Sociedá El personal de les oficines de normalización denuncia la situación de la rede municipal by asturnet 7 de febreru, 2006 L’Asociación de Trabayadores de la Normalización Llingüística (ATNL), acabante constituíse y que xunta al personal de los servicios de promoción del asturiano, denuncia la situación de la Rede tres años después de ponese en marcha. El colectivu alerta que de les diez oficines abiertes namás seis permanecen actives anguaño. L’asociación responsabiliza a la Conseyería de Cultura de la situación creada y d’incumplimientu del compromisu adquiríu nel so día pola titular del departamentu, Ana Rosa Migoya, cola normalización y dignificación del idioma al través de la rede de servicios municipales. La decicisión de xuntase nun colectivu naz de la situación esistente, según afirma l’ATLN. Los trabayadores de les oficines de promoción del asturiano avisen de que’l procesu de normalización “ta desenvolviéndose en munchos casos nunes condiciones que nun son les meyores nin les más eficaces: precariedá llaboral, falta de voluntá política, arrequexamientu nel organigrama municipal, inestabilidá, falta de recursos, etc” y afirmen que “la situación a 4 de febreru ye que de diez SNL que se crearon nel 2005, solo tán nactivo seis”. Dende l’ATLN defenden que “los Conceyos han garantizar el llabor de los SNL con unes midíes de mínimos: asegurar lallugamientu afechiscu del serviciu nel organigrama del Conceyu; garantizar el plenu rindimientu del SNL; faer de la llingua asturiana una cuestión tresversal en tolos ámbitos del conceyu; desendolcar aiciones concretes que vaigan normalizando socialmente la llingua asturiana”. Pa l’asociación ye el Gobiernu del Principáu dAsturies “ye quien tien la competencia en materia de normalización llingüística, polo tanto ye él quien tien dasegurar que la normalización llingüística se tresllade a los conceyos asturianos, como lo fai con otru tipu de servicios, como un compromisu claru davanzar”. A la fin l’ATLN cuida que la situación actual y la verdadera normalización namás podíen solventase cola reconocencia oficial de la llingua asturiana y dexen en manes del gobiernu autonómicu esa responsabilidá y consideren “quel nun lo facer ye un actu de gran irresponsabilidá pa col pueblu asturianu y pa cola so cultura”. El colectivu resume’l so planteamientu final en que “la oficialidá de la llingua asturiana y la posterior llei de normalización llingüística ye la única garantía de que los derechos llingüísticos de los/es asturianos/es van ser respetaos”. 7 de febreru, 2006 0 FacebookTwitterPinterestEmail
Sociedá La Xunta entama un cursu de llingua asturiana n’Uviéu by asturnet 7 de febreru, 2006 La Xunta pola Defensa de la Llingua Asturiana entama un cursu d’asturianu n’Uviéu de sesenta hores y qu’escomienza’l prósimu 15 de febreru. El maestru Llinu Álvarez va ser l’encargáu d’impartir les clases que van celebrase de 18,00 a 19, 30 tolos llunes, miércoles y vienres. La matrícula completa ye de 30 euros. Les clases van ser nos locales de la Xunta dUviéu na cai La Gascona 12, baxu A. Les persones interesaes napuntase o garrar más información puen facelo nel local del cursu, nhorariu de tarde, o nel chigre de la Xunta La Casa Posafuelles (La Cuesta la Vega 10, Uviéu). Tamién pel corréu: uvieu@exunta.org o llamando al 985 20 31 22 (Tardes). La dirección web de la Xunta pola Defensa la Llingua ye www.exunta.org. 7 de febreru, 2006 0 FacebookTwitterPinterestEmail
Sociedá Los profesionales de la normalización xúntense nuna asociación reivindicativa by asturnet 3 de febreru, 2006 El Conceyu Abiertu d’Uviéu va acoyer esti sábadu 4 al meudía la presentación de l’Asociación de Trabayadores de la Normalización Llingüística, un colectivu formáu pol personal de les oficines municipales de promoción del asturiano que tenta meyorar les condiciones llaborales d’estos profesionales y tamién el desenvolvimientu afayadizu del so trabayu. Llograr que la normalización sea efectiva y visible nos conceyos onde desarrollen les sos xeres los trabayadores de los departamentos municipales dedicaos a la promoción del idioma ye otru de los oxetivos de l’asociación naciente. Ente los finxos del colectivu ta arriendes el de consolidar la rede de normalización pa consiguir una continuidá de les oficines esistentes y del personal que trabaya nelles. Anguaño esisten Servicios de Normalización Llingüística nes mancomunidaes de la Sidra y de Peñes, asina como nos conceyos de Xixón, L.lena, Siero, Avilés y Cangas del Narcea. 3 de febreru, 2006 0 FacebookTwitterPinterestEmail
Sociedá La Xunta súmase a les crítiques del CAO a la conseyera de Cultura by asturnet 3 de febreru, 2006 La Xunta pola Defensa de la Llingua sumóse ayer a les crítiques feches pol Conceyu Abiertu pola Oficialidá (CAO) a les declaraciones de la conseyera de Cultura Ana Rosa Migoya nun canal local de televisión nes qu’afirmaba que la oficialidá diba ser una imposición pa los ciudadanos. L’asociación polos derechos llingüísticos calificó de “cínica” la posición del PSOE por defender coses distintes n’Asturies y en Madrid. La Xunta denunció les contradicciones esistentes nos socialistes asturianos a la hora d’afrontar la diversidá idiomática del estáu cola cita de la proposición non de llei presentada pol PSOE nel Congresu de los Diputaos de la que dio conocenciaAsturnewsna so edición d’esti miércoles 1 y na que’l partíu nel que milita Ana Rosa Migoya consideraba que la cooficialidá favorez la convivencia llingüística. La Xunta pola Defensa de la Llingua animó a los socialistes favoratibles a la oficialidá a “salir del armariu” pa consiguir que les sos tesis avancen nel senu de la FSA énte la reforma estatutaria. 3 de febreru, 2006 0 FacebookTwitterPinterestEmail
Sociedá Dirixentes d’Izquierda Xunida nun dan por sentao que’l PSOE refugue la oficialidá by asturnet 2 de febreru, 2006 Izquierda Xunida nun da por sentao que los sos socios de gobiernu del PSOE refuguen incluir la cooficialidá nel nuevu estatutu. Asina lo manifestaron el responsable de Xusticia y Esteriores, Francisco Javier García Valledor, y el responsable d’IX n’Asturies, Jesús Iglesias, pa los que declaraciones reciéntes como les feches por dirixentes de la FSA o pola conseyera de Cultura, Ana Rosa Migoya, nun amuesen que los socialistes se cierren en banda a tratar un asuntu que’l conseyeru de Xusticia calificó de “central nel nuevu estatutu. Pa Valledor la posición espresada por Migoya “nun representa al gobiernu porque ende ye un asuntu que nun se debatió” y cuida que la conseyera falaba a títulu personal o como militante del PSOE, inda “ella conoz perfectamente que nel propiu gobiernu hai miembros que defendemos la oficialidá”. El responsable de XUsticia y Esteriores aspira a convencer a los cabezaleros socialistes de la necesidá d’asumir esti asuntu, empezando pola propia conseyera de Cultura: “espero qu’esi espíritu de defensa de la llibertá qu’ella manifiesta habíen llevar a los socialistes asturianos precisamente a defender la cooficialidá, porque ésta garantiza a munchos asturianos el derechu cívicu d’usar la llingua que queremos, cosa que agora nun podemos facer”, dixo Valledor en declaraciones que recueye’l diariu El Comercio na so edición d’esti xueves 2. Pel so llau el dirixente d’Izquierda Xunida d’Asturies, Jesús Iglesias, rechazó que’l so grupu defenda la imposición de la oficialidá: “nós siempre tuvimos contra cualquier imposición y de xuro qu’hai fórmules pa consiguir un alcuerdu sobre la oficialidá”, afirmó. 2 de febreru, 2006 0 FacebookTwitterPinterestEmail
Sociedá El CAO considera un contrasentíu que’l PSOE defenda la diversidá llingüística fuera y n’Asturies non by asturnet 2 de febreru, 2006 El Conceyu Abiertu pola Oficialidá (CAO)salió al pasu de les últimes declaraciones de la conseyera de Cultura, Ana Rosa Migoya, sobre la oficialidá del asturianu, calificándoles de “impropies d’una portavoz de gobiernu y faltes de sentíu cuando se fala en nome de la llibertá pa negar el derechu de los falantes a usar la so llingua”. La plataforma considera “un contrasentíu la postura que’l PSOE defende en Cataluña o en Madrid tocante a la diversidá llingüística y la que caltién n’Asturies, contraria a reconocer los derechos de los asturfalantes”. El portavoz del CAO, Fernando Ornosa, calificó de “pergraves” les declaraciones de Migoya y manifestó a Asturnews que nun se trata de dalgo aislao: “el PSOE ta manteniendo últimamente una posición de cerrar files alrodiu de la oficialidá y cuidando de recalcar determinaes palabres como imposición, obligatoriedá, etc.”. Pal voceru del Conceyu esta posición “ye totalmente contradictoria nun partíu que defende la obligatoriedá pal catalán nel nuevu Estatut o que presenta una proposición nel Congresu na que diz que la cooficialidá de les llingües favorez la convivencia”. Respective a la descalificación fecha por Migoya de les encuestes del equipu de Llera Ramo, el CAO califícales de “falta de respetu al sentir mayoritariu de los asturianos que reflexen eses encuestes y otres de manera continuada nel tiempu”. Pa Fernando Ornosa: “hai una mayoría de ciudadanos que ta a favor de la oficialidá y eso ye dalgo que tien de tener en cuenta el PSOE, tien que gobernar pa tolos asturianos”. El Conceyu Abiertu pola Oficialidá quiso tamién retrucar al presidente del Principáu, Vicente Álvarez Areces, nes sos declaraciones sobre la realidá llingüística d’Asturies y Galicia, con motivu del recién cume ente los gobiernos d’entrambes comunidaes: “el presidente emponderó el gallego como llingua de cultura, con una tradición hestórica y un prestixu indudables, y pola contra refirióse a ‘los bables’ d’Asturies, dalgo que nós consideramos inaceptable y una manera insólita de facer de menos a la propia comunidá onde gobierna pa emponderar a otra”, dixo el portavoz del CAO a Asturnews. Ornosa calificó de “falta de respetu a los asturianos” les declaraciones d’Areces. 2 de febreru, 2006 0 FacebookTwitterPinterestEmail
Sociedá Asturies encabeza les cifres en visites de turismu cultural by asturnet 1 de febreru, 2006 Asturies encabeza la llista de comunidaes autónomes en recibir viaxes turísticos en busca d’interés hestóricu o patrimonial y ye la octava en consumu de productos culturales, según recueye un anuariu estadísticu del Ministeriu de Cultura. El consumu cultural nel Principáu ye de 238,9 euros por habitante, una de les cifres más altes del estáu. Nel informe del ministeriu amuésase que’l 18 por cientu de los turistes que viaxaron a Asturies ficiéronlo por motivos culturales, la cifra más alta ente les comunidaes. Estremadura, Cantabria y Galicia son les comunidaes que siguen a la nuestra nesta modalidá de turismu. En cuantes al gastu por habitante en consumu cultural son la Comunidá madrilana con 306 euros y la vasca con 293 les qu’encabecen la llista na qu’Asturies ta n’octavu puestu con 238,9 euros por persona. Como datos xenerales l’Anuariu d’Estadístiques Culturales señala que nos últimos años el númberu d’empléu xeneráu na industria de la cultura medró un venti por cientu y anguaño hai más de 60.000 mil empreses dedicaes específicamente a esti sector en tol estáu. Anuariu d’Estadístiques Culturales del Ministeriu de Cultura 1 de febreru, 2006 0 FacebookTwitterPinterestEmail
Sociedá Migoya afirma que la oficialidá lleva a una imposición y que los ciudadanos apuesten pola voluntariedá by asturnet 1 de febreru, 2006 La conseyera de Cultura Ana Rosa Migoya afirmó esti martes 31 que la recoyida de la oficialidá nel nuevu estatutu diba ser “una imposición pa munchos ciudadanos” y que dende’l PSOE “trabayamos pola llibertá y la pola opción de poder elexir”, una posición que la portavoz del gobiernu asturianu dixo compartir “personalmente”. Migoya descalificó les encuestes del equipu de Llera Ramo porque “ya se sabe que les encuestes dependen de los items que recueyan”, afirmó. La titular de Cultura fexo estes declaraciones nel cursu d’una entrevista nel Canal 10 del grupu Vocento na que fue especialmente contundente respective a la posibilidá de reconocer l’asturianu como idioma oficial de la nuestra comunidá: “la mayoría de los ciudadanos opten pola llibertá y la voluntariedá” y que al pesar de que los asturianos «sienten amor pola so cultura y pola so llingua», eso nun significa «que demanden la oficialidá». Ana Rosa Migoya declaró en Canal 10 que respective al tratamientu llegal del asturianu “El PSOE siempre fue mui claru” y qu’ella compartía “personalmente” esa posición. 1 de febreru, 2006 0 FacebookTwitterPinterestEmail
Sociedá El PSOE presentó n’avientu una proposición nel Congresu na que se defende que la cooficialidá de les llingües favorez la convivencia by asturnet 1 de febreru, 2006 El grupu parlamentariu socialista presentó el pasáu 9 d’avientu nel Congresu de los Diputaos una proposición non de llei en defensa de la diversidá llingüística del estáu na que se caltién que la esperiencia de cooficialidá de los distintos idiomes “non namás nun supunxo un menoscabu pa la llingua común sinón que xeneró una dinámica de convivencia llingüística”. La declaración y l’espíritu d’esta iniciativa parlamentaria contasta cola actitú del PSOE n’Asturies. La posición que los socialistes asturianos caltienen respective a la posibilidá de recoyer la cooficialidá de la nuestra llingua y del castellano nel nuevu estatutu remembróla la conseyera de Cultura y portavoz del executivu autonómicu, Ana Rosa Migoya nunes declaraciones a Canal 10 que reproduz Asturnews na so edición d’esti miércoles 1. Nelles la titular de Cultura afirma que la oficialidá “llevaría a la imposición a muchos ciudadanos”. La proposición non de llei presentada pol PSOE nel Congresu, firmada polos diputaos Ramón Jáuregui y Daniel Fernández, felicítase polos llogros democráticos algamaos dende la entrada en vigor de la Constitución y concretamente los consiguios en materia de reconocencia de la pluralidá llingüística del estáu. La esperiencia d’estos años, dizse na proposición “amosó que la protección y el puxu de les llingües propies de les diferentes comunidaes autónomes nes que rixe un réxime de cooficialidá llingüística non namás nun se produció en menoscabu de la llingua común sinón que xeneró una dinámica de convivencia llingüística que ye la característica principal de la vida cotidiana nos pueblos y ciudaes”. Esta convivencia ye calificada na iniciativa parlamentaria de “bien valiosu del que concierne a tolos poderes públicos la so protección”. Frente a la posibilidá de que se produciere una imposición como la barruntada pola conseyera Migoya la realidá amosó, según la proposición non de llei del grupu parlamentariu socialista nel Congresu, que l’ésitu de la convivencia algamada pola cooficialidá “radica en que en diches COmunidaes Autónomes los ciudadanos tienen derechu a usar, acordies cola so llibre elección, y con plena validez xurídica, cualquiera de les llingües oficiales en tolos ámbitos y tipu de relación,y polo mesmo nes sos relaciones con cualquier poder públicu radicáu nel correspondiente territoriu”. La iniciativa manifiesta nesi sen: “entendemos que l’usu de les llingües ye un derechu de los ciudadanos y que correspuende al Estáu garantizar esi derechu y esa llibertá”. 1 de febreru, 2006 0 FacebookTwitterPinterestEmail
Sociedá Carmen Rúa afirma que l’alcaldesa y los socialistes nun quieren aprebar la ordenanza del asturiano by asturnet 31 de xineru, 2006 La conceyala de Llingua y Cultura Asturianes del Ayuntamientu de Xixón Carmen Rúa acusó al grupu socialista y a l’alcaldesa, Paz Fernández Felgueroso, de nun querer aprebar la propuesta d’ordenances sobre usu del asturianu nel conceyu elaborada pola Oficina Municipal de la Llingua. Rúa afirmó que dende’l so grupu d’Izquieda Xunida-Bloque ya nun saben qué armes polítiques utilizar pa enderechar la situación. Dende l’unvíu per parte de la Oficina de la Llingua a los grupos políticos del documentu sobre usu del asturianu nel Ayuntamientu y en tolos departamentos municipales namás los conceyales d’IX-BA amosaron intención de llevar la propuesta a un plenu pa la so aprebación. Los sos socios de gobiernu del PSOE refugaron en sucesives ocasiones asumir el documentu y nos últimos intentos de desbloquear la situación encamentaron una rebaxa de los conteníos de les ordenances y la mesma alcaldesa llegó referise a elles na so redacción orixinal como “una oficialidá de fechu”, que’l so grupu nun taba dispuestu aceptar. Carmen Rúa, responsable política del departamentu de normalización qu’elaboró les ordenances por encamientu del COnseyu Asesor de la Oficina Municipal de la Llingua manifestó recientemente a un diariu asturianu que nin l’alcaldesa nin el grupu socialista queríen aprebar la propuesta sobre usu de la llingua asturiana y confesó que nel so grupu ya nun tienen armes polítiques pa llegar a un alcuerdu: “o nun esisten eses armes o si esisten nun se tan esgrimiendo per parte del equipu de gobiernu”, afirmó. La conceyal de Llingua y Cultura Asturianes presentó va unes selmanes un estudiu sociollingüísticu dirixiu pol profesor Francisco Llera Ramo, según el cualu una amplia mayoría de xixoneses yeren partidarios del usu del asturianu dientro del Ayuntamientu y un 61 por cientu favorables a la oficialidá. 31 de xineru, 2006 0 FacebookTwitterPinterestEmail