingüística by asturnet 10 de xineru, 2006 Si los datos de la Primer Encuesta Sociollingüística Municipal de Xixón son estrapolables al conxuntu de la sociedá asturiana, talo afirma l’autor del estudiu, Francisco Llera Ramo, la ciudadanía suspende a l’administración política en materia llingüística y demanda mayoritariamente midíes normalizadores. Na valoración de l’actuación de les instituciones autonómiques y municipales xixoneses na promoción de la llingua asturiana los encuestaos pol equipu dirixíu por Llera Ramo un 10,0 por cientu afirma que’l Principáu nun fai nada y un 8,8 que tampoco l’Ayuntamientu fai dalgo; un 35,3 consideren que’l Principáu fai “más bien poco”, un datu que ye casi hermanu al de la valoración del conceyu con un 34,2 %. Namás un 30% considera que l’administración autonómica “fai dalgo” y un 32 % que lo fai l’Ayuntamientu. Los anteriores son dellos de los datos obteníos pol equipu Euskobarometro nel so trabayu de campu en Xixón, un estudiu fechu al través de seiscientos cuestionarios personales distribuíos pelos distintos barrios y fasteres del conceyu playu. De les conclusiones xenerales, los autores de la encuesta destaquen per un llau la importante actitú positiva de los xixoneses hacia la normalización y la enseñanza como les señes d’alarma que se detecten nel retrocesu social y xeneracional del idioma. 10 de xineru, 2006 0 FacebookTwitterPinterestEmail
Sociedá Ramón d’Andrés afirma que namás la reconocencia oficial del asturianu puede garantizar la normalización by asturnet 10 de xineru, 2006 El responsable de la Oficina de Política Llingüística del Principáu, Ramón d’Andrés afirmó esti llunes 9 nel actu de presentación de la Primer Encuesta Sociollingüística de Xixón que “sin oficialidá nun ye posible garantizar l’ésitu de la normalización llingüística” y detectó nes instancies de poder y en ciertos ámbitos decisorios de la sociedá asturiana “una clara voluntá de nun facer” respective a la llingua asturiana. D’Andrés punxo d’exemplu l’actitú de los xixoneses que reflexa l’estudiu del equipu Euskobaròmetro como “muestra de que la xente ye bastante razonable y namás una parte de les élites tien una relación problemática non cola normalización sinón cola propia llingua”. El xefe de la Oficina de Política Llingüística llamó l’atención sobre la “inercia repetitiva en delles instancies” hacia la llingua y afirmó que “namás la oficialidá garantiza completamente la normalización”. Ramón d’Andrés emponderó’l trabayu dirixíu por Francisco Llera Ramo y defendió la utitilidá de les encuestes como “ferramienta útil pa conocer meyor la realidá y l’entornu sociolóxicu sobre’l que trabayar”. L’estudiu de Xixón “marca un modelu a siguir por otros conceyos” en materia de conocencia de la realidá sociollingüística, afirmó’l responsable de la Oficina de Política LLingüítica del Principáu. 10 de xineru, 2006 0 FacebookTwitterPinterestEmail
Sociedá El RIDEA escueye a tres nuevos miembros de la institución by asturnet 10 de xineru, 2006 El Conseyu Xeneral del Real Institutu d’Estudios Asturianos (RIDEA) escueye esti martes 10 los nomes de los candidatos pa ocupar tres places vacantes na institución. Ente les persones propuestes ta l’ex presidente del Principáu Juan Luis Rodríguez Vigil, xunto a otros cinco candidatos. Amás de Vigil, aspiren a ocupar un sitiu como nuevos miembros del RIDEA la historiadora del Arte Pilar García Cuetos, el prehistoriador Juan Fernández Tresguerres Velasco, l’economista Antonio Álvarez Pinilla, l’hematólogu y recopilador de tradiciones orales Joaquín Fernández García y el profesor de Filoloxía latina Antonio García Leal. 10 de xineru, 2006 0 FacebookTwitterPinterestEmail
Sociedá Llera Ramo presenta la so encuesta sociollingüística de Xixón by asturnet 9 de xineru, 2006 El caderalgu de Ciencies Polítiques de la Universidá del País Vascu Francisco Llera Ramo presenta esta tarde en Xixón la encuesta que dirixó al frente del equipu Euskobarómetro sobre la realidá sociollingüística nel conceyu playu. Ye’l primer estudiu d’esti calter que se fai tan a fondo n’Asturies sobre un ámbitu local. La encuesta del profesor Llera Ramo amuesa datos novedosos sobre la fala de los xixoneses y la so actitú social respective a la llingua asturiana. Los resultaos d’esti estudiu tienen amás el valir de reflexar la situación sociollíngüística nel conceyu urbanu más pobláu de la nuestra comunidá. L’estudiu “L’asturianu en Xixón. I Encuesta Sociollingüística” fue encamentáu al equipu Euskobarómetro, dirixíu pol Francisco Llera Ramo, pola Oficina Municipal de la Llingua y va presentase esta tarde a les 19,30 hores nel Centru Social de El Llano. 9 de xineru, 2006 0 FacebookTwitterPinterestEmail
Sociedá La diputada mexicana Marcela Lagarde visita Asturies invitada pol Institutu de la Muyer by asturnet 9 de xineru, 2006 La diputada mexicana Marcela Lagarde escomienza esti llunes 9 una visita a Asturies invitada pol Institutu de la Muyer del Principáu. La presidenta de la comisión qu’investiga los feminicidios de Ciudad Juárez y caderalga d’Antropoloxía de la Universidá Autónoma de México va desenvolver a lo llargo de los prósimos díes dellos alcuentros, conferencies y un cursu sobre liderazu de les muyeres. Lagarde pronuncia al meudía de güei una conferencia n’Uviéu nel Edificiu Administrativu de Servicios Múltipes (EASMU) titulada “Las Políticas de Igualdad y el Liderazgo de las Mujeres”. Pela tarde la política mexicana va desplazase hasta’l vai del Nalón onde intervién en diversos actos en Llaviana, San Martín y Llangréu. L’axenda de la diputada azteca va siguir esti martes 10 con un cursu sobre liderazgu femenín nel Auditoriu d’Uvièu y el miércoles 11 a les 19,30 va caltener un diálogu públicu alrodiu de “Democracia, Género y Feminismoco” cola filósofa asturiana Amelia Varcárcel nel Centru de Cultura Antigu Institutu de Xixón. Les actividaes de Marcela Lagarde na so visita a la nuestra comunidà rematen el xueves 12 al meudía con una conferencia sobre “Violencia feminicida” nel Aula Magna de la Universidá d’Uviéu. 9 de xineru, 2006 0 FacebookTwitterPinterestEmail
Sociedá Asturnews da nome al periódicu ‘oficial’ del Simulador Políticu del País Astur by asturnet 9 de xineru, 2006 Un grupu d’estudiantes de Ciencies Polítiques son los autores y principales participantes del primer Simulador Políticu del País Astur, un xuegu nel que caún de los intervinientes asemeya militar en partíos nacionalistes d’Asturies, Lleón, Extremadura o Miranda do Douro y nel que les noticies dales un diariu que lleva’l nome d’Asturnews. El desenvolvimientu del simulador sofítase na idea de que cada xugador entame como militante de partíos como URAS, AA, IAS o la UPL, y afronten darréu, elleción tres elleción, el retu de construir un país astur prósperu. El xuegu inclúi la redacción d’una constitución, de lleis, de decretos, etc. El planteamientu inicial del SPPAS escomienza en xineru de 2006: tres un gobiernu provisional Asturlleonés de 4 meses del Presidente Vega, Estremadura y Miranda do Douro, deciden xunise al nuevu País Astur. Agora, falten pocos díes pa les elleciones y pa que los 2.5 millones d’ástures escoyamos el nuesu Conceyu Constituyente. D’esi momentu en delantre los xugadores habrán decidir lo que suceda nel imaxinariu País Astur. Simulador Políticu del País Astur 9 de xineru, 2006 0 FacebookTwitterPinterestEmail
Sociedá El Gobiernu del Principáu espera’l dictame del Conseyu Consultivu pa escomenzar la reforma estatutaria by asturnet 5 de xineru, 2006 El presidente del Principáu Vicente Álvarez Areces anunció la intención del so gobiernu de pidir el dictame del Conseyu Consultivu sobre la reforma del Estatutu esti mesmu mes. Si a la fin l’executivu aprebara esta solicitú, l’organismu asesor podía tener fechu l’informe pa la primavera, alrodiu’l mes d’abril, según aseguró’l presidente del Conseyu, Bernardo Fernández. El camín pa entamar la reforma inda nun dio nengún pasu alantre pero podía escomenzar a dalos si se cumple el deséu espresáu a diversos medios pol presidente Areces de solicitar esti mesmu mes el dictame correspondiente al Conseyu Consultivu. Los socios de gobiernu de la coalición Izquierda Xunida-Bloque por Asturies consideren sicasí que’l xefe del executivu nin el propiu PSOE nun tan pol llabor d’escomenzar la reforma y asina lo amosó’l diputáu Aurelio Martín pal que los socialistes “apuesten pola vía lenta” énte’l nuevu Estatutu. El presidente del Partido Popular d’Asturies, Ovidio Sánchez, manifestó estos díes en declaraciones a los principales medios de la comunidá que la so formación nun va xuntase a negociar la reforma estatutaria “mientres nun se solvente n’España’l problema nacionalista”, afirmó. La negativa del PP a participar nel debate sobre’l nuevu Estatutu de reafirmase diba impidir -pola cuantía numérica de los populares na Xunta Xeneral- cualaquier posible intentu d’entamar la reforma al igual que tán faciendo otres comunidaes autónomes. 5 de xineru, 2006 0 FacebookTwitterPinterestEmail
Sociedá Corvera súmase a los conceyos en solicitar la so revisión toponímica by asturnet 5 de xineru, 2006 El conceyu de Corvera va sumase a los cásique cuarenta ayuntamientos d’Asturies que tán inxertos en trámites de solicitar la revisión de la so toponimia. El prósimu viernes 13 de xineru representantes del equipu de gobiernu municipal van caltener una xornada de trabayu cola Xunta Asesora de Toponimia del Principáu pa escomenzar la elaboración del nomenclátor iguáu del conceyu. El responsable de la Oficina de Política Llingüística de la Conseyería de Cultura, Ramón d’Andrés, caltuvo apocayá entrambes reuniones con representantes del Ayuntamientu corverán pa entamar l’apertura del espediente toponímicu del municipiu. Na reunión del prósimu 13 de xineru los trámites pa la igua de los nomes de llugar de Corvera va dar un nuevu pasu que habrá de siguir el so cursu d’esi momentu pa en delantre como ya ficieran ya más de la mitá de los conceyos asturianos. 5 de xineru, 2006 0 FacebookTwitterPinterestEmail